ສູນກາງແນວລາວສ້າງຊາດ

Lao Front For National Development

ປຶກສາຫາລືວຽກງານໜັງສືພິມສາມັກຄີພັດທະນາ

ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ຜູ້ຊີ້ນໍາວຽກງານໜັງສືພິມ ສາມັກຄີພັດທະນາໄດ້ກ່າວ 3 ຈຸດປະສົງໃນການຈັດກອງປະຊຸມ ໂດຍມີຄະນະກໍາມະການສູນກາງແນວລາວສ້າງຊາດ (ສນຊ) ອ້ອມຂ້າງສູນກາງ-ນະຄອນຫຼວງຈໍານວນໜຶ່ງເຂົ້າຮ່ວມ ໃນວັນທີ 27 ພະຈິກ 2017 ນີ້ ທີ່ ສນຊ.

ກອງປະຊຸມຄັ້ງນີ້ແມ່ນເພື່ອປຶກສາຫາລືກ່ຽວກັບຊ່ອງທາງຄວາມຢືນຍົງເພື່ອຫັນເປັນກຸ້ມຕົວເອງເທື່ອລະກ້າວ ຕາມແນວທາງນະໂຍບາຍຂອງພັກ, ປຶກສາຫາລືດ້ານວິທີການຂຽນ, ຄໍລໍາເນື້ອໃນ, ຮູບແບບ, ໂຄງສ້າງຂອງໜັງສືພິມ, ແຜນການແຈກຢາຍ ແລະ ຂໍ້ສະດວກ-ຂໍ້ຫຍຸ້ງຍາກເບື້ອງຕົ້ນໃນການຈັດພິມ ແລະ ການແຈກຢາຍ. ທ່ານ ຮອງປະທານສູນກາງແນວລາວສ້າງຊາດ ຜູ້ຊີ້ນໍາວຽກງານໜັງສືພິມ ກ່າວວ່າ: ອົງການແນວລາວສ້າງຊາດ ແມ່ນສືບທອດມູນເຊື້ອອັນສະຫງ່າລາສີຂອງແນວລາວອິດສະຫຼະ ແລະ ແນວລາວຮັກຊາດ (ໃນເມື່ອກ່ອນ) ທີ່ປະຕິບັດພາລະບົດບາດໜ້າທີ່ຫຼັກໃນການເປັນຄັນທຸງເຕົ້າໂຮມຄວາມສາມັກຄີປອງດອງປວງຊົນລາວທັງຊາດ ໃນໄລຍະການປະຕິວັດຊາດປະຊາທິປະໄຕ ແລະ ໃນເວລານັ້ນກໍ່ໄດ້ມີໜັງສືພິມສຽງຂອງ ແນວລາວອິດສະຫຼະ ແລະ ແນວລາວຮັກຊາດ, ແຕ່ພາຍຫຼັງປົດປ່ອຍປະເທດຊາດ ແລະ ສະຖາປະນາເປັນ ສປປ ລາວ ໜັງສືພິມສຽງຂອງແນວລາວຮັກຊາດ ໄດ້ປ່ຽນຊື່ເປັນໜັງສືພິມປະຊາຊົນ ທີ່ເຮັດໜ້າທີ່ເປັນກະບອກສຽງຂອງສູນກາງພັກ (ປັດຈຸບັນ). ສະນັ້ນ, ອົງການແນວລາວສ້າງຊາດຈຶ່ງບໍ່ມີໜັງສືພິມສະເພາະທີ່ປະຕິບັດພາລະບົດບາດໜ້າທີ່ການເມືອງຂອງຕົນ ແຕ່ໃນຍຸກຂໍ້ມູນ-ຂ່າວສານທີ່ມີທັງສິ່ງເອື້ອອໍານວຍ ແລະ ຫຼາຍບັນຫາທ້າທາຍຢູ່ປະເທດເຮົາ, ການສ້າງຕັ້ງໜັງສືພິມຍັງມີຄວາມຈໍາເປັນ ແລະ ສໍາຄັນໃນວຽກງານໂຄສະນາທີ່ມີຫຼາຍຮູບຫຼາຍສີ ດັ່ງນັ້ນ ພາຍໃຕ້ການຊີ້ນໍາໆພາຂອງຄະນະພັກ-ຄະນະປະຈໍາ ສນຊ ສະໄໝທີ X ນີ້, ມາຮອດວັນທີ 3 ຕຸລາ 2017 ໜັງສືພິມ ສາມັກຄີພັດທະນາ ຈຶ່ງໄດ້ຮັບການສ້າງຕັ້ງຄືນໃໝ່ ເປັນລາຍເດືອນ, ເພື່ອຢາກໃຫ້ໜັງສືພິມມີຄວາມຍືນຍົງໃນການເປັນກະບອກສຽງຮັບໃຊ້ແນວທາງຂອງພັກ, ນິຕິກໍາຕ່າງໆຂອງລັດ ແລະ ວຽກງານຂອງແນວລາວສ້າງຊາດ ທ່ານ ຮອງປະທານ ສນຊ ໄດ້ມີຄໍາເຫັນເຈາະຈີ້ມ ເພື່ອໃຫ້ຜູ້ເຂົ້າຮ່ວມກອງປະຊຸມມີຄໍາເຫັນຢ່າງມີຈຸດສຸມ. ຈາກນັ້ນ, ທ່ານ ປອ ບຸນຈອມ ວົງເພັດ ຫົວໜ້າບັນນາທິການ ກໍ່ໄດ້ລາຍງານສະພາບລວມໂດຍຫຍໍ້ໃນການຈັດພິມ, ການແຈກຢາຍ ແລະ ງົບປະມານ.

ຜ່ານການປະກອບຄໍາເຫັນຢ່າງກົງໄປ-ກົງມາຂອງຜູ້ເຂົ້າຮ່ວມ ສາມາດເປັນບົດຮຽນ ແລະ ເປັນຂໍ້ມູນທີ່ດີຫຼາຍ ຕໍ່ການຈັດຕັ້ງປະຕິບັດທີ່ເປັນເອກະພາບເພື່ອບັນລຸຄາດໝາຍທີ່ວາງໄວ້ ແລະ ພ້ອມກັນປັບປຸງທາງດ້ານປະລິມານ, ຄຸນະພາບ, ການໂຄສະນາ, ການແຈກຢາຍ ແລະ ອື່ນໆທີ່ກ່ຽວຂ້ອງເທື່ອລະໜ້ອຍ ແນໃສ່ຕອບສະໜອງຄວາມຮຽກຮ້ອງຕ້ອງການຂອງສັງຄົມໃນໄລຍະໃໝ່ໄດ້ຮັບຮູ້ຂໍ້ມູນ-ຂ່າວສານ ແລະ ເຂົ້າໃຈຕໍ່ວຽກງານແນວລາວສ້າງຊາດ ຫຼາຍຂຶ້ນ.

info@lfnd.org.la | 021 213754 | (856-21) 453191