ສູນກາງແນວລາວສ້າງຊາດ

Lao Front For National Development

ພິທີມອບ-ຮັບໜ້າທີ່ປະທານແນວລາວສ້າງຊາດແຂວງຫຼວງນ້ຳທາ ຜູ້ເກົ່າ ແລະ ຜູ້ໃໝ່

ວັນທີ 16 ມີຖຸນາ 2021 ນີ້, ຢູ່ທີ່ສະໂມສອນຫ້ອງວ່າການປົກຄອງແຂວງ ຫຼວງນໍ້າທາ ໄດ້ມີພິທີມອບ-ຮັບໜ້າທີ່ ລຫວ່າງປະທານແນວລາວສ້າງຊາດແຂວງຜູ້ເກົ່າ ແລະ ຜູ້ໃໝ່; ໂດຍເປັນກຽດເຂົ້າຮ່ວມຂອງທ່ານ ຄຳໄຫຼ ສີປະເສີດ ກຳ ມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນ້ຳທາ, ມີບັນດາຄະນະນຳແຂວງ, ຄະນະນຳເມືອງ, ຄະນະຈັດຕັ້ງແຂວງ, ອາດີດການນຳແຂວງ, ບັນດາຫົວໜ້າ, ຮອງຫ້ອງການອ້ອມຂ້າງແຂວງ ຕະຫຼອດຮອດພະນັກງານເຂົ້າຮ່ວມ.

ໃນພິທີ ທ່ານ ພົມມະສຸກ ວິໄລກຸນ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດພະນັກງານການນຳແຂວງ ອອກພັກການຮັບນະໂຍບາຍອູດໜູນບຳນານ. ພ້ອມດຽວກັນນັ້ນ, ໄດ້ເຊັນມອບຮັບໜ້າທີ່ລະຫວ່າງທ່ານ ນາງ ລັດສະໝີ ມິ່ງບຸບຜາ ປະທານແນວລາວສ້າງຊາດແຂວງຜູ້ເກົ່າ ແລະ ທ່ານ ດຣ ຄຳຈັນ ອິນທອງໄຊ ກຳມະການປະຈຳພັກແຂວງ ປະທານແນວລາວສ້າງຊາດແຂວງຜູ້ໃໝ່;

ຈາກນັ້ນ, ທ່ານ ນາງ ລັດສະໝີ ມິ່ງບຸບຜາ ໄດ້ຜ່ານບົດສະຫຼຸບໂດຍຫຍໍ້ ກ່ຽວກັບການຊີ້ນຳໆພາວຽກງານດັ່ງ ກ່າວຕະຫຼອດໄລຍະ 5 ປີ ຜ່ານມາ, ເຊີ່ງໄດ້ຖືເອົາການສຶກສາອົບຮົມການເມືອງ-ແນວຄິດ ເປັນກົກໃຫ້ກັບຖັນແຖວສະມາ ຊິກພັກ-ພະນັກງານ ມີແນວຄິດອຸ່ນອ່ຽງທຸ່ນທ່ຽງ ແລະ ຜັນຂະຫຍາຍຈັດຕັ້ງປະຕິບັດຕາມແນວທາງນະໂຍບາຍຂອງພັກ ຢ່າງເປັນເຈົ້າການ, ພ້ອມທັງຕີລາຄາໃຫ້ເຫັນດ້ານຕັ້ງໜ້າ ໃນການຊີ້ນຳ ແລະ ນຳພາ ເຮັດໃຫ້ຂະບວນການວຽກງານ ພັດ ທະນາດີຂຶ້ນເປັນກ້າວໆ ແລະ ບັນດາຂໍ້ຄົງຄ້າງ, ທິດທາງແຜນການ ສືບຕໍ່ຈັດຕັ້ງປະຕິບັດໃນຕໍ່ໜ້າ, ວຽກງານການຄຸ້ມຄອງຊັບສົມບັດຂອງລັດ ແລະ ການຄຸ້ມຄອງ-ການນຳໃຊ້ຊັບສົມບັດຂອງລັດ.

ໂອກາດດັ່ງກ່າວ ທ່ານ ຄຳໄຫຼ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນ້ຳທາ ໄດ້ໃຫ້ທິດຊີ້ນຳຕໍ່ທ່ານປະທານແນວລາວສ້າງຊາດແຂວງຜູ້ໃໝ່ ຕ້ອງສືບຕໍ່ເອົາໃຈໃສ່ປະຕິບັດແນວທາງການປ່ຽນແປງໃໝ່ຢ່າງຮອບດ້ານ, ຖືເອົາການສຶກສາອົບຮົມທາງດ້ານການເມືອງ-ແນວຄິດ ເປັນສຳຄັນນັບແຕ່ຂັ້ນຮາກຖານ, ເອົາໃຈໃສ່ເຕົ້າ ໂຮມຄວາມສາມັກຄີ, ຄວາມເປັນປຶກແຜ່ນຂອງປວງຊົນທົ່ວສັງຄົມ ກໍ່ຄືພາຍໃນຢ່າງແໜ້ນແຟ້ນ, ເຊີດຊູຄວາມຮັບຜິດ ຊອບ, ຄວາມເປັນເຈົ້າການໃນການປະຕິບັດຕາມພາລະບົດບາດ, ສິດ ແລະ ໜ້າທີ່, ທັງຮຽກຮ້ອງອົງການຈັດຕັ້ງພາຄີ, ອົງການຈັດຕັ້ງມະຫາຊົນ ຊ່ວຍເຫຼືອເຊີ່ງກັນ ແລະ ກັນ, ເສີມຂະຫຍາຍມູນເຊື້ອ ທີ່ມີການພົວພັນກັນຢ່າງແໜ້ນແຟ້ນ ຜັກດັນເຮັດໃຫ້ວຽກງານແນວລາວສ້າງຊາດ ແຂວງ ເຕີບໃຫຍ່, ເຂັ້ມແຂງ ແລະ ຂະຫຍາຍຕົວຂຶ້ນໄປເລື້ອຍໆ, ພ້ອມທັງສຸມໃສ່ວຽກງານຕ່າງໆທີ່ແນວລາວສ້າງຊາດຮັບຜິດຊອບໃຫ້ໄດ້ຕາມເປົ້າໝາຍ ທີ່ທາງກອງປະຊຸມໃຫຍ່ຜູ້ແທນແນວລາວສ້າງຊາດແຂວງ ຄັ້ງທີ VII ວາງອອກໃຫ້ປະກົດເປັນຈິງ.

 

 

info@lfnd.org.la | 021 213754 | (856-21) 453191