ສູນກາງແນວລາວສ້າງຊາດ

Lao Front For National Development

ຜົນສໍາເລັດຂອງທ່ານ ຮອງປະທານ ສນຊ ລົງຊຸກຍູ້ຂະບວນການກະກຽມກອງປະຊຸມຜູ້ຊົງຄຸນວຸດທິບັນດາຊົນເຜົ່າ ຢູ່ 3ແຂວງພາກກາງ

ເນື່ອງໃນໂອກາດທີ່ວັນສ້າງຕັ້ງແນວລາວສ້າງຊາດ ວັນທີ 13/8/1950-13/8/2018 ຄົບຮອບ 68 ປີ ທ່ານ ນາງ ຍອດແກ້ວມະ ນີ ສຸພານຸວົງ ຮອງປະທານສູນກາງແນວລາວສ້າງຊາດ (ສນຊ) ລົງພົບປະຊຸກຍູ້ຂະບວນການກະກຽມກອງປະຊຸມພົບປະຜູ້ຊົງຄຸນ ວຸດທິບັນດາຊົນເຜົ່າ 3 ແຂວງພາກກາງ ສະຫວັນນະເຂດ; ຄໍາມ່ວນ ແລະ ບໍລິຄໍາໄຊ ໃນລະຫວ່າງວັນທີ 30 ກໍລະກົດ ຫາ ວັນທີ 3 ສິງຫາ 2018 ນີ້, ໂດຍມີບັນດາທ່ານປະທານ-ຮອງປະທານແນວລາວສ້າງຊາດແຂວງ, ກໍາມະການສູນກາງແນວລາວສ້າງຊາດອ້ອມຂ້າງແຂວງ, ຜູ້ຊົງຄຸນວຸດທິບັນດາຊົນເຜົ່າ, ພະນັກງານແນວລາວສ້າງຊາດບັນດາແຂວງດັ່ງກ່າວ ແລະ ອົງການຈັດຕັ້ງມະ ຫາຊົນເຂົ້າຮ່ວມ.

ທ່ານ ຮອງປະທານ ສນຊ ກໍ່ໄດ້ພົບປະແລກປ່ຽນຄວາມຄິດເຫັນນໍາບັນດາທ່ານເລຂາພັກແຂວງ, ເຈົ້າແຂວງ 3 ແຂວງດັ່ງກ່າວໂດຍແມ່ນ ທ່ານ ສັນຕິພາບ ພົມວິຫານ ກໍາມະການສູນກາງພັກ ເຈົ້າແຂວງໆສະຫວັນນະເຂດ, ທ່ານ ໂອໄດ ສຸດາພອນ ກໍາມະການສູນກາງພັກ ເຈົ້າແຂວງໆຄໍາມ່ວນ ແລະ ທ່ານ ກອງແກ້ວ ໄຊສົງຄາມ ກໍາມະການສູນກາງພັກ ເຈົ້າແຂວງບໍລິຄໍາໄຊ. ທ່ານປະທານແນວລາວສ້າງຊາດແຂວງ ໄດ້ລາຍງານສະພາບການເຄື່ອນໄຫວຂອງແຂວງໃຫ້ທ່ານຮອງປະທານ ສນຊ ຮັບຊາບວ່າ: ໂດຍປະຕິບັດຕາມພາລະບົດບາດຂອງແນວລາວສ້າງຊາດແລ້ວຍາມໃດ ກໍ່ໄດ້ຖືວຽກງານສຶກສາອົບຮົມການເມືອງ-ແນວຄິດ, ການເຕົ້າໂຮມຄວາມສາມັກຄີປອງດອງປະຊາຊົນລາວບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ເປັນໜ້າທີ່ຕົ້ນຕໍ ແລະ ຖືສໍາຄັນ, ປັດຈຸບັນແນວລາວສ້າງຊາດຂອງພວກເຮົາແມ່ນສຸມໃສ່ໃຫ້ການຊ່ວຍເຫຼືອປະຊາຊົນລາວບັນດາເຜົ່າທີ່ຖືກຜົນກະທົບຈາກໄພພິບັດນໍ້າຖວ້ມເປັນຕົ້ນຕໍ.

ໃນໂອກາດພົບປະໂອ້ລົມ ທ່ານ ນ. ຍອດແກ້ວມະນີ ສຸພານຸວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງແນວລາວສ້າງຊາດແຂວງ ພ້ອມກັນນີ້, ທ່ານຍັງໄດ້ແຈ້ງຈຸດປະສົງໃນການລົງມາເຄື່ອນໄຫວ ແລະ ພົບປະຄັ້ງນີ້ແມ່ນ ເພື່ອການກະກຽມ ແລະ ດໍາເນີນກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດ ຄັ້ງທີ III ປີ 2018 ຕິດພັນກັບຂະບວນການຕ່າງໆຢູ່ປະເທດເຮົາ ເປັນຄວາມຮັບຜິດຊອບຂອງທົ່ວປວງຊົນ ແລະ ເປັນຂະບວນການຢ່າງຟົດຟື້ນຂອງທົ່ວສັງ ຄົມ ຕິດພັນກັບການປົກປັກຮັກສາ ແລະ ສ້າງສາພັດທະນາປະເທດຊາດ, ເພື່ອເຮັດໃຫ້ການໂຄສະນາ, ປຸກລະດົມຂະບວນ ການ ໃນການສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ຄົບຮອບ 68 ປີ ຊີ່ງເປັນຂະບວນໜຶ່ງທີ່ມີຄວາມສໍາຄັນໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ມະຕິກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ X, ເພື່ອຮັບປະກັນຄວາມຕື່ນຕົວເຂົ້າຮ່ວມຂອງທຸກອົງການຈັດຕັ້ງ ແລະ ປະຊາຊົນລາວບັນດາເຜົ່າ ບົນພື້ນຖານ ການເຊີດຊູສະຕິຊາດອັນໜຶ່ງອັນດຽວ, ຄວາມສາມັກຄີປອງ ດອງ, ເສີມຂະຫຍາຍ ປະຊາທິປະໄຕ ປະຊາຊົນ ພາຍໃຕ້ການນໍາຂອງພັກ ແລະ ການຄຸ້ມຄອງຂອງລັດ. ໃນໂອກາດນີ້, ທ່ານ ນ. ຍອດແກ້ວມະນີ ສຸພານຸວົງ ໄດ້ນໍາພາຄະນະໄປວາງກະຕ໋າດອກໄມ້ທີ່ສວນ 21 ມີນາ ປະທານ ສຸພານຸວົງ ທີ່ ແຂວງ ຄໍາມ່ວນ ນອກຈາກນັ້ນ, ທ່ານ ພ້ອມດ້ວຍຄະນະນໍາຂອງແຂວງຄໍາມ່ວນ ແລະ ບໍລິຄໍາໄຊ ຍັງໄດ້ນໍາເອົານໍ້າດື່ມຈໍານວນ 100 ແພັດ; ໝີ ຈໍານວນ 10 ແກັດໃຫຍ່ ລວມມູນຄ່າ 3.900,000 ກີບ ໄປມອບໃຫ້ປະຊາຊົນທີ່ຖືກນໍ້າຖ້ວມ ທີ່ບ້ານ ດັງທາ ເມືອງ ເຊບັງໄຟ ແລະ ບ້ານ ນາໂຊກ ເມືອງຍົນມະລາດ ແຂວງຄໍາມ່ວນ ແລະ ຍັງໄດ້ນໍາເຄື່ອງນຸ່ງ ແລະ ເຄື່ອງບໍລິໂພກ ຈໍານວນໜຶ່ງໄປມອບໃຫ້ແກ່ປະຊາຊົນທີ່ຖືກໄພນໍ້າຖ້ວມ ທີ່ບ້ານ: ຫ້ວຍນໍ້າເລິກ, ບ້ານພະບາດ ເມືອງທ່າພະບາດ ແຂວງບໍລິຄໍາໄຊ ລວມມູນຄ່າ ທັງ ໝົດ 17, 100,000 ກີບ ແລະ ຈາກນັ້ນ, ທ່ານ ຍັງໄດ້ໄປຢ້ຽມຢາມຄອບຄົວຕົວແບບໃນການລ້ຽງກົບ, ລ້ຽງປາຂອງແຂວງບໍລິຄໍາໄຊຕື່ມອິກ.

info@lfnd.org.la | 021 213754 | (856-21) 453191