ສູນກາງແນວລາວສ້າງຊາດ

Lao Front For National Development

ຜູ້ແທນກອງປະຊຸມໃຫຍ່ແນວລາວສ້າງຊາດ ແຂວງເຊກອງ ເຂົ້າວາງພວງມາລາຢູ່ອະນຸສາວະວີນັກຮົບນິລະນາມ.

ເພື່ອສະແດງຄວາມກະຕັນຍູຮູ້ບຸນຄຸນ ແລະຈາລຶກຄຸນງາມຄວາມດີຕໍ່ນາຍ ແລະພົນທະຫານ, ຕໍາຫຼວດ, ປະຊາຊົນລາວບັນດາເຜົ່າທີ່ເສຍສະຫຼະເລືອດເນື້ອ ແລະຊີວິດໃນພາລະກິດຕໍ່ສູ້ຕ້ານຈັກກະພັດຜູ້ຮຸກຮານ ເພື່ອຍາດເອົາເອກະລາດ ແລະເພື່ອພາລະກິດປົກປັກຮັກສາ ແລະສ້າງສາພັດທະນາປະເທດຊາດໄດ້ນັບມື້ຮຸ່ງເຮືອງສີວິໄລ.

ຕອນບ່າຍວັນທີ 26 ມັງກອນ 2021 ຜູ້ແທນກອງປະຊຸມໃຫຍ່ຄັ້ງທີ VI ຄະນະກໍາມະການແນວລາວສ້າງຊາດແຂວງເຊກອງ ນໍາໂດຍສະຫາຍ ນາງ ບຸນຮຽງ ບຸນຈິດ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ ພ້ອມດ້ວຍຄະນະ ໄດ້ເຂົ້າວາງພວງມາລາຢູ່ອະນຸສາວະລີນັກຮົບນິລະນາມ ເພື່ອຂໍານັບຮັບຕ້ອນກອງປະຊຸມໃຫຍ່ ຄັ້ງທີ VI ຄະນະກໍາມະການແນວລາວສ້າງຊາດແຂວງເຊກອງ ທີ່ຈະຈັດຂຶ້ນໃນວັນທີ 27 ມັງກອນ 2021.

ຫຼັງຈາກນັ້ນ ສະຫາຍ ນາງ ບຸນຮຽງ ບຸນຈິດ ກໍໄດ້ນໍາພາຄະນະຜູ້ແທນເຂົ້າໄປວາງກະຕ່າດອກໄມ້ຢູ່ອະນຸສາວະລີ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ເພື່ອສະແດງຄວາມກະຕັນຍູຮູ້ບຸນຄຸນຕໍ່ການອຸທິດເຫື່ອແຮງ ແລະ ສະຕິປັນຍາຕະຫຼອດຊີວິດຂອງເພິ່ນເຂົ້າໃນພາລະກິດປະຕິວັດ, ນໍາພາປະຊາຊົນລາວບັນດາເຜົ່າຕໍ່ສູ້ຕ້ານກັບຈັກກະພັດຜູ້ຮຸກຮານຈົນສາມາດຍາດໄດ້ໄຊຊະນະຢ່າງສົມບູນ, ລົບລ້າງລະບອບລາຊາທິປະໄຕ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975.

info@lfnd.org.la | 021 213754 | (856-21) 453191