ສູນກາງແນວລາວສ້າງຊາດ

Lao Front For National Development

ຜົນສຳເລັດກອງປະຊຸມໃຫຍ່ ຄັ້ງທີ VII ຜູ້ແທນແນວລາວສ້າງຊາດ ແຂວງສະຫວັນນະເຂດ

ໃນຄັ້ງວັນທີ 26 ມັງກອນ 2021 ນີ້; ທີ່ສະໂມສອນ ແຂວງສະຫວັນນະເຂດ ກອງປະຊຸມໃຫຍ່ຜູ້ແທນແນວລາວສ້າງຊາດແຂວງສະຫວັນນະເຂດ ຄັ້ງທີ VII ໄດ້ເປີດຂຶ້ນ ແລະ ອັດລົງດ້ວຍຜົນສຳເລັດຢ່າງສະຫງ່າຜ່າເຜີຍ ໂດຍການເປັນປະທານຂອງທ່ານ ສົມເພັດ ອິນທະທິລາດ ປະທານແນວລາວສ້າງຊາດແຂວງ. ເຂົ້າຮ່ວມມີທ່ານ ຄຳເຜີຍ ບຸດດາວຽງ ກຳມະການສູນກາງພັກ ຮອງປະທານສູນກາງແນວລາວສ້າງຊາດ,ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍພຣະເຖຣານຸເຖຣະ,ບັນທ່ານຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມພາຍຫຼັງທີ່ທ່ານ ສົມເພັດ ອິນທະທິລາດ ປະທານແນວລາວສ້າງຊາດແຂວງໄດ້ກ່າວເປີກກອງປະຊຸມຢ່າງເປັນທາງການແລ້ວ. ຈາກນັ້ນທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງກໍ່ລາຍງານຄຸນລັກສະນະຜູ້ແທນສົມບູນ ພ້ອມທັງຜ່ານບົດລາຍງານການເມືອງທັງສອງພາກຕໍ່ກອງປະຊຸມໃຫຍ່ຜູ້ແທນແນວລາວສ້າງຊາດແຂວງສະຫວັນນະເຂດ ຄັ້ງທີ VII ໃຫ້ຮູ້ວ່າ: ຕະຫຼອດໄລຍະຊຸມປີຜ່ານມາ ແນວລາວສ້າງຊາດແຂວງສະຫວັນນະເຂດ ໄດ້ຕັ້ງໜ້າປະຕິບັດແນວທາງສາມັກຄີບັນດາເຜົ່າ,ໂດຍການຫັນລົງວຽກງານກໍ່ສ້າງຮາກຖານ ພົບປະຢ້ຽມຢາມປະຊາຊົນຢູ່ຊົນນະບົດ,ເສີມຂະຫຍາຍບົດບາດຜູ້ຊົງຄຸນວຸດທິບັນດາເຜົ່າ ເປັນແບບຢ່າງໃນການສຶກສາອົບຮົມລູກຫຼານ,ສ້າງຄວາມຮັບຮູ້,ອະທິບາຍຊີ້ແຈງໃຫ້ປະຊາຊົນບັນດາເຜົ່າເຂົ້າໃຈ ຕໍ່ແນວທາງນະໂຍບາຍຂອງພັກ,ແຜນພັດທະນາເສດຖະກິດ – ສັງຄົມຂອງລັດ ລວມທັງການສ້າງສາພັດທະນາປະເທດຊາດ ເວົ້າສະເພາະແມ່ນແຂວງສະຫວັນນະເຂດ, ອັນພົ້ນເດັ່ນແມ່ນແນວລາວສ້າງຊາດແຂວງ ໄດ້ເປັນເຈົ້າການປະສານສົມທົບກັບຂະແໜງການທີ່ກ່ຽວຂ້ອງ ນຳເອົາຊື່ເອີ້ນເຜົ່າບຣູ ສະເໜີຕໍ່ສະພາປະຊາຊົນແຂວງ,ເພື່ອນຳສະເໜີຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VII ໄດ້ພິຈາລະນາຮັບຮອງເອົາຢ່າງເປັນທາງການ,ພ້ອມທັງ ລົງຈັດຕັ້ງເຜີຍແຜ່ການຮັບຮອງເອົາຊື່ເອີ້ນເຜົ່າບຣູໃຫ້ບັນດາພະແນກການອ້ອມຂ້າງແຂວງ,ບັນດາເມືອງໃນ 14 ເມືອງ ແລະ ນະຄອນໄກສອນ ພົມວິຫານໄດ້ 38 ຄັ້ງມີຜູ້ເຂົ້າຮ່ວມທັງໝົດ 3.987 ຄົນ,ຍິງ 567 ຄົນ. ຈາກການເຄື່ອນໄຫວດັ່ງກ່າວ ໄດ້ເຮັດໃຫ້ປະຊາຊົນບັນດາເຜົ່າ ມີຄວາມເອກອ້າງທະນົງໃຈ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ,ສ້າງຄວາມສາມັກຄີປອງດອງຢ່າງແໜ້ນແຟ້ນ ໃນທຸກຊົນເຜົ່າ,ດັ່ງມະຕິກອງປະຊຸມໃຫຍ່ຄັ້ງທີ 9 ຂອງພັກ ໄດ້ຢືນຢັນເຖິງຄວາມສຳຄັນຕໍ່ການສ້າງຄວາມສາມັກຄີປອງດອງລະຫວ່າງເຜົ່າ: ເພີ່ມທະວີຄວາມສາມັກຄີປອງດອງລະຫວ່າງເຜົ່າ,ຊັ້ນຄົຍ,ສາສະໜາ,ເພດໄວ ແລະ ການກໍ່ສ້າງກ້ອນກຳລັງສາມັກຄີອ້ອມຂ້າງພັກ,ແມ່ນຄວາມສຳຄັນຕັດສິນຕໍ່ໄຊຊະນະ ອັນສົມບູນຕໍ່ການປະຕິວັດຊາດ ປະຊາທິປະໄຕ ກໍ່ຄືຕໍ່ຄວາມໝັ້ນຄົງ ແລະ ການພັດທະນາທີ່ຍືນຍົງຂອງຊາດເຮົາ.

ໃນ 5 ປີຕໍ່​ໜ້າ ແນວລາວສ້າງຊາດແຂວງສະຫວັນນະເຂດ ແຜນໄດ້​ວາງທະສາດ ການພັດທະນາວຽກງານ 2021 – 2025 ປະກອບມີ 6 ແຜນງານຄື: ສຶກສາອົບຮົມ ເຕົ້າໂຮມຄວາມສາມັກຄີປອງດອງທົ່ວປວງຊົນພາຍໃນແຂວງ,ເປັນໃຈກາງ​ປະສານສົມທົບກັບອົງການຈັດຕັ້ງພາຄີ ປຸກລະດົມຂະບວນການແຂ່ງຂັນຮັກຊາດ ແລະ ພັດທະນາຕາມທິດສາມສ້າງ,ສ້າງຄວາມເຂັ້ມແຂງໃຫ້ອົງການແນວລາວສ້າງຊາດແຂວງ,ເພີ່ມທະວີບົດບາດຂອງອົງການແນວລາວສ້າງຊາດ ກັບປະຊາຊົນ,ເສີມຂະຫຍາຍສິດເປັນເຈົ້າປະຊາຊົນ ປົກປັກຮັກສາຮີດຄອງປະເພນີອັນດີງາມຂອງຊາດ ແລະ ບັນດາເຜົ່າ,ພົວພັນຮ່ວມມືກັບຕ່າງປະເທດ.

ກອງປະຊຸມຄັ້ງປະຖົມມະລຶກ ກໍ່ໄດ້ຄັດເລືອກເອົາເປົ້າໝາຍຜູ້ທີ່ສະໝັກເຂົ້າເປັນກຳມະການແນວລາວສ້າງຊາດແຂວງ ຊຶ່ງເປັນຕົວແທນໃຫ້ແກ່ອົງການຈັດຕັ້ງພັກ,ອົງການຈັດຕັ້ງມະຫາຊົນ,ປກຊ,ບັນດາພະແນກການອ້ອມຂ້າງແຂວງ,ຕົວແທນຊັ້ນຄົນບັນດາເຜົ່າ,ສາສະໜາ,ເພດ-ໄວໃນທົ່ວແຂວງ ຈຳນວນ 98 ທ່ານ,ຍິງ 18 ທ່ານ,ພຣະສົງ 15 ອົງ ເຊິ່ງປະກອບດ້ວຍຜູ້ເກົ່າ ແລະ ຜູ້ໃໝ່ໃນນີ້ໄດ້ເລືອກເອົາຄະນະປະຈຳ ຈຳນວນ 7 ທ່ານ ແລະ ໄດ້ຕົກລົງເຫັນດີເລືອກເອົາທ່ານ ຄຳແພງ ເພັດທຸມພອນ ກຳມະການປະຈຳພັກແຂວງ ເປັນປະທານແນວລາວສ້າງຊາດແຂວງ,ເລືອກເອົາທ່ານ ສິນໄຊ ວົງລະຄອນ, ທ່ານ ຄຳຕຸ່ນ ສົມສະນິດ,ທ່ານ ແກ້ວມະນີວອນ ຕານລະມະນີ ເປັນຮອງປະທານແນວລາວສ້າງຊາດແຂວງ,ທ່ານ ພັນມະຫາ ສຸລິຍະ,ທ່ານ ນາງ ແສງລະຄອນຄຳ ວໍລະສິນ,ທ່ານ ສຸກດາໄລ ໄຊຍະວົງສາ ເປັນຄະນະປະຈຳ ແລະ ອີກ 91 ທ່ານ,ຍິງ 17 ທ່ານ,ພຣະສົງ 15 ອົງ ເປັນກຳມະການແນວລາວສ້າງຊາດແຂວງ. ນອກນີ້ກອງປະຊຸມຍັງໄດ້ເລືອກເອົາປະທານ,ຮອງປະທານກວດກາຕື່ມອີກຈຳນວນ 5 ທ່ານ ຄື: ທ່ານ ແກ້ວມະນີວອນ ຕານລະມະນີ ປະທານກວດກາ,ທ່ານ ນາງ ພອນເພັດ ເທບບູລີ,ທ່ານ ຈັນລະຄອນ ນິນທາ,ທ່ານ ສຸກກະເສມ ບຸດຕະເວດ,ທ່ານ ພັທ ສຸລິ ດວງປັນຍາ ເປັນຮອງປະທານກວດກາ.

ໃນ​ກອງ​ປະ​ຊຸມ​ຄັ້ງ​ນີ້ ໄດ້​ປະ​ດັບ​ໄຊ​ອິດ​ສະ​ຫຼະ, ຫຼຽນ​ໄຊ​ແຮງ​ງານ, ຫຼຽນ​ກາ​ແຮງ​ງານ ຈຳ​ນວນ 48 ໜ່ວຍ ແລະ ມອບ​ໃບ​ຍ້ອງ​ຍໍ​ຂອງ​ສູນ​ກາງ​ແນວ​ລາວ​ສ້າງ​ຊາດ, ໃບ​ຍ້ອງ​ຍໍ​ທ່ານເຈົ້າ​ແຂວງ​ຈຳ​ນວນ 17 ໃບ; ໂດຍ​ແມ່ນ​ທ່ານ​ຮອງ​ປະ​ທານ​ສູນ​ກາງ​ແນວ​ລາວ​ສ້າງ​ຊາດ ແລະ ທ່ານ​ເຈົ້າ​ແຂວງ​ສະ​ຫວັນ​ນະ​ເຂດ​ ເປັນ​ຜູ້ມອບ ໃຫ້​ແກ່​ຜູ້​ທີ່​ມີ​ຜົນ​ງານ​ດີ​ເດັ່ນ​ໃນ​ການ​ເຄື່ອນ​ໄຫວ​ວຽກ​ງານ​ແນວ​ລາວ​ສ້າງ​ຊາດ​ຕະ​ຫລອດ​ໄລ​ຍະ 5 ປີ​ທີ່​ຜ່ານ​ມາ.

 

 

info@lfnd.org.la | 021 213754 | (856-21) 453191