ສູນກາງແນວລາວສ້າງຊາດ

Lao Front For National Development

ພິທີມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ

ແນວລາວສ້າງຊາດ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດພິທີມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ ຂຶ້ນໃນວັນທີ 28 ສິງຫາ 2020 ນີ້, ທີ່ສະໂມສອນປົກຄອງເມືອງ, ໂດຍເປັນກຽດເຂົ້າຮ່ວມ ຂອງທ່ານ ພູວຽງ ເພຍເທບ ຮອງເລຂາພັກເມືອງ, ປະທານກວດກາພັກ-ຫົວໜ້າກວດກາລັດ ເມືອງ, ທ່ານ ເພັດສະຫວັນ ວິມະລາວົງ ຄະນະປະຈຳພັກເມືອງ, ປະທານແນວລາວສ້າງຊາດເມືອງນາຊາຍທອງ, ຕາງໜ້າບັນດາຫ້ອງການອ້ອມຂ້າງເມືອງ, ພະນັກງານອາວຸໂສບຳນານ, ນາຍບ້ານ ແລະ ແນວລາວສ້າງຊາດ ຂອງບັນດາບ້ານ ອ້ອມຂ້າງເມືອງດັ່ງກ່າວເຂົ້າຮ່ວມ.

ໃນພິທີ ທ່ານ ອຸ່ນເຮືອນ ໂພທິລາດ ອະດີດປະທານແນວລາວສ້າງຊາດ ນະຄອນຫຼວງວຽງຈັນ ໄດ້ຫວນຄືນປະຫວັດການກຳເນີດ, ການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີ ຂອງອົງການແນວລາວສ້າງຊາດ ຕະຫຼອດໄລຍະ 70 ປີ ຜ່ານມາ ໂດຍຜ່ານ 3 ໄລຍະປະຫວັດສາດ ຄື: ໄລຍະແນວລາວອິດສະຫຼະ, ແນວລາວຮັກຊາດ ແລະ ແນວລາວສ້າງຊາດ ໃນປະຈຸບັນ; ເຊິ່ງທ່ານໄດ້ຍົກໃຫ້ເຫັນ ອົງການແນວລາວສ້າງຊາດ ໄດ້ປະຕິບັດພາລະບົດບາດອອກໜ້າແທນພັກ ເພື່ອເຕົ້າໂຮມຄວາມສາມັກຄີປອງດອງທົ່ວປວງຊົນຕໍ່ສູ້ຕ້ານຈັກກະພັດພວກລ່າເມືອງຂຶ້ນແບບເກົ່າ ແລະ ແບບໃໝ່, ເຮັດສຳເລັດພາລະກຳປະຫວັດສາດອັນສະຫງ່າອົງອາດຄື ປົດປ່ອຍປະເທດຊາດອອກຈາກແອກລ່າເມືອງຂຶ້ນແບບເກົ່າ ແລະ ແບບໃໝ່ ແລະ ປະຕິບັດນະໂຍບາຍ 3 ບາດຄ້ອນຍຸດທະສາດ ໃນການລຸກຮື້ຂຶ້ນຢຶດອໍານາດການປົກຄອງທົ່ວປະເທດ ໃນວັນທີ 2 ທັນວາ 1975 ແບບ “ບົວບໍ່ຊ້ຳ ນ້ຳບໍ່ຂຸ່ນ”.

ພ້ອມກັນນີ້, ກໍໄດ້ມີພິທີມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ ໃຫ້ແກ່ບຸກຄົນທີ່ມີຜົນງານດີເດັ່ນເຂົ້າໃນການປະກອບສ່ວນ ເຄື່ອນໄຫວວຽກງານແນວລາວສ້າງຊາດ ຕະຫຼອດໄລຍະຜ່ານມາ.

info@lfnd.org.la | 021 213754 | (856-21) 453191