ສູນກາງແນວລາວສ້າງຊາດ

Lao Front For National Development

ພິທີມອບ-ຮັບໜ້າທີ່ເລຂາຄະນະໜ່ວຍພັກຊຸດເກົ່າແລະຊຸດໃໝ່ຂອງໜ່ວຍພັກແນວລາວສ້າງຊາດແຂວງຊຽງຂວາງ

ໃນຕອນເຊົ້າຂອງວັນທີ 16 ມີຖຸນາ 2021 ນີ້ແນວລາວສ້າງຊາດແຂວງຊຽງຂວາງ ໄດ້ຈັດພິທີມອບ-ຮັບໜ້າທີ່ ລະຫວ່າງເລຂາໜ່ວຍພັກຊຸດເກົ່າ ແລະ ເລຂາໜ່ວຍ ພັກຊຸດໃໝ່ຂື້ນ ຢ່າງເປັນທາງການ ຢູ່ທີ່ຫ້ອງປະຊຸມຊັ້ນ II ຫ້ອງວ່າການແຂວງ ໂດຍການເປັນກຽດເຂົ້າຮ່ວມຂອງ ສະຫາຍ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງຊຽງຂວາງ, ມີຄະນະໜ່ວຍພັກຊຸດເກົ່າ, ຊຸດໃໝ່ ແລະ ສະມາຊິກພັກ ເຂົ້າຮ່ວມ.

ໃນພິທີ, ສະຫາຍ ດວງໄຊ ທໍ່ຢ່າບຼົ່ງ ຄະນະພັກຊຸດເກົ່າ ໄດ້ຂື້ນຜ່ານບົດສະຫຼຸບໃນການຈັດຕັ້ງປະຕິບັດວຽກງານ ການຊີ້ນຳ-ນຳພາໃນໄລຍະຜ່ານມາ ໂດຍສະເພາະແມ່ນການນຳເອົາແນວທາງແຜນນະໂຍບາຍຂອງພັກ, ລະບຽບກົດໝາຍຂອງລັດ, ມະຕິ-ຄຳສັ່ງຕ່າງໆ ລົງຈັດຕັ້ງເຊື່ອມຊືມ, ເຜີຍແຜ່ໃຫ້ສະມາຊິກພັກ, ພະນັກງານ-ລັດຖະກອນ ແລະ ພໍ່ແມ່ປະຊາຊົນບັນດາເຜົົ່າ. ວຽກງານກໍ່ສ້າງພັກ-ພະນັກງານ, ວຽກງານຂະບວນການສ້າງຄອບຄົວ ແລະບ້ານສາມັກຄີປອງດອງ, ວຽກງານສາສະໜາ. ພ້ອມນັ້ນ, ໃນພິທີກໍ່ໄດ້ເຊັນບົດບັນທຶກມອບ-ຮັບໜ້າທີ່ລະຫ່ວາງເລຂາຄະນະໜ່ວຍພັກຊຸດເກົ່າ ແລະ ຊຸດໃໝ່.

ໃນຕອນທ້າຍຂອງພິທີ ສະຫາຍ ນາງ ບົວສີ ນາຖາວົງ ໄດ້ໃຫ້ກຽດມີຄຳຄິດເຫັນໂອ້ລົມຕໍ່ພິທີ ເຊີງກ່ອນອື່ນ ສະຫາຍໄດ້ສະແດງຄວາມຍ້ອງຍໍໍຊົມເຊີຍ ໃນການຈັດຕັ້ງປະຕິບັດໜ້າທີ່ວຽກງານທີ່ໄດ້ຊີ້ນຳ-ນຳພາໃນໄລຍະຜ່ານມາ ຂອງຄະນະໜ່ວຍພັກຊຸດເກົ່າ ແລະ ພ້ອມນີ້, ສະຫາຍຍັງໄດ້ເນັ້ນໃຫ້ເລຂາຄະນະໜ່ວຍພັກຊຸດໃໝ່ ຈົ່ງເພີ່ມທະວີປະກອບສ່ວນ ເຂົ້າໃນວຽກງານການຊີ້ນຳ-ນຳພາ ໃຫ້ນັບມື້ເຂັ້ມແຂງ, ສຶກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີສະມາຊິກພັກ, ພະນັກງານ-ລັດຖະກອນ ໃຫ້ເປັນປຶກແຜ່ນແໜ້ນໜາ, ສຶບຕໍ່ເຮັດສຳເລັດໜ້າທີ່ວຽກງານທີ່ພັກ-ລັດມອບໝາຍໃຫ້ ແລະ ພ້ອມກັນຈັດຕັ້ງປະຕິບັດແຜນການທີ່ໜ່ວຍພັກວາງໄວ້ໃຫ້ປະກົດຜົນເປັນຈິງ.

 

info@lfnd.org.la | 021 213754 | (856-21) 453191