ສູນກາງແນວລາວສ້າງຊາດ

Lao Front For National Development

ພິທີພົບປະສອງຝ່າຍ ລະຫວ່າງ ສູນກາງແນວລາວສ້າງຊາດ ກັບສະພາທີ່ປຶກສາການເມືອງທົ່ວປະເທດຈີນ

ພິທີພົບປະສອງຝ່າຍລະຫວ່າງ ສູນກາງແນວລາວສ້າງຊາດ ກັບສະພາທີ່ປຶກສາການເມືອງທົ່ວປະເທດຈີນ ໄດ້ຈັດຂຶ້ນໃນວັນທີ 27 ພະຈິກ 2023 ນີ້ ທີ່ສູນກາງແນວລາວສ້າງຊາດ(ສນຊ); ນຳໂດຍທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ ແລະ ທ່ານ ນາງ ເສີນ ໂຢໂຢ ຮອງປະທານສະພາທີ່ປືກສາການເມືອງທົ່ວປະເທດຈີນ ພ້ອມດ້ວຍຄະນະຂອງທັງສອງຝ່າຍເຂົ້າຮ່ວມ.

 

ທ່ານ ຮອງປະທານຜູ້ປະຈຳການ ສນຊ ໄດ້ລາຍງານສະພາບລວມກ່ຽວກັບການພັດທະນາເສດຖະກິດ-ສັງຄົມ ຂອງ ສປປລາວ ແລະ ໄດ້ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດ ພ້ອມທັງໄດ້ລາຍງານກ່ຽວກັບບັນດາຜົນງານການເຄື່ອນໄຫວໃນໄລຍະຜ່ານມາ ແລະ ບັນດາວຽກງານຈຸດສຸມຂອງອົງການແນວລາວສ້າງຊາດ ໂດຍຫຍໍ້ ໃຫ້ຄະນະຜູ້ແທນສະພາທີ່ປຶກສາການເມືອງທົ່ວປະເທດຈີນໄດ້ຮັບຊາບ.ຈາກນັ້ນ,  ທ່ານ ນາງ ເສີນ ໂຢໂຢ ກໍ່ໄດ້ສະແດງຄວາມຊົມເຊີຍຕໍ່ບັນດາຜົນສຳເລັດທີ່ ສປປ ລາວ ກໍ່ຄືແນວລາວສ້າງຊາດ ຍາດມາໄດ້ໃນຕະຫຼອດໄລຍະທີ່ຜ່ານມາ.

ໂອກາດນີ້, ທັງສອງຝ່າຍກໍ່ໄດ້ຕີລາຄາຄືນກ່ຽວກັບການຈັດຕັ້ງປະຕິບັດບົດບັນທຶກການຮ່ວມມືລະຫວ່າງ ສູນກາງແນວລາວສ້າງຊາດ ກັບສະພາທີ່ປຶກສາການເມືອງທົ່ວປະເທດຈີນໃນໄລຍະຜ່ານມາ ເຊິ່ງໄດ້ຍົກໃຫ້ເຫັນບາງຜົນງານທີ່ພົ້້ນເດັ່ນໃນການຮ່ວມມືກັນ, ການຊ່ວຍເຫຼືອເຊິ່ງກັນ ແລະ ກັນ, ການສົ່ງຄະນະຜູ້ແທນໄປພົບປະແລກປ່ຽນບົດຮຽນນຳກັນ. ພ້ອມກັນນັ້ນ ທັງສອງຝ່າຍຍັງໄດ້ປຶກສາຫາລືກ່ຽວກັບບັນດາວຽກງານຈຸດສຸມທີ່ຈະຕ້ອງສຶບຕໍ່ພົວພັນຮ່ວມມືໃນຕໍ່ໜ້າ ເປັນຕົ້ນການສືບຕໍ່ເຊັນບົດບັນທຶກຮ່ວມມືກັນໃນໄລຍະຕໍ່ໜ້າ, ການເພິ່ມທະວີຊຸກຍູ້ການຮ່ວມມືຂອງສອງອົງການ ແຕ່ສູນກາງຮອດທ້ອງຖິ່ນໃຫ້ຫຼາຍຂຶ້ນ, ສືບຕໍ່ສົ່ງຄະນະຜູ້ແທນຂັ້ນສູງ, ວິຊາການໄປມາຫາສູ່ກັນ ເພື່ອແລກປ່ຽນບົດຮຽນ ປະສົບການໃນດ້ານວຽກງານຕ່າງໆທີ່ກ່ຽວຂ້ອງ ເພື່ອເສີມສ້າງສາຍພົວພັນມິດຕະພາບຕາມທິດ 4 ດີໃຫ້ເກີດດອກອອກຜົນ ແລະ ປະກົດຜົນເປັນຈີງ.

ຂ່າວ-ຮູບ: ລີ+ເຢ້

ບກ: ພ ບຸບຜາ

info@lfnd.org.la | 021 213754 | (856-21) 453191