ສູນກາງແນວລາວສ້າງຊາດ ຈັດກອງປະຊຸມປຶກສາຫາລືກ່ຽວກັບການກະກຽມຄວາມພ້ອມການຈັດງານບຸນເພື່ອອຸທິດເຖິງ ທ່ານ ປະທານ ໄກສອນ ພົມວິຫານ ເນື່ອງໃນໂອກາດວັນຄ້າຍວັນເກີດ ຄົບຮອບ 100 ປີ, ຂຶ້ນທີ່ສູນກາງແນວລາວສ້າງຊາດ, ໃນວັນທີ 21 ຕຸລາ 2020 ນີ້; ໂດຍການເປັນປະທານຂອງ ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ມີຮອງປະທານສູນກາງແນວລາວສ້າງຊາດ, ບັນດາທ່ານຕາງຫ້ອງວ່າການສູນກາງພັກ, ຕາງໜ້າກະຊວງ-ອົງການທີ່ກ່ຽວຂ້ອງ ເຂົ້າຮ່ວມ.

ໃນກອງປະຊຸມ, ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ໄດ້ຜ່ານແຜນການຈັດງານບຸນ ເພື່ອອຸທິດເຖິງທ່ານ ປະທານ ໄກສອນ ພົມວິຫານ ເນື່ອງໃນໂອກາດວັນຄ້າຍວັນເກີດ ຄົບຮອບ 100 ປີ, ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບການຈັດງານບຸນ ເພື່ອອຸທິດເຖິງທ່ານ ປະທານ ໄກສອນ ພົມວິຫານ ເນື່ອງໃນໂອກາດວັນຄ້າຍວັນເກີດ ຄົບຮອບ 100 ປີ. ພ້ອມກັນນັ້ນ, ບັນດາທ່ານ ຕາງໜ້າຈາກກະຊວງ-ອົງການ ກໍໄດ້ມີການປະກອບຄຳຄິດຄຳເຫັນ ຕໍ່ບັນດາໜ້າວຽກຂອງແຜນການຈັດງານບຸນດັ່ງກ່າວ ຢ່າງກົງໄປກົງມາ.