ສູນກາງແນວລາວສ້າງຊາດ

Lao Front For National Development

ພິທີປິດຊຸດຝຶກອົບຮົມວຽກງານຊົນເຜົ່າ ໃຫ້ພະນັກງານຫຼັກແຫຼ່ງ ຂອງແນວລາວສ້າງຊາດ ຢູ່ ສສ ຫວຽດນາມ

ພິທີປິດຊຸດຝຶກອົບຮົມວຽກງານຊົນເຜົ່າ ໃຫ້ພະນັກງານຫຼັກແຫຼ່ງ ສູນກາງແນວລາວສ້າງຊາດ (ສນຊ) ແລະ ແນວລາວສ້າງຊາດ ບັນດາແຂວງທົ່ວປະເທດ ຈັດຂຶ້ນທີ່ສະຖາບັນການເມືອງເຂດ I ນະຄອນຫຼວງຮ່າໂນ້ຍ ສສ ຫວຽດນາມ ໂດຍເປັນກຽດເຂົ້າຮ່ວມເປັນປະທານພິທີຂອງ ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ, ທ່ານ ເຮົ່າອາເລັ່ງ ກໍາມະການສູນກາງພັກ, ລັດຖະມົນຕີ, ຫົວໜ້າຄະນະກໍາມະການຊົນເຜົ່າ ຂອງລັດຖະບານ ສສ ຫວຽດນາມ ພ້ອມດ້ວຍຄະນະຮັບຜິດຊອບກອງປະຊຸມເຂົ້າຮ່ວມ, ໃນວັນທີ 18 ທັນວາ 2023;

ໂອກາດນີ້, ທ່ານຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ສະແດງຄວາມຂອບໃຈ ຕໍ່ພັກ-ລັດ ກໍຄືຄະນະກຳມະການຊົນເຜົ່າແຫ່ງ ສສ ຫວຽດນາມ ທີ່ໄດ້ໃຫ້ການຊ່ວຍເຫຼືອທຶນຮອນເຂົ້າໃນການບຳລຸງ-ກໍ່ສ້າງພະນັກງານຜູ້ທີ່ເຮັດວຽກງານຊົນເຜົ່າ ໃນຂົງເຂດແນວລາວສ້າງຊາດໃນຄັ້ງນີ້ ແລະ ທ່ານໄດ້ມີຄຳເຫັນຕື່ມວ່າ: ໃຫ້ນັກສຳມະນາກອນຈົ່ງນຳເອົາເນື້ອໃນຈິດໃຈ ກໍຄືບົດຮຽນທີ່ໄດ້ຮັບຈາກການຝຶກອົບຮົມໃນຄັ້ງນີ້ ໄປຄົ້ນຄວ້າໃຫ້ເລິກເຊິ່ງ, ແທດເໝາະ ແລະ ນຳໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຊົນເຜົ່າ ຢູ່ ສປປ ລາວ ໃຫ້ເກີດດອກອອກຜົນ ແລະ ໄດ້ຮັບຜົນສຳ ເລັດທີ່ດີ; ສືບຕໍ່ເປັນເຈົ້າການເຂົ້າຮ່ວມໃນການກໍານົດນະໂຍບາຍຕ່າງໆກ່ຽວກັບວຽກງານຊົນເຜົ່າ, ເອົາໃຈໃສ່ລົງຕິດຕາມ, ຊຸກຍູ້, ສະໜອງຂໍ້ມູນ ແລະ ເກັບກໍາສະພາບແນວຄິດຈິດໃຈ ຂອງປະຊາຊົນບັນດາເຜົ່າ ໂດຍຜ່ານປະຊາຊົນ ແລະ ບັນດາຜູ້ຊົງຄຸນວຸດທິ ເພື່ອສ່ອງແສງລາຍງານ ແລະ ນໍາສະເໜີ ຕໍ່ການຈັດຕັ້ງພັກ-ລັດ. ພ້ອມດຽວກັນນີ້, ທ່ານ ຫົວໜ້າຄະນະກຳ ມະການຊົນເຜົ່າ ແຫ່ງ ສສ ຫວຽດນາມ ໄດ້ສະແດງຄວາມຍ້ອງຍໍຊົມເຊີຍຕໍ່ວິທະຍາກອນ ແລະ ສຳມະນາກອນ ທີ່ໄດ້ເອົາ ໃຈໃສ່ສຶກສາຄົ້ນຄວ້າບັນດາຫົວຂໍ້ເອກະສານທີ່ສຳຄັນດັ່ງກ່າວ ໄດ້ສຳເລັດຜົນຕາມລະດັບຄາດໝາຍ ແລະ ຫວັງວ່າບົດ ຮຽນທີ່ໄດ້ຮັບຄັ້ງນີ້, ສໍາມະນາກອນ ຈະສາມາດນຳໄປປັບປຸງໃຫ້ແທດເໝາະກັບສະພາບ ຂອງແຕ່ລະທ້ອງຖິ່ນ ເພື່ອໝູນໃຊ້ເຂົ້າໃນວຽກງານຕົວຈິ່ງທີ່ຕົນເອງຮັບຜິດຊອບ ໃຫ້ເກີດຜົນປະໂຫຍດສູງສຸດ;

ໃນການຝຶກອົບຮົມຄັ້ງນີ້, ສຳມະນາກອນ ໄດ້ຮຽນຮູ້ບາງບົດຮຽນທີ່ສຳຄັນກ່ຽວກັບວຽກງານຊົນເຜົ່າ ຂອງ ສສ ຫວຽດນາມ ເຊັ່ນ: ການພົວພັນຊົນເຜົ່າ ຢູ່ ສສ ຫວຽດນາມ, ການຄຸ້ມຄອງລັດດ້ານວຽກງານຊົນເຜົ່າ, ການກໍ່ສ້າງ ແລະ ການຈັດຕັ້ງປະຕິບັດນະໂຍບາຍຊົນເຜົ່າ, ນະໂຍບາຍຕໍ່ຜູ້ຊົງຄຸນວຸດທິ ຂອງປະຊາຊົນຊົນເຜົ່າສ່ວນໜ້ອຍ, ການດຶງດູດທຶນຈາກຕ່າງປະເທດ ແລະ ການພັດທະນາເສດຖະກິດ-ສັງຄົມ ໃນຂົງເຂດຊົນເຜົ່າສ່ວນໜ້ອຍ ແລະ ວຽກງານກໍ່ສ້າງ-ບຳລຸງພະນັກງານຊົນເຜົ່າສ່ວນໜ້ອຍ ຢູ່ ສສ ຫວຽດນາມ; ພ້ອມກັນນັ້ນ, ຍັງໄດ້ແລກປ່ຽນບົດຮຽນກ່ຽວກັບທິດສະດີ ແລະ ພຶດຕິກຳຕົວຈິ່ງ ເຮັດໃຫ້ນັກສຳມະນາກອນສາມາດເຊື່ອມຊຶມ ແລະ ມີຄວາມເຂົ້າໃຈຫຼາຍຂຶ້ນຕື່ມ ຕໍ່ວຽກງານດັ່ງກ່າວ; ໃນນັ້ນ, ສຳມະນາກອນໄດ້ໄປຢ້ຽມຢາມຄອບຄົວຕົວແບບການປູກໝາກກ້ຽງ, ແລກປ່ຽນບົດຮຽນຢູ່ເມືອງຫຼູກງ້ານ ແຂວງບັກຢາງ, ແລກປ່ຽນບົດຮຽນຢູ່ເມືອງອວງບີ້ ແຂວງກວາງນິງ ພ້ອມທັງໄດ້ໄປທ່ຽວຊົມສະຖານທີ່ທ່ອງທ່ຽວທາງດ້ານປະຫວັດສາດ, ວັດທະນະທຳ ແລະ ທຳມະຊາດ ພາຍໃນແຂວງຕື່ມອີກ;

ໃນວາລະພິທີປິດທ່ານ ຄຳໄຫລ ສີປະເສີດ ແລະ ທ່ານ ເຮົ່າອາເລັ່ງ ໄດ້ມອບໃບຢັ້ງຢືນຜົນສຳເລັດການຝຶກອົບ ຮົມວຽກງານຊົນເຜົ່າ ໃນລະຫວ່າງ 06-18 ທັນວາ 2023 ໃຫ້ສຳມະນາກອນ; ການຝຶກອົບຮົມຄັ້ງນີ້ ໄດ້ຮັບຜົນສຳເລັດ ຕາມຈຸດປະສົງ ແລະ ຄາດໝາຍທີ່ວ່າງໄວ້.

ຂ່າວ: ເຢ

ບກ ຈິດຕະພົງ

info@lfnd.org.la | 021 213754 | (856-21) 453191