ພິທີປະກາດເມືອງ ປາກຊັນ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວແນວລາວສ້າງຊາດ ເປັນກຽດເຂົ້າຮ່ວມມີ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ທ່ານ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ ເຈົ້າແຂວງບໍລິຄໍາໄຊ, ມີທ່ານ ວັນວິໄລ ແດນພູຫຼວງ ປະທານແນວລາວສ້າງຊາດແຂວງໆບໍລິຄໍາໄຊ, ທ່ານ ໄມຈອມ ວັນນະຈອມຄໍາ ເຈົ້າເມືອງໆປາກຊັນ ແລະ ແຂກຖືກເຊີນຈາກສູນກາງ, ແຂວງ, ບັນດາເມືອງອ້ອມຂ້າງ ຕະຫຼອດຮອດພໍ່ແມ່ປະຊາຊົນລາວບັນດາຊົນເຜົ່າພາຍໃນເມືອງເຂົ້າຮ່ວມຢ່າງພ້ອມພຽງ ທີ່ແຂວງ ບໍລິຄໍາໄຊ ໃນວັນທີ 21 ສິງຫາ 2020
ເມືອງປາກຊັນ ເປັນເມືອງໜຶ່ງໃນ 7 ເມືອງ ຂອງແຂວງບໍລິຄໍາໄຊ, ເຊິ່ງເປັນເມືອງອັນດັບທີ 5 ໃນທົ່ວປະເທດ ແລະ ເປັນເມືອງທີ 2 ຂອງແຂວງບໍລິຄໍາໄຊ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ. ທົ່ວເມືອງປະກອບມີ 54 ບ້ານ, ມີພົນລະເມືອງທັງໝົດ 50.359 ຄົນ, ປະກອບມີ 12 ຊົນເຜົ່າ; ປະຊາຊົນຊາວເມືອງປາກຊັນ ມີມູນ ເຊື້ອຮັກຊາດ, ຮັກບ້ານເກີດເມືອງນອນ, ມີຄວາມດຸໝັ່ນຂະຫຍັນພຽນໃນການທຳມາຫາກິນລ້ຽງຊີບ, ມີຄວາມສາມັກຄີປອງດອງ ແລະ ມີຮີດຄອງປະເພນີວັດທະນະທຳທີ່ເປັນເອກະລັກຂອງຕົນມາແຕ່ດົນນານ; ການຈັດຕັ້ງປະຕິບັດ ຂະບວນການ ສ້າງຄອບຄົວ ແລະ ບ້ານສາມັກຄີປອງດອງ ຢູ່ເມືອງ ປາກຊັນ ໄດ້ເລີ່ມມາແຕ່ປີ 2017 ໂດຍການຈັດຕັ້ງປະຕິບັດ ໂຄງການພັດທະ ນາກ້ອນກຳລັງມະຫາສາມັກຄີທົ່ວປວງຊົນ ເຊິ່ງໄດ້ມີວິທີຈັດຕັ້ງປະຕິບັດ ປະກອບມີ 5 ບາດກ້າວ ແລະ ໄດ້ປະກາດຮັບຮອງເອົາຄອບຄົວ ແລະ ບ້ານສາມັກຄີປອງດອງ 3 ຄັ້ງຄື: ຄັ້ງທີ 1 ມີ 5 ບ້ານ 863 ຄອບຄົວ, ຄັ້ງທີ 2 ມີ 26 ບ້ານ 3,234 ຄອບຄົວ; ຄັ້ງທີ 3 ມີ 23 ບ້ານ 4,855 ຄອບຄົວ ແລະ ຄັ້ງທີ 23 ມີ 9 ບ້ານ 4,855 ຄອບຄົວ, ທົ່ວເມືອງມີ 54 ບ້ານຖືກຮັບຮອງເປັນບ້ານສາມັກຄີປອງດອງຈໍານວນ 54 ບ້ານ ເທົ່າກັບ 100%, ແນວລາວສ້າງຊາດ ເມືອງ ປາກຊັນ ໄດ້ປັບປຸງຊີວິດການເປັນຢູ່ຂອງປະຊາຊົນໃຫ້ຮັ່ງມີເຂັ້ມແຂງ ໂດຍຖືເອົາການຜະ ລິດເປັນສິນຄ້າ, ປູກຝັງ, ລ້ຽງສັດ ແລະ ຄ້າຂາຍຈໍານວນໜຶ່ງ ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນເປັນກ້າວໆມາ ປະຈຸບັນມີຄອບຄົວພົ້ນທຸກ 99,35%, ຄອບຄົວວັດທະນະທໍາ 9,162 ຄອບຄົວ. ໂດຍປະຕິບັດຕາມມາດຕະຖານສ້າງຄອບຄົວ ແລະ ບ້ານສາມັກຄີປອງດອງ ຕາມຄຳແນະນຳ ຂອງສູນກາງແນວລາວສ້າງຊາດ. ສຳລັບປີ 2017-2020 ນີ້ ຜ່ານການປະເມີນຄອບຄົວສາມັກຄີປອງດອງຕາມ 4 ມາດຖານ ໃນຈຳນວນຄອບຄົວທັງໝົດ 9,771 ຄອບຄົວ; ມີ 8,952 ຄອບຄົວ ກວມ 91,61%%ທີ່ສາມາດປະຕິບັດໄດ້ຕາມມາດຖານ ແລະ ໄດ້ມອບໃບຢັ້ງຢືນເປັນບ້ານສາມັກຄີປອງດອງສຳເລັດ. ໂດຍອີງໃສ່ມາດ ຖານຄອບຄົວ ແລະ ບ້ານສາມັກຄີປອງດອງ ທີ່ໄດ້ກຳນົດໄວ້, ບັນດາຜົນງານທີ່ຍາດມາໄດ້ຫຼາຍປີຕິດຕໍ່ກັນ.
ດັ່ງນັ້ນ, ສູນກາງແນວລາວສ້າງຊາດ ຈຶ່ງໄດ້ອອກຂໍ້ຕົກລົງວ່າດ້ວຍການຢັ້ງຢືນເມືອງປາກຊັນ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ເປັນເມືອງທີ່ສອງຂອງແຂວງບໍລິຄໍາໄຊ ເປັນກຽດກ່າວມອບໂດຍທ່ານ ເຢ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ແລະ ຮັບໂດຍທ່ານເຈົ້າເມືອງໆປາກຊັນ.
ໃນພິທີດັ່ງກ່າວ, ທ່ານ ປອ ໄຊສົມພອນ ພົມວິຫານ ໄດ້ເປັນກຽດໂອ້ລົມ ເຊິ່ງເນື້ອໃນບາງຕອນ ທ່ານໄດ້ເນັ້ນວ່າ: ຄະ ນະຮັບຜິດຊອບກໍຄື ຄະນະກຳມະການແນວລາວສ້າງຊາດເມືອງ-ບ້ານ ຈະຕ້ອງເອົາໃຈໃສ່ຮັກສານາມມະຍົດທີ່ໄດ້ປະກາດຮັບ ຮອງໃນມື້ນີ້ ແລະ ນາມມະຍົດຕ່າງໆ ໃຫ້ຍືນຍົງ; ພ້ອມກັນນັ້ນ, ກໍໃຫ້ພະຍາຍາມສືບຕໍ່ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ທີ່ຍັງບໍ່ທັນບັນລຸເປົ້າໝາຍໃຫ້ສໍາເລັດ 100%% ເພື່ອໃຫ້ຄອບຄົວ ແລະ ບ້ານເຫຼົ່ານັ້ນກາຍເປັນຄອບຄົວ ແລະ ບ້ານສາມັກຄີປອງດອງເພື່ອໃຫ້ເປັນແບບຢ່າງໃຫ້ແກ່ບັນດາເມືອງພາຍໃນແຂວງ; ພ້ອມນີ້, ໃຫ້ແນວລາວສ້າງຊາດເມືອງ-ບ້ານສົມທົບກັບບັນດາຜູ້ຊົງຄຸນວຸດທິ ເພື່ອສຶກສາອົບຮົມ, ເຕົ້າໂຮມຄວາມສາມັກຄີ, ປຸກລະດົມປະຊາຊົນບັນດາເຜົ່າເຂົ້າຮ່ວມການສ້າງສາ ແລະ ພັດທະນາເມືອງ ໂດຍສະເພາະການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ໂດຍໃຫ້ລົງເລິກຊ່ວຍເຫຼືອດ້ານບົດຮຽນແກ້ໄຂຄວາມທຸກຍາກຂອງຄອບຄົວທີ່ພົ້ນທຸກແລ້ວ ເປັນຕົ້ນ: ການຜະລິດກະສິກໍາເປັນສິນຄ້າ ເພື່ອສ້າງລາຍຮັບໃຫ້ຄອບຄົວ, ສ້າງອາຊີບຄົງທີ່ເພື່ອປັບປຸງຊີວິດການເປັນຢູ່ຂອງປະຊາຊົນບັນດາເຜົ່າບໍ່ໃຫ້ຫຼຸດໂຕນກັນຫຼາຍ ແລະ ພ້ອມ ກັນຮັ່ງມີຂຶ້ນ; ເຂົ້າຮ່ວມຢ່າງຕັ້ງໜ້າໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ເພື່ອສ້າງໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມຂອງເມືອງ ກໍຄືແຂວງໃຫ້ກ້າວໜ້າຂຶ້ນຢ່າງບໍ່ຢຸດຢັ້ງ.
ໃນໂອກາດນີ້ ສູນກາງແນວລາວສ້າງຊາດໄດ້ມອບເຄື່ອງຊ່ວຍເຫຼືອໃຫ້ ແຂວງ ບໍລິຄໍາໄຊ ເພື່ອນໍາໄປຊ່ວຍເຫຼືອປະຊາ ຊົນທີ່ຖືກຜົນກະທົບຈາກໄພນໍ້າຖ້ວມຕື່ມອີກ.
