ສູນກາງແນວລາວສ້າງຊາດ

Lao Front For National Development

ຜົນສໍາເລັດກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 3 ສະໄໝທີ XI

       ກອງ​ປະຊຸມ​ສາມັນ​ຄົບ​ຄະນະ​ກຳມະການ​ສູນ​ກາງ​ແນວ​ລາວ​ສ້າງ​ຊາດ​ຄັ້ງ​ທີ 3 ສະໄໝ​ທີ XI ໄດ້ອັດລົງດ້ວຍຜົນສໍາເລັດອັນຈົບງາມ ໃນວັນທີ 11 ມັງກອນນີ້ ທີ່ສູນກາງແນວລາວສ້າງຊາດ ພາຍຫລັງດໍາເນີນມາເປັນເວລາ 2 ວັນ ໂດຍ​ການ​ເປັນ​ປະທານ​ຂອງ ທ່ານ ສິນລະວົງ ຄຸດໄພທູນ ກຳມະການ​ກົມ​ການເມືອງ​ສູນ​ກາງ​ພັກ ປະທານ​ສູນ​ກາງ​ແນວ​ລາວ​ສ້າງ​ຊາດ, ມີ​ພະ​ເຖລານຸ​ເຖລະ, ບັນດາທ່ານ​ຮອງ​ປະທານ​​ສູນ​ກາງ​ແນວ​ລາວ​ສ້າງ​ຊາດ, ປະທານ​ແນວ​ລາວ​ສ້າງ​ຊາດ​ແຂວງ-ນະ ຄອນຫຼວງ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ກໍາມະການສູນກາງແນວລາວສ້າງຊາດຢູ່ຕ່າງປະ ເທດ, ຄະນະທີ່ປຶກສາ ແລະ ຄູ່ຮ່ວມງານ ພ້ອມດ້ວຍແຂກ​ຖືກ​ເຊີນ​ເຂົ້າ​ຮ່ວມ; ເຊິ່ງກອງປະຊຸມຄັ້ງນີ້ ໄດ້ຈັດເປັນສອງຮູບແບບຄື: ຮູບແບບປົກກະຕິຢູ່ນະຄອນຫຼວງວຽງຈັນ ແລະ ຮູບແບບວີດີໂອທາງໄກຢູ່ບັນດາແຂວງທົ່ວປະເທດ.
      ກອງປະຊຸມຄັ້ງນີ້ຜູ້ເຂົ້າຮ່ວມໄດ້ພ້ອມກັນຮັບຟັງບັນດາເນື້ອໃນຂອງກອງປະຊຸມ ແລະ ສຸມໃສ່ປະກອບຄໍາຄິດ ຄໍາເຫັນດ້ວຍຄວາມຮັບຜິດຊອບສູງ ກົງໄປກົງມາຕໍ່ບົດສະຫຼຸບການຈັດຕັ້ງປະຕິບັດມະຕິກອງປະຊຸມສາມັນຄົບຄະນະກໍາມະການ ສນຊ ຄັ້ງທີ 2; ແຜນພັດທະນາອົງການແນວລາວສ້າງຊາດ ປະຈໍາປີ 2023 ແລະ ແຜນວຽກຈຸດສຸມປີ 2024 ພ້ອມກັນນັ້ນ, ຮັບຟັງລາຍງານຜົນການຈັດຕັ້ງປະຕິບັດ ວຽກງານເສີມຂະຫຍາຍປະຊາທິປະໄຕ, ສິດເປັນເຈົ້າ ແລະ ປົກປ້ອງຜົນປະໂຫຍດຂອງປະຊາຊົນ ຊັ້ນຄົນຕ່າງໆ ແລະ ວຽກງານຕິດຕາມ ແລະ ໃຫ້ຄໍາປຶກສາດ້ານກົດໝາຍ ໃຫ້ແກ່ປະຊາ ຊົນ; ຮັບຟັງລາຍງານ ຜົນການປະເມີນການຈັດຕັ້ງປະຕິບັດບັນດາມະຕິຕົກລົງຂອງຄະນະປະຈໍາ ສນຊ ແບບກວມລວມ ຂອງຄະນະກວດກາ ສນຊ; ການປະເມີນການຈັດຕັ້ງປະຕິບັດມະຕິ 55/ຄປຈ ກ່ຽວກັບວຽກງານການສ້າງລາຍຮັບເພີ່ມ ຂອງແນວລາວສ້າງຊາດ; ເຊື່ອມຊືມ ແລະ ຜັນຂະ ຫຍາຍມະຕິຂອງສູນກາງພັກ ກ່ຽວກັບຄໍາແນະນໍາ 05/ຄບສພ ແລະ ແຜນພັດທະນາຂອງລັດຖະບານ ແລະ ບົດລາຍງານການປະເມີນການຈັດຕັ້ງງປະຕິບັດສອງວາລະແຫ່ງຊາດ. ຄຽງຄູ່ກັນນັ້ນ, ໄດ້ຮັບຟັງບັນດາທ່ານກໍາມະການສູນກາງແນວລາວສ້າງຊາດ ທີ່ເປັນຕົວແທນຈາກອົງການຈັດຕັ້ງພາຄີ ຂອງແນວລາວສ້າງຊາດ, ບັນດາທ່ານກໍາມະການສູນກາງແນວລາວສ້າງຊາດທີ່ຢູ່ຕ່າງປະເທດ; ບັນດາທ່ານປະທານແນວລາວສ້າງຊາດແຂວງ, ຄະນະທີ່ປຶກສາ ແລະ ຄູ່ຮ່ວມງານ ກໍ່ຄື ທ່ານຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ໄດ້ປະກອບຄໍາເຫັນຕາມການເຈາະຈິ້ມຂອງປະທານກອງປະຊຸມຕື່ມອີກ; ພ້ອມທັງໄດ້ມີການພິຈາລະນາຮັບຮອງເອົາບຸກຄາລະກອນ ເພື່ອປະ ກອບເຂົ້າໃນຄະນະກໍາມະການສູນກາງແນວລາວສ້າງຊາດ ເພີ່ມເຕີມ ແລະ ປ່ຽນແທນຈໍານວນໜຶ່ງ.
      ໃນໂອກາດປິດກອງປະຊຸມຄັ້ງນີ້ ທ່ານປະທານສູນກາງແນວລາວສ້າງຊາດໄດ້ມີຄໍາເຫັນຕໍ່ກອງປະຊຸມໃນຄັ້ງນີ້ວ່າ: ບົນພື້ນຖານຜົນງານທີແນວລາວສ້າງຊາດເຮົາຍາດມາໄດ້ໃນໄລຍະຜ່ານມາ ແລະ ເພື່ອສືບຕໍ່ຄໍາຂວັນກວມລວມຂອງກອງປະຊຸມໃຫຍ່ຄັ້ງທີ XI ທີ່ວ່າ: ເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກໍາລັງແຮງຂອງປະຊາຊົນທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ-ສ້າງ ສາປະເທດຊາດ ແລະ ຈັດຕັ້ງປະຕິບັດກອງປະຊຸມໃຫຍ່ຄັ້ງທີ່ XI ຂອງພັກໃຫ້ບັນ ລຸເປັນຈິງ ໃນໄລຍະທ້າຍສະໄໝ, ໂດຍສະເພາະໄລຍະປີ 2024 ນັ້ນ, ທ່ານປະທານສູນກາງແນວລາວສ້າງຊາດໄດ້ເນັ້ນບາງບັນ ຫາຄື: ພະຍາຍາຍາມໃນລະດັບສູງເພື່ອຂະຫຍາຍ 4 ການຫັນປ່ຽນ ຕາມມະຕິ XI ໃຫ້ກ້າວສູ່ລວງເລິກ ແລະ ເປັນອັນລະອຽດຕາມຂັັ້ນຂອງອົງການແນວລາວສ້າງຊາດ ຊຶ່ງອົງການແນວລາວສ້າງຊາດຂັ້ນໃດ ບໍ່ທັນໄດ້ກຳນົດແຜນດຳເນີນງານຂອງຕົນ ກໍໃຫ້ຮີບຮ້ອນກຳນົດ ແລະ ແບ່ງງານຈັດຕັ້ງປະຕິບັດ; ໃຫ້ຜັນຂະຫຍາຍ 6 ແຜນວຽກພື້ນຖານສໍາຄັນຂອງມະຕິ XI ກໍຄື 6 ແຜນວຽກຈຸດສຸມ ປີ 2024 ໃຫ້ກາຍເປັນການກະທຳຕົວຈິງຂອງແຕ່ລະພາກສ່ວນ ແລະ ແຕ່ລະທ່ານ ຄື: ແຜນວຽກເສີມສ້າງຄວາມສາມັກຄີເປັນປຶກແຜ່ນຂອງປວງຊົນລາວທັງຊາດດ້ວຍ 4 ເສົ້າຄໍ້າ ແລະ 4 ເສີມສ້າງ, ໃນນີ້ເນັ້ນໜັກແກ້ໄຂບັນຫາ ແລະ ເສີມສ້າງຄຸນນະທຳ, ອະລິຍະທຳຂອງທຸກສາສະໜາໃນສັງຄົມປັດຈຸບັນເປັນວຽກບູລິມະສິດ; ຝຶກອົບຮົມ ແລະ ແຜນວຽກສຶກສາອົບຮົມ, ປຸກລະດົມຂົນຂວາຍປະຊາຊົນຊັ້ນຄົນຕ່າງໆໃຫ້ເຂົ້າຮ່ວມຂະບວນການພັດທະນາປະເທດຊາດ ແລະ ທ້ອງຖິ່ນຂອງຕົນ, ບົນຈິດໃຈຟົດຟື້ນ, ສຳລັບອົງການພວກເຮົາມີ 9 ຂໍ້ “ແຂ່ງຂັນຮັກຊາດ ແລະ ພັດທະນາ”; ແຜນວຽກເສີມຂະຫຍາຍປະຊາທິປະໄຕ ເພື່ອເສີມສ້າງສິດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະ ປົກປ້ອງຜົນປະໂຫຍດຂອງປະຊາຊົນຊັ້ນຄົນຕ່າງໆ (ເປັນສຳຄັນ); ເພີ່ມທະວີການຮ່ວມສຳພັນກັບອົງການພາຄີ ແລະ ການຮ່ວມມືກັບພາກສ່ວນຕ່າງໆ; ເສີມສ້າງຄວາມສາມັກຄີສາກົນ ແລະ ເປີດກວ້າງການພົວພັນການທູດປະຊາຊົນ; ຍູ້ແຮງແຜນວຽກປັບປຸງແບບແຜນການເຄື່ອນໄຫວ ແລະ ສ້າງຄວາມເຂັ້ມແຂງໃຫ້ອົງການແນວລາວສ້າງຊາດ; ພ້ອມດຽວກັນນັ້ນ, ໃຫ້ຮີບຮ້ອນຜັນຂະຫຍາຍຈັດສັນແຫຼ່ງທຶນເພື່ອປະຕິບັດແຜນງານ ແລະ ບັນດາໂຄງການທີ່ໄດ້ກຳນົດໄວ້ເປັນຕົ້ນແມ່ນໂຄງການທີ່ປະຊາຊົນຮຽກຮ້ອງຕ້ອງການເລັ່ງດ່ວນໃຫ້ຈັດເປັນບູລິມະສິດ, ສ່ວນໂຄງການ ໃດບໍ່ມີງົບປະມານຂອງລັດ ຕ້ອງໄດ້ປຸກລະດົມສັງຄົມເພື່ອຊ່ວຍໜູນ; ເພີ່ມທະວີການຄົ້ນຄວ້ານະໂຍບາຍໃຫ້ຂົງເຂດແນວໂຮມ ແລະ ກະກຽມກອງປະຊຸມໃຫຍ່ແນວລາວ ສ້າງຊາດຂັ້ນຕ່າງໆໃຫ້ສຳເລັດ ປີ 2025, ສໍາລັບ ໃນວຽກງານແນວໂຮມພວກເຮົາຕ້ອງໄດ້ເພີ່ມທະວີການສ້າງການຫັນປ່ຽນຕາມແນວທາງການປ່ຽນແປງໃໝ່ຂອງພັກ ຊຶ່ງໃນນັ້ນຄວນປັບປຸງພາລະບົດບາດຈຳນວນໜຶ່ງ ແລະ ກົດໝາຍບາງມາດຕາໃຫ້ທຽບທັນກັບສະພາບການໃໝ່; ສືບຕໍ່ເພີ່ມທະວີການເຄື່ອນໄຫວດ້ານການທູດປະຊາຊົນ, ການຮ່ວມມືສາກົນ, ການຮ່ວມມືກັບອົງການຕ່າງໆ ເພື່ອພ້ອມກັນກະກຽມຂ່ຳນັບຮັບຕ້ອນສະເຫຼີມສະຫຼອງວັນສ້າງຕັ້ງ ສປປ ລາວ ຄົບຮອບ 50 ປີ, ວັນສ້າງຕັ້ງແນວລາວສ້າງຊາດຄົບຮອບ 75 ປີ (ໃນປີ 2025) ແລະ ສໍາລັບໃນທ້າຍປີນີ້ ສົມທົບຄະນະພົວພັນຄົນເຊື້ອຊາດຢູ່ຕ່າງປະເທດ ແລະ ພາກສ່ວນກ່ຽວຂ້ອງ ກະກຽມກອງປະຊຸມພົບປະພີ່ນ້ອງຄົນລາວຢູ່ຕ່າງປະເທດ ຄັ້ງທີ I ແລະ ກອງປະຊຸມສາກົນຕ່າງໆທີ່ພວກເຮົາ ເປັນເຈົ້າພາບໃຫ້ມີຜົນສຳເລັດເປັນຢ່າງດີ.
  
info@lfnd.org.la | 021 213754 | (856-21) 453191