ໂດຍປະຕິບັດຕາມ ແນວທາງນະໂຍບາຍຂອງພັກ-ລັດຕໍ່ພະນັກງານການນໍາທີ່ຮອດອາຍຸກະສຽນພັກຜ່ອນບໍານານ ສະນັ້ນ, ໃນວັນທີ 22 ເມສາ 2022 ນີ້ ຄະນະນໍາສູນກາງແນວລາວສ້າງຊາດ(ສນຊ) ໄດ້ຈັດພິທີປະກາດ ສະຫາຍ ນາງ ຄໍາຈັນ ພົມແສງສະຫວັນ ຄະນະປະຈຳພັກ, ຮອງປະທານສູນກາງແນວລາວສ້າງຊາດ ອອກພັກການ-ຮັບອຸດໜູນບຳນານ ເຊິ່ງພິທີດັ່ງກ່າວໄດ້ຈັດຂຶ້ນທີ່ສູນຝຶກອົບຮົມ ສູນກາງແນວລາວສ້າງຊາດ; ໂດຍເປັນກຽດເຂົ້າຮ່ວມ ຂອງສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ເລຂາຄະນະພັກ, ປະທານສູນກາງແນວລາວສ້າງຊາດ, ມີບັນດາສະຫາຍ ຄະນະປະຈຳພັກ, ຄະນະພັກ, ຮອງປະທານປະຈໍາການ ແລະບໍ່ປະຈໍາການ ຂອງສູນກາງແນວລາວສ້າງຊາດ, ຫົວໜ້າ-ຮອງຫົວໜ້າຫ້ອງການ, ບັນດາກົມ ແລະ ສູນຝຶກອົບຮົມ ພ້ອມດ້ວຍພະນັກງານທີ່ກ່ຽວຂ້ອງຂອງ ສນຊ ເຂົ້າຮ່ວມ.

ສະຫາຍ ຄໍາຢາດ ລາດຊະດາວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ ສນຊ ໄດ້ຂຶ້ນອ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ-ຮັບອຸດໜູນບຳນານ ສະບັບເລກທີ 275/ຄລສພ ລົງວັນທີ 31/12/2021; ຈາກນັ້ນ, ສະຫາຍເລຂາຄະນະພັກ ໄດ້ມອບມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ-ຮັບອຸດໜູນບຳນານ ໃຫ້ ສະຫາຍ ນາງ ຄໍາຈັນ ພົມແສງສະຫວັນ ແລະ ນະໂຍບາຍຈໍານວນໜຶ່ງ.

ໃນໂອກາດທີ່ມີຄວາມໝາຍສໍາຄັນນີ້ ສະຫາຍເລຂາຄະນະພັກ ໄດ້ສະແດງຄວາມຍ້ອງຍໍຊົມເຊີຍຕໍ່ສະຫາຍ ນາງ ຄຳຈັນ ພົມແສງສະຫວັນ ທີ່ໄດ້ປະກອບສ່ວນອຸທິດຕົນເຂົ້າໃນພາລະກິດປະຕິວັດຊາດເປັນເວລາ 55 ປີ ນັບແຕ່ປີ 1966 ເປັນຕົ້ນມາ ແລະໄດ້ປະກອບສ່ວນໃນຫຼາຍຂົງເຂດວຽກງານ ຂອງພັກ-ລັດ ແລະ ແນວລາວສ້າງຊາດ ຕະຫຼອດໄລຍະຜ່ານມາ, ສະຫາຍໄດ້ມີຜົນງານການເຄື່ອນໄຫວດີເດັ່ນ, ດໍາລົງຊີວິດລຽບງ່າຍ, ຂະຫຍັນຫ້າວຫັນຕໍ່ໜ້າທີ່ທີ່ໄດ້ຮັບການມອບໝາຍ ແລະ ໄດ້ມີຜົນສໍາເລັດໃນຫຼາຍດ້ານ ເຊິ່ງເປັນການປະກອບສ່ວນເຂົ້າໃນການປະຕິບັດໜ້າທີ່ການປະຕິວັດຊາດປະຊາທິປະໄຕ ແລະ ສອງໜ້າທີ່ຍຸດທະສາດ ຄື: ການປົກປັກຮັກສາ ແລະ ສ້າງສາພັດທະນາປະເທດຊາດ.