ສູນກາງແນວລາວສ້າງຊາດ

Lao Front For National Development

ພິທີມິດຕິງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ

ກະຊວງປ້ອງກັນປະເທດ ຈັດພິທີໂຮມຊຸມນຸມໃຫຍ່ສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949-20ມັງກອນ 2024) ຂຶ້ນທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ຂອງວັນທີ 19 ມັງກອນ 2024, ເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ, ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີ, ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ; ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີການນໍາພັກ-ລັດ, ອະດີດການນຳພັກ-ລັດ, ພະນັກງານປະຕິວັດອາວຸໂສ ຕະຫຼອດຮອດ ນາຍ ແລະພົນທະຫານ, ນາຍ ແລະ ພົນຕໍາຫຼວດ, ພະນັກງານລັດຖະກອນ ພ້ອມດ້ວຍຊາວໜຸ່ມ-ເຍົາວະຊົນເຂົ້າຮ່ວມ.

ກ່ອນຈະເລີ່ມເຂົ້າພິທີທາງການແມ່ນໄດ້ຮັບຊົມການສະແດງສິລະປະຈາກກອງສິລະປະກອນ ກອງທັບປະຊາຊົນລາວ; ຈາກນັ້ນ ໄດ້ຮັບຟັງການເຜີຍແຜ່ເອກະສານ, ຄຳສັ່ງປະຈໍາວັນຂອງລັດຖະມົນຕີກະຊວງປ້ອງກັນປະເທດກ່ຽວກັບການຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ພ້ອມກັນນີ້ ຍັງໄດ້ຮັບຟັງບົດຄໍາເຫັນຕາງໜ້າໃຫ້ນັກຮົບແຂງຂັນ ວິລະຊົນແຫ່ງຊາດ ຕໍ່ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ສານອວຍພອນຂອງສູນກາງຊາວໜຸ່ມປະຊາຊົນປະຕິວັດລາວ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຕື່ມອີກ.

ພ້ອມກັນນີ້, ທ່ານ ທອງລຸນ ສີສຸລິດ ໄດ້ກ່າວສູນທອນພົດຕໍ່ພິທີ ເຊິ່ງບາງຕອນໄດ້ຍົກໃຫ້ເຫັນປະຫວັດສາດແຫ່ງຕົ້ນກໍາເນີດ, ການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ຕະຫລອດໄລຍະ 75 ປີ ທີ່ຜ່ານມາ ວ່າ: ວັນທີ 20 ມັງກອນ 1949 ກອງທັບລາວອິດສະຫຼະ ເຊິ່ງແມ່ນກອງທັບປະຊາຊົນລາວ ໃນປັດຈຸບັນ ໄດ້ຮັບການສ້າງຕັ້ງຂຶ້ນຢູ່ເຂດທີ່ໝັ້ນຕາແສງລາວຮຸ່ງ-ພຽງສາ, ເມືອງຊຽງຄໍ້ ແຂວງຫົວພັນ.  ພາຍຫຼັງໄດ້ຮັບການສ້າງຕັ້ງຂຶ້ນ ກອງທັບຂອງພວກເຮົາກໍໄດ້ປະເຊີນໜ້າກັບສັດຕູໂຕຮ້າຍກາດທີ່ມີກໍາລັງແຮງເໜືອກວ່ານັບທັງດ້ານກຳລັງພົນ, ອາວຸດຍຸດໂທປະກອນທີ່ທັນສະໄໝກວ່າ ແຕ່ດ້ວຍນໍ້າໃຈຮັກຊາດອັນສູງສົ່ງ ແລະ ການສືບທອດມູນເຊື້ອພິລາດອາດຫານບໍ່ຍອມຈໍານົນຂອງບັນພະບູລຸດ, ກອງທັບ ແລະ ປະຊາຊົນລາວບັນດາເຜົ່າ ຈຶ່ງໄດ້ດໍາເນີນການຕໍ່ສູ້ຢ່າງພິລະອາດຫານ ແລະ ຍາດໄດ້ໄຊຊະນະເປັນກ້າວໆມາ, ຜ່ານການເຝິກຝົນຫຼໍ່ຫຼອມ ແລະ ທົດສອບໃນແປວໄຟສົງຄາມຕໍ່ສູ້ເພື່ອຍາດເອົາເອກະລາດແຫ່ງຊາດ, ໃນສະພາບແວດລ້ອມ ແລະ ເງື່ອນໄຂຫຍຸ້ງຍາກລໍາບາກທີ່ສຸດນັ້ນກອງທັບເຮົາໄດ້ສ້າງວິລະກຳ ອັນລໍ້າເລີດຫຼາຍປະການ, ສ້າງປະຫວັດສາດຍຸກໃໝ່ ແລະ ມູນເຊື້ອວິລະຊົນຂອງຊາດລາວວິລະຊົນຢ່າງສະຫງ່າງາມ. ຕະຫຼອດໄລຍະ 75 ປີຜ່ານມາ ພັກປະຊາຊົນປະຕິວັດລາວ ໄດ້ເອົາໃຈໃສ່ນໍາພາ ແລະ ສຶກສາອົບຮົມກໍ່ສ້າງກອງທັບ, ວາງແນວທາງຍຸດທະສາດ, ຍຸດໂທບາຍຢ່າງປະດິດສ້າງ ສອດຄ່ອງກັບສະພາບການໃນແຕ່ລະໄລຍະແທດເໝາະກັບເງື່ອນໄຂ, ຈຸດພິເສດຂອງກອງທັບ, ຕາມແນວທາງການທະຫານຂອງພັກ, ອັນສໍາຄັນແມ່ນໄດ້ວາງຍຸດທະສາດ ການຕໍ່ສູ້ຢ່າງຖືກຕ້ອງ ແລະ ຍຸດໂທບາຍທີ່ຄ່ອງແຄ່ວ, ມີໄຫວພິກ, ນໍາໃຊ້ ແລະ ສົມທົບບັນດາຮູບການຕໍ່ສູ້ຢ່າງຊໍານິຊໍານານ, ພວກເຮົາເອກອ້າງທະນົງໃຈ ທີ່ເຫັນວ່າພາຍໃຕ້ການນໍາພາຂອງພັກ, ພະນັກງານ-ນັກຮົບໃນກອງທັບປະຊາຊົນລາວ ໄດ້ເສີມຂະຫຍາຍມູນເຊື້ອ ຕໍ່ສູ້ເດັດດ່ຽວ, ພິລະອາດຫານບໍ່ຍອມຈໍານົນ “ຍາກປານໃດກໍ່ບຸກ, ທຸກປານໃດກໍ່ສູ້, ເຖິງຈະເສຍສະຫຼະກໍ່ບໍ່ຫວາດຫວັ່ນ, ຍາມໃດກໍຕອບສະໜອງຕາມຄວາມຮຽກຮ້ອງຂອງພັກດ້ວຍຄວາມຈົງຮັກພັກດີ, ຊື່ສັດບໍລິສຸດ ແລະ ເດັດດ່ຽວໜຽວແໜ້ນ”, ກອງທັບເຮົາຍາມໃດກໍອີງໃສ່ປະຊາຊົນ, ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນ ດ້ວຍຄວາມບໍລິສຸດໃຈ, ຍ້ອນແນວນັ້ນຈຶ່ງໄດ້ຮັບຄວາມເອົາໃຈໃສ່ເບິ່ງແຍງ, ຖະໜອມຫອມຮັກ ແລະ ອູ້ມຊູຊ່ວຍເຫຼືອຈາກປະຊາຊົນບັນດາເຜົ່າ ອັນໄດ້ເປັນບໍ່ເກີດຂອງກໍາລັງແຮງທີ່ບໍ່ເຫືອດແຫ້ງຈັກເທື່ອ “ກອງທັບປະຊາຊົນລາວ ສົມແລ້ວທີ່ເປັນກອງທັບວິລະຊົນ ຂອງຊາດລາວວິລະຊົນ”.

info@lfnd.org.la | 021 213754 | (856-21) 453191