ສູນກາງແນວລາວສ້າງຊາດ

Lao Front For National Development

ພິທີມອບ-ຮັບໜ້າທີ່ ຫົວໜ້າກົມຜູ້ເກົ່າ ແລະ ຜູ້ໃໝ່ ຂອງສູນກາງແນວລາວສ້າງຊາດ

ພິທີມອບ-ຮັບໜ້າທີ່ ລະຫວ່າງ ຫົວໜ້າກົມຊັ້ນຄົນ-ການຈັດຕັ້ງສັງຄົມ ແລະ ຫົວໜ້າກົມຈັດຕັ້ງ-ພະນັກງານ ສູນກາງແນວລາວສ້າງຊາດ ຜູ້ເກົ່າ ແລະ ໃໝ່ ໄດ້ຈັດຂຶ້ນ ໂດຍເປັນກຽດເຂົ້າຮ່ວມຂອງທ່ານ ຄໍາໃບ ດໍາລັດ ກໍາມະການສູນກາງພັກ,ຮອງເລຂາຄະ ນະພັກ, ຮອງປະທານສູນກາງແນວລາວສ້າງຊາດ ມີບັນດາທ່ານຮອງປະທານ, ຄະນະປະຈໍາ ສນຊ, ຫົວໜ້າກົມຮອງຫົວໜ້າກົມ ພ້ອມດ້ວຍພະນັກງານ-ລັດຖະກອນ ທີ່ກ່ຽວຂ້ອງຈໍານວນໜຶ່ງ ເຂົ້າຮ່ວມເປັນສັກຂີພິຍານ ທີ່ຫ້ອງປະຊຸມສູນກາງແນວລາວສ້າງຊາດ ໃນອາທິດຜ່ານມານີ້.

ໃນພິທີດັ່ງກ່າວ, ໄດ້ມີການເຊັນມອບ-ຮັບໜ້າທີ່ ຫົວໜ້າຊັ້ນຄົນ-ການຈັດຕັ້ງສັງຄົມ ແລະ ຫົວໜ້າກົມຈັດຕັ້ງ-ພະ ນັກງານ ລະຫວ່າງ ທ່ານ ສຸລິວັນ ວັນນະວົງໄຊ ຫົວໜ້າກົມຊັ້ນຄົນ-ການຈັດຕັ້ງສັງຄົມ (ຜູ້ເກົ່າ) ມອບໜ້າທີ່ໃຫ້ ທ່ານ ໄທລໍ່ ວາເຊັ້ງ ຫົວໜ້າກົມຊັ້ນຄົນ-ການຈັດຕັ້ງສັງຄົມ (ຜູ້ໃໝ່); ທ່ານ ພອນຄໍາ ສີວຽງໄຊ ຫົວໜ້າກົມຈັດຕັ້ງ-ພະນັກງານ (ຜູ້ເກົ່າ) ມອບໜ້າທີ່ໃຫ້ ທ່ານ ຄໍາຢາດ ລາຊະດາວົງ ວ່າການຫົວໜ້າກົມຈັດຕັ້ງ-ພະນັກງານ (ຜູ້ໃໝ່) ແລະ ແຕ່ງຕັ້ງບົ່ງຕົວເລກເລຂາ, ຮອງເລຂາ ແລະ ຄະນະໜ່ວຍພັກຈໍານວນໜຶ່ງຕື່ມອີກ.

ເພື່ອເຮັດໃຫ້ພິທິ ມອບ-ຮັບ ໜ້າທີ່ຄັ້ງນີ້ ມີຄວາມໝາຍເລິກເຊິ່ງ ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງເລຂາຄະນະພັກ, ຮອງປະທານສູນກາງແນວລາວສ້າງຊາດ ໄດ້ເປັນກຽດໂອ້ລົມຕໍ່ພິທີ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍບັນດາຜົນງານຂອງ ບັນດາຫົວໜ້າກົມຕ່າງໆຜູ້ເກົ່າ ກໍຄືພະນັກງານ ນໍຳພາຄຸ້ມຄອງ ຈໍານວນໜຶ່ງທີ່ໄດ້ນະໂຍບາຍພັກຜ່ອນບໍານານ ຕາມລະບຽບການຂອງພັກ-ລັດ ໃນຄັ້ງນີ້ວ່າ ຕະຫຼອດໄລຍະທີ່ປະຈໍາການ ພວກສະຫາຍແມ່ນຜູ້ໜຶ່ງທີ່ໄດ້ປະກອບສ່ວນຢ່າງຕັ້ງໜ້າ ແລະ ສຸມສະຕິປັນຍາເຫື່ອແຮງ ເຂົ້າໃນພາລະກິດຂອງຊາດທັງສອງໄລຍະ ສາມາດນຳພາເຮັດຫຼ້ອນໜ້າທີ່ ແລະ ຍາດມາໄດ້ຜົນງານທີ່ພົ້ນເດັ່ນຫຼາຍດ້ານ ທ່ານຍັງໄດ້ຮຽກຮ້ອງອີກວ່າ: ບັນດາທ່ານທີ່ໄດ້ຮັບໜ້າທີ່ໃໝ່ຈົ່ງເອົາໃຈໃສ່ໃນການຄົ້ນຄວ້າ, ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໂດຍອີງໃສ່ລະບຽບ, ແບບແຜນ ເພື່ອເຮັດໃຫ້ວຽກງານສໍາເລັດ; ເອົາໃຈ ໃສ່ສຶກສາອົບຮົມ,​ ເຕົ້າໂຮມຄວາມສາມັກຄີພາຍໃນໜ່ວຍພັກ, ພາຍໃນກົມຂອງຕົນໃຫ້ໜັກແໜ້ນ; ເອົາໃຈໃສ່ໃນການຊ່ວຍ ເຫຼືອ, ຄົ້ນຄວ້າ ໃນການກໍ່ສ້າງພະນັກງານສືບທອດ-ປ່ຽນແທນ ແລະ ເອົາໃຈໃສ່ສືບຕໍ່ສຶກສາຮໍ່າຮຽນ, ທິດສະດີ, ພຶດຕິກໍາ ແລະ ຝຶກຝົນຫຼໍ່ຫຼອມຕົນເອງດ້ານຄວາມຮູ້, ຄວາມສາມາດ ເພື່ອເຮັດໃຫ້ການປະຕິບັດໜ້າທີ່ບັນລຸຕາມຈຸດປະສົງລະດັບຄາດ ໝາຍ; ເຊິ່ງການປັບປຸງກົງຈັກການຈັດຕັ້ງ, ສັບປ່ຽນບ່ອນປະຈຳການຂອງພະນັກງານ-ລັດຖະກອນ ໃນຄັ້ງນີ້ ເພື່ອຕອບສະໜອງກັບ ຄວາມຮຽກຮ້ອງຕ້ອງການຂອງໜ້າທີ່ການເມືອງສະເພາະໜ້າ ແລະ ຍາວນານຂອງສູນກາງແນວລາວສ້າງຊາດ.

info@lfnd.org.la | 021 213754 | (856-21) 453191