ສູນກາງແນວລາວສ້າງຊາດ

Lao Front For National Development

ພິທີພົບປະສອງຝ່າຍລະຫວ່າງ ຄະນະກຳມະການ ສນຊ ແລະ ຄະນະກຳມະການປ້ອງກັນການປະຕິວັດກູບາ

ພິທີ​ພົບ​ປະ​ສອງຝ່າຍ ລະຫວ່າງ ຄະນະກຳມະການ ສູນກາງ​ແນວ​ລາວ​ສ້າງ​ຊາດ (ສນຊ) ​ເຊິ່ງນຳ​ໂດຍ​ທ່ານ ຈັນທະ​ວົງ ​ແສນ​ອາມາດ​ມົນຕີ ຄະນະ​ພັກ, ຮອງ​ປະທານ ສນຊ ພ້ອມ​ດ້ວຍ​ຄະນະ ແລະ ຄະນະກໍາມະການປ້ອງກັນການປະຕິວັດກູບາ ນຳ​ໂດຍ​ທ່ານ ​ໂອ​ເຣສ​ເຕ ຢ່າ​ເນັສ​ເມັສ​ເຕຣ ຮອງ​ຜູ້​ປະສານ​ງານ​ແຫ່ງ​ຊາດ ຄະນະຄະນະກຳມະການປ້ອງກັນການປະຕິວັດກູບາ ພ້ອມ​ດ້ວຍ​ຄະນະ ໄດ້​ຈັດ​ຂຶ້ນ​ ໃນວັນ​ທີ 31 ຕຸລາ 2017 ນີ້ ທີ່ຫ້ອງ​ພົບ​ປະ ສນຊ.

ທ່ານຮອງ​ປະທານ ສນຊ ​ໄດ້​​ແຈ້ງ​ສະພາບ​ການ​ພັດທະນາ​ເສດຖະກິດ-ສັງຄົມ, ວຽກ​ງານ ​ປກຊ-ປກສ ​ໃຫ້​ຄະນະ​ພົບ​ປະ​ໄດ້​ຮັບ​ຊາບ ​ໂດຍ​ສະ​ເພາະ​ໄລຍະ​ນີ້​ທົ່ວ​ພັກ​ທົ່ວ​ລັດ ​ແລະ ທົ່ວ​ປວງ​ຊົນ​ລາວ​ບັນດາ​ເຜົ່າ​ພວມ​ພ້ອມ​ກັນ​ຈັດຕັ້ງໜ້າ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ​ແຜນ​ພັດທະນາ​ເສດຖະກິດ​-ສັງຄົມຂອງ​ລັດ 5 ປີ ຄັ້ງ​ທີ VIII, ມະຕິ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ X ຂອງ​ແນວ​ລາວ​ສ້າງ​ຊາດ; ສປປ ລາວ​ ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ, ສັງຄົມ​ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ​ໂດຍ​ພື້ນຖານ; ການ​ພັດທະນາ​ເສດຖະ​ກິດ-ສັງຄົມ​ມີ​ການ​ຂະຫຍາຍຕົວ​ຕໍ່​ເນື່ອງ 6 ​ເດືອນ​ຕົ້ນ​ປີ 2017 ສາມາດ​ບັນລຸ​ໄດ້ 6,8%, ການ​ແກ້​ໄຂ​ຄວາມທຸກ​ຍາກ​ຫລຸດ​ລົງຈາກ 6,5% ມາ​ເປັນ 6,3% ລາຍ​ຮັບ​ສະ​ເລ່ຍ GDP ຕໍ່​ຫົວ​ຄົນ/ 2,408 ​ໂດ​ລາ​ສະຫະລັດ; ດ້ານ​ວັດທະນະທຳ-ສັງຄົມ ​ໄດ້​ຮັບ​ການ​ພັດທະນາ ​ແລະ ຍົກ​ສູງ​ຄຸນ​ນະພາ​ບການ​ສຶກສາ, ສາທາລະນະສຸກ, ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ລາວ​ບັນດາ​ເຜົ່າ​ທາງ​ດ້ານ​ວັດຖຸ ​ແລະ ຈິດ​ໃຈ​ໃຫ້​ດີ​ຂຶ້ນ​ເປັນ​ກ້າວໆ ​ແລະ ​ປີ​ນີ້ ສປປ ລາວ ​ໄດ້​ເປີດ​ປີ​ທ່ອງ​ທ່ຽວ​ໃນ​ໂອກາດ​ບຸນ​ນະມັດສະການ​ພະທາດ​ຫລວງ​ວຽງ​ຈັນ​ຕື່ມ​ອີກ. ພ້ອມ​ກັນ​ນີ້​, ທ່ານ​ຍັງ​ໄດ້​ແຈ້ງ​ກ່ຽວ​ກັບ​ພາລະ​ບົດບາດ, ໜ້າ​ທີ່ ​ແລະ ການ​ເຄື່ອນ​ໄຫວ​ວຽກ​ງານ​ຂອງ​ສູນ​ກາງແນວ​ລາວ​ສ້າງ​ຊາດ ກໍ່​ຄື​ແນວ​ລາວ​ສ້າງ​ຊາດ​ທຸກ​ຂັ້ນ​ໃນ​ຂອບ​ເຂດ​ທົ່ວ​ປະ​ເທດ​ໃຫ້​ຄະນະ​ພົບ​ປະ​ກູ​ບາ ​ໄດ້​ຮັບ​ຊາບ​ຕື່ມ.


ຈາກ​ນັ້ນ ທ່ານ ​ໂອ​ເຣສ​ເຕ ກໍ່​ໄດ້​ສະ​ແດງ​ຄວາມ​ຂອບ​ໃຈ ​ແລະ ພູມ​ໃຈ​ຕໍ່ການຕ້ອນຮັບ​ແບບ​ຖານ​ຄອບຄົວ​ດຽວ​ກັນ ພ້ອມ​ທັງ​ແຈ້ງ​ໃຫ້​ຄະນະ​ຝ່າຍ ສນຊ ຮັບ​ຊາບ​ບາງເນື້ອໃນ ກ່ຽວກັບ​ສະພາບການ​ພັດທະນາ​ເສດຖະກິດ-ສັງຄົມ ຢູ່​ກູ​ບາ ວ່າ: ລັດຖະບານ​ກູ​ບາ ​ໄດ້​ມີ​ຄວາມ​ເອົາ​ໃຈ​ໃສ່​ຕໍ່ວຽກ​ງານ​ການ​ເຕົ້າ​ໂຮມ​ຄວາມ​ສາມັກຄີ ​ເຖິງ​ວ່າ​ຄົນ​ກູ​ບາ​ຈະ​ຢູ່​ແຫ່ງ​ຫົນ​ໃດ​ໃນ​ໂລກ ​ເຂົາ​ເຈົ້າ​ກໍ​ພ້ອມ​ກັນ​ສາມັກຄີ​ເປັນ​ຈິດ​ໜຶ່ງ​ໃຈ​ດຽວ​ສະໜັບ​ສະ​ຫນູນ​ແນວທາງ​ຂອງ​ພັກ; ດ້ານ​ວຽກ​ງານ​ພັດທະນາ​ເສດຖະກິດ-ວັດທະນະທຳ-ສັງ ຄົມ ​ໄດ້​ຊຸກຍູ້​ສົ່ງ​ເສີມ​ແມ່ຍິງ ​ແລະ ​ເດັກນ້ອຍ ​ໃຫ້​​ໄດ້ເຂົ້າ​ໂຮງຮຽນ, ​ອຳນວຍ​ຄວາມ​ສະດວກ​ໃນ​ການ​ເຂົ້າ​ເຖິງ ​ແລະ ໄດ້​​ຮັບ​ການ​ບໍລິການ​ດ້ານ​ສາທາລະນະ​ສຸກ, ສົ່ງ​ເສີມ​ການ​ຜະລິດ​ກະສິກຳ​ ​ແລະ ຕ້ານ​ການ​ຟູມ​ເຟືອຍ; ​ໃນ​ແຕ່ລະ​ປີ​ລັດຖະບານ​ກູ​ບາ ​ສາມາດ​ປະຢັດ​ງົບປະມານ​ໄດ້​​ເກືອບ 100 ລ້ານ​ໂດ​ລາ​ສະຫະລັດ​ຕໍ່​ປີ ​ເຖິງ​ແນວ​ໃດ​ກໍ​ຕາມ​ໄລຍະ​ຜ່ານ​ມາ​ໄພພິບັດ​ທາງ​ທຳ​ມະ​ຊາດ ​ໂດຍ​ສະ​ເພາະ​ພາຍຸ ​ໄດ້​ພັດ​ຖະຫລົ່ມ​ປະ​ເທດ​ກູ​ບາ​ ຫລາຍ​ຄັ້ງ ​ເຮັດ​ໃຫ້​ປະຊາຊົນ​​ໄດ້​ຮັບ​ຄວາມ​ເດືອດຮ້ອນ ​ແຕ່​ລັດຖະບານ​ກູ​ບາ ກໍ່​ໄດ້​​ເອົາ​ໃຈ​ໃສ່ໂດຍມີ​ວິທີ​ການ​ແກ້​ໄຂ ​ເພື່ອ​ຟື້ນ​ຟູ​ຊີວິດ​ການ​ເປັນ​ຢູ່​ຂອງ​ປະຊາຊົນ​ກູ​ບາໃຫ້​ດີ​ຂຶ້ນ ທ່ານ​ກ່າວ​ຕື່ມ​ອີກ​ວ່າ ສອງ​ປະ​ເທດ​ພວກ​ເຮົາ ​ເຖິງ​ຈະຢູ່​ຫ່າງໄກ​ກັນກໍ່ຕາມ ​ແຕ່​ໄລຍະ​ຜ່ານ​ມາ​ສອງ​ປະ​ເທດ​ພວກ​ເຮົາ ​ກໍ່​ໃຫ້ການ​ຊ່ວຍ​ເຫລືອ ​ແລະ ສະໜັບສະໜູນ​ເຊິ່ງກັນ ​ແລະ ກັນ​ຕະຫລອດ​ມາ.

info@lfnd.org.la | 021 213754 | (856-21) 453191