ທ່ານ ນາງ ຄຳຈັນ ພົມແສງສະຫວັນ ໄດ້ກ່າວບາງຕອນໃນພິທີປິດ ວ່າ: ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ທີ່ເອົາໃຈໃສ່ເຮັດໃຫ້ກອງປະຊຸມຄັ້ງນີ້ມີຜົນສໍາເລັດ; ພ້ອມທັງໄດ້ເນັ້ນບາງບັນຫາ ດັ່ງນີ້: ໃນຍຸກເສດຖະກິດຕະຫຼາດ, ຍຸໂລກາວິວັດ, ຍຸກສັງຄົມອອນລາຍ ການເຄື່ອນໄຫວຂອງພະສົງສໍາມະເນນ ຄວນມີການລະມັດລະວັງຂຶ້ນຕື່ມ ໂດຍສະເພາະການແຊຂໍ້ມູນຕ່າງໆ ທີ່ມີລັກສະນະບໍ່ຈະແຈ້ງ ແລະ ອື່ນໆ, ການນໍາໃຊ້ໂທລະສັບຕ່າງໆກໍ່ຄວນຄໍານຶງເຖິງຄວາມເໜາະສົມ ເພື່ອບໍ່ໃຫ້ຕົກໃນທ່າຮັບການໂຈມຕີຂອງກຸ່ມຄົນບໍ່ຫັວງດີ; ໃນນີ້, ຄວນມີການພົວພັນກັນຢ່າງໃກ້ຊິດລະຫວ່າງບ້ານກັບວັດ, ພະສົງກັບອົງການປົກຄອງ, ແນວໂຮມບ້ານ, ຜູ້ຊົງຄຸນວຸດທິ ເພີ່ມທະວີຄວາມສາມັກຄີ ພ້ອມກັນສ້າງສາພັດທະນາ ເພື່ອຄວາມຈົບງາມຂອງບ້ານເມືອງ ແລະ ພ້ອມກັນແກ້ໄຂບັນຫາເລັກໆນ້ອຍໆທີ່ເກີດຂຶ້ນພາຍໃນວັດໃຫ້ຕົກໄປ; ພ້ອມນັ້ນ, ການຄຸ້ມຄອງສາສະໜາວັດຖຸ, ສາສະໜາສົມບັດ, ການຄຸ້ມຄອງເງິນຂອງວັດທີ່ປະຊາຊົນຮ່ວມກັນບໍລິຈາກໃຫ້ມີຄວາໂປ່ງໃສ ແລະ ນໍາໃຊ້ໃຫ້ຖືກເປົ້າໝາຍ, ກໍ່ສ້າງວັດວາອາຮາມ ຕ້ອງມີຄະນະກໍາມະການຮັບຜິດຊອບຄຸ້ມຄອງລາຍຮັບ, ລາຍຈ່າຍ ເພື່ອບໍ່ຫ້ມີບັນຫາພາຍຫຼັງ ຫຼີກລ້ຽງການນໍາໃຊ້ວັດວາອາຮາມເປັນສະຖານທີ່ ເຄື່ອນໄຫວບໍ່ຖືກຕ້ອງ ແລະ ບໍ່ສອດຄ່ອງກັບພະທໍາມະວິໄນ ແລະ ລະບຽບກົດໝາຍບ້ານເມືອງ ເຊິ່ງຈະພາໃຫ້ເສື່ອມສັດທາ ແລະ ຄວາມເຊື່ອຖື ຂອງປະຊາຊົນບັນດາເຜົ່າ ແລະ ເປັນຊ່ອງຫວ່າງໃຫ້ອິດທິກໍາລັງປໍລະປັກໃສ່ຮ້າຍປ້າຍສີ; ພ້ອມດຽວ ກັນນີ້, ໃນເງື່ອນໄຂປະເທດຊາດພົບຄວາມຫຸຍ້ງຍາກທາງດ້ານເສດຖະກິດ-ການເງິນ ເຊິ່ງສົ່ງຜົນກະທົບຕໍ່ການດໍາລົງຊີວິດຂອງປະຊາຊົນລາວບັນດາເຜົ່າ; ສະນັ້ນ, ຈຶ່ງຮຽກຮ້ອງໃຫ້ບັນດາພະອາຈານ ຊ່ວຍນໍາເອົາ 2 ວາລະແຫ່ງຊາດ ຂອງລັດຖະ ບານຄື: ວາລະແຫ່ງຊາດວ່າດ້ວຍການແກ້ໄຂຄວາມຫຸຍ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍບັນຫາຢາເສບຕິດ ໄປເທສະໜາໃຫ້ປະຊາຊົນຮັບຮູ້ເຂົ້າໃຈເປັນເອກະພາບ, ເພີ່ມທະວີຄວາມສາມັກຄີ ເພື່ອຕໍ່ສູ້ຜ່ານຜ່າຄວາມຫຸຍ້ງຍາກດັ່ງກ່າວ; ນອກຈາກນັ້ນ, ຈົ່ງຊ່ວຍກັນປົກປັກຮັກສາສາໜາສະຖານ, ການເຄື່ອນໄຫວທາງສາສະໜາໃຫ້ມີຄວາມເປັນລະບຽບ, ສ່ອດຄ່ອງກັບລໍາດັດ 315/ລບ ຂອງລັດຖະບານ ທັງມີສະຕິຕໍ່ກຸ່ມຄົນບໍ່ຫັວງດີ ທີ່ສວຍໃຊ້ສາສະໜາ ເພື່ອເຄື່ອນໄຫວແບ່ງແຍກຄວາມສາມັກຄີພາຍໃນ, ນໍາເອົາສາສະໜາອື່ນໆ ມາເຜີຍແຜ່ແບບບໍ່ຖືກຕ້ອງ ແລະ ບໍ່ໄດ້ຮັບອະນຸຍາດຢ່າງເປັນທາງການ;

      ໃນວາລະພິທີປິດກອງປະຊຸມ, ໄດ້ມອບໃບຢັ້ງຢືນການສໍາເລັດຊຸດຝຶກອົບຮົມ ໃນຄັ້ງນີ້ໃຫ້ ອພສ ນະຄອນຫຼວງ ແລະ ອພສ 9 ຕົວເມືອງ ພາຍໃນນະຄອນຫຼວງວຽງຈັນ ແລະ ມອບໃບຂອບໃຈ ໃຫ້ບັນດາເຈົ້າສັດທາທັງຫຼາຍ ທີ່ໄດ້ປະ ກອບສ່ວນອຸປະຖໍາກອງປະຊຸມຕື່ມອີກ; ກອງປະຊຸມໄດ້ດໍາເນີນລະຫວ່າງ ວັນທີ 24-25 ຕຸລາ 2023 ໄດ້ອັດລົງດ້ວຍຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້;

ພາບ: ຄໍາຜາຍ

ຂ່າວ:ແສງຫລ້າ

ບກ. ຈິດຕະພົງ