ສູນກາງແນວລາວສ້າງຊາດ

Lao Front For National Development

ພິທີປະກາດຮັບຮອງບ້ານສາມັກຄີປອງດອງ

ແນວລາວສ້າງຊາດເມືອງແປກ ແຂວງຊຽງຂວາງ ໄດ້ຈັດພິທີປະກາດຮັບຮອງ ບ້ານຢອນ ເປັນບ້ານສາມັກຄີປອງດອງ, ພາຍໃຕ້ການເປັນປະທານຂອງ ທ່ານ ບຸນມີ ອຸດທະຈັກ ຄະນະປະຈຳພັກເເມືອງ ປະທານແນວແນວລາວສ້າງຊາດເມືອງ, ເປັນກຽດເຂົ້າຮ່ວມມີທ່ານ  ເພັດສະໝອນ ດວງປະເສີດ ຮອງປະທານແນວລາວສ້າງຊາດແຂວງ, ມີບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງຂອງເມືອງ, ອົງການປົກຄອງບ້ານ ພ້ອມດ້ວຍປະຊາຊົນບັນດາເຜົ່າ ພາຍໃນບ້ານເຂົ້າຮ່ວມ ໃນວັນທີ 3 ມີນາ 2020 ນີ້, ຢູ່ທີ່ສະໂມສອນບ້ານຢອນ  ເມືອງແປກ ແຂວງຊຽງຂວາງ

ໃນພິທີ, ທ່ານ ສາຍສະໝອນ ພັນທະວົງ ເລຂາພັກບ້ານ ນາຍບ້ານບ້ານຢອນ ໄດ້ຂື້ນກ່າວເປີດພິທີຢ່າງເປັນທາງການ. ຈາກນັ້ນ, ທ່ານປະທານແນວລາວສາ້ງຊາດບ້ານ ໄດ້ຂຶ້ນຜ່ານບົດສະຫຼູບຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ເຊິ່ງທ່ານໄດ້ໃຫ້ຮູ້ວ່າ ບ້ານຢອນລວມມີ 433 ຄອບຄົວ; ໄລຍະຜ່ານມາແນລາວສ້າງຊາດແຂວງ-ເມືອງ ແລະ ອົງການປົກຄອງບ້ານ ໄດ້ເຜີຍແຜ່-ເຊື່ອມຊືມບັນດານິຕິກຳກ່ຽວກັບວຽກງານການສ້າງຄອບຄົວ ແລະ ບ້ານສາມັກຄີປອງດອງ ໃຫ້ປະຊາຊົນບັນດາເຜົ່າ ພາຍໃນບ້ານໄດ້ຮັບຮູ້ ແລະ ເຂົ້າໃຈ; ປຸກລະດົມປະຊາຊົນບັນດາເຜົ່າ ໃຫ້ມີຄວາມສາມັກຄີຮັກແພງຊ່ວຍເຫຼືອເຊີ່ງກັນ ແລະ ກັນ ແລະ ຮັກສາຮີດຄອງປະເພນີອັນດີງາມຂອງບັນດາຊົນເຜົ່າ. ຜ່ານມາການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ສາມາດປະເມີນໄດ້ຈຳນວນຄອບຄົວທີ່ໄດ້ຕາມມາດຕະຖານຄອບຄົວ ແລະ ບ້ານສາມັກຄີປອງດອງ 99,76%. ພ້ອມກັນນັ້ນ, ໄດ້ມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ອົງການປົກຄອງບ້ານ ແລະ ຄອບຄົວທີ່ຜ່ານການຮັບຮອງເປັນຄອບຄົວສາມັກຄີ.

ໂອກາດນີ້, ທ່ານ ເພັດສະໝອນ ດວງປະເສີດ ໄດ້ຮຽກຮ້ອງໃຫ້ອົງການປົກຄອງບ້ານ ພ້ອມດ້ວຍປະຊາຊົນພາຍໃນບ້ານ ຈົ່ງພ້ອມກັນຮັກສານາມມະຍົດທີ່ໄດ້ຮັບໃນຄັ້ງນີ້ ໃຫ້ຍືນຍົງຕະຫຼອດໄປ, ສືບຕໍ່ເສີມສ້າງຄວາມສາມັກຄີບັນດາເຜົ່າທົ່ວປວງຊົນກໍ່ຄືບ້ານອ້ອມຂ້າງ, ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອກ້າວໄປສູ່ການປະກາດຮັບຮອງເມືອງແປກເປັນເມືອງສາມັກຄີປອງດອງ ໃນຕໍ່ໜ້າ.

info@lfnd.org.la | 021 213754 | (856-21) 453191