ສູນກາງແນວລາວສ້າງຊາດ

Lao Front For National Development

ພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 111 ປີ ຢູ່ທີ່ແຂວງຊຽງຂວາງ

     ໃນຕອນເຊົ້າຂອງວັນທີ 5 ມີນາ 2021 ນີ້, ຢູ່ທີຫ້ອງປະຊຸມຫ້ອງວ່າການປົກຄອງແຂວງຊຽງຂວາງ ໄດ້ຈັດພິທີປະຖະກະຖາວັນແມ່ຍິງສາກົນ ຄົບຮອບ 111​ ປີ ( ວັນທີ 8 ມີນາ 1910 – ວັນທີ 8 ມີນາ 2021 ); ພາຍໃຕ້ຄຳຂັວນການນຳເພດຍິງ ການບັນລຸຄວາມສະເໝີພາບ ໃນໄລຍະໂຄວິດ 19. ເປັນກຽດເຂົ້າຮ່ວມພິທີໃນຄັ້ງນີ້ ມີທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດ ແຂວງຊຽງຂວາງ, ມີທ່ານ ນາງ ຈັນທະສອນ ພູມສຸກ ກຳມະການພັກແຂວງ ປະທານສະຫະພັນແມ່ຍິງແຂວງຊຽງຂວາງ, ມີຄະນະພັກ, ຄະນະພະແນກການ ອ້ອມຂ້າງແຂວງ ຕະຫຼອດຮອດພະນັກງານບຳນານ ແລະ ເອື້ອຍນ້ອງແມ່ຍິງ ເຂົ້າຮ່ວມ.

ເອກະສານທີ່ນໍາມາປະຖະກະຖາ ໃນຄັ້ງນີ້, ມີປະຫວັດຄວາມເປັນມາຂອງວັນແມ່ຍິງສາກົນ 8 ມີນາ ຄົບຮອບ 111 ປີ ໂດຍໃຫ້ກຽດຂື້ນປາຖະກະຖາ ຂອງທ່ານ ນາງ ບົວສີ ນາຖາວົງ ເຊິ່ງທ່ານໄດ້ໃຫ້ຮູ້ວ່າ: ວັນທີ 8 ມີນາ ແມ່ນເຫດການ ທາງການເມືອງທີ່ສຳຄັນ ເປັນຂີດໝາຍແຫ່ງໄຊຊະນະອັນພຶ້ນຖານ ຂອງຂະບວນການເອື້ອຍນ້ອງແມ່ຍິງ ສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ. ໃນເມືອກ່ອນແມ່ຍິງແມ່ນຢູ່ພາຍໃຕ້ລະບອບສັກດີນາ, ນາຍທຶນ ແລະ ຖືກກົດຂີ່ຂູດຮີດຢ່າງໜັກໜ່ວງ ເຮັດວຽກຫຼາຍຊົ່ວໂມງໄດ້ຄ່າຈ້າງແຮງງານຕ່ຳ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບແມ່ຍິງ ແລະ ເດັກນ້ອຍ, ຖືກດູໝິ່ນປະໝາດ, ຖືກເປັນສິນຄ້າເຄື່ອງຫຼິ້ນ, ຖືກຂົມຂືນທໍາສຳເລົາ ແລະ ຖືກໄລ່ອອກຈາກວຽກໃນເວລາຖືພາ, ເວລາເກີດລູກ ຫຼື ເຈັບເປັນບໍ່ໄດ້ຮັບການປິ່ນປົວ.

ຍ້ອນສະພາບການດັ່ງກ່າວ ໃນວັນທີ່ 8 ມີນາ ປີ 1908 ແມ່ຍິງ ຈຳນວນ 15 ພັນຄົນ ໄດ້ເດີນຂະບວນຢູ່ເມືອງນີວຢອກ ເພື່ອທວງໃຫ້ນາຍທືນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ ແລະ ທວງໃຫ້ຝ່າຍແມ່ຍິງມີສິດໃນການອອກສຽງເລືອກຕັ້ງ ແລະ ຮັບສະໝັກເລືອກຕັ້ງ ພາຍໃຕ້ຄຳຂັວນເຂົ້າຈີ່ ແລະ ດອກກຸຫຼາບ ໝາຍເຖິງເສດຖະກິດດີຂື້ນ ແລະ ຄຸນນະພາບຊິວິດດີຂື້ນ. ວັນທີ 8 ມີນາ ຍັງເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັນກັບຜູ້ຊາຍ ທວງໃຫ້ພວກນາຍທືນແກ້ໄຂຊິວິດການເປັນຢູ່ ພາຍໃຕ້ຄຳຂັວນ ຜູ້ໜື່ງເຮັດວຽກມື້ລະ 8 ຊົ່ວໂມງ ແມ່ຍີງ ແລະ ຜູ້ຊາຍເຮັດວຽກຄືກັນຕ້ອງໄດ້ຮັບເງີນເດືອນເທົ່າກັນ ຕ້ອງມີລະບອບປະກັນສຸຂະພາບຂອງແມ່ຍິງ ແລະ ເດກນ້ອຍ ຕ້ານສົງຄາມຮຸກຮານ, ປັກປັກຮັກສາສັນຕິພາບຂອງໂລກ ນັບແຕ່ນັ້ນມາ ວັນທີ 8 ມີນາ ຈິງເປັນວັນແມ່ຍິງສາກົນ ມາເຖິງປັດຈຸບັນ. ພ້ອມກັນນັ້ນ, ຍັງໄດ້ຜ່ານຜົນງານທີ່ພົ້ນເດັ່ນ ຂອງສະຫະພັນແມ່ຍິງແຂວງຊຽງຂວາງໃນໄລຍະ 1 ປີຜ່ານມາ ຕື່ມອີກ.

ໃນຕອນທ້າຍ ທ່ານ ນາງ ບົວສີ ນາຖາວົງ ໄດ້ມີຄຳເຫັນໂອ້ລົມຕໍ່ພິທີ  ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ສະຫະພັນແມ່ຍິງແຂວງຊຽງຂວາງ ສາມາດຍາດມາໄດ້ ໃນໄລຍະ 1 ປີ ຜ່ານມາ ເຊີ່ງເວລາໃດກໍ່ໄດ້ເອົາໃຈໃສ່ຊີ້ນຳໆພາ ຊຸກຍູ້ສົ່ງເສີມໃຫ້ອົງການຈັດຕັ້ງສະຫະພັນແມ່ຍິງ ແຕ່ລະຂັ້ນໃຫ້ມີຄວາມເຂັ້ມແຂວງ ແລະ ການເປັນແວ່ນແຍງ, ເປັນແມ່ແບບອັນດີເລີດໃຫ້ຄົນຮຸ່ນຫຼັງສືບທອດ ພ້ອມທັງໄດ້ຮຽກຮ້ອງໃຫ້ແມ່ຍິງບັນດາເຜົ່າ. ເວົ້າລວມ, ເວົ້າສະເພາະ ກໍ່ແມ່ນເອື້ອຍນ້ອງແມ່ຍິງບັນດາເຜົ່າທົ່ວແຂວງຊຽງຂວາງ ຈົ່ງສືບຕໍ່ເສີມຂະຫຍາຍມູນເຊື້ອອັນດີງາມຂອງຊາດ, ຂອງແມ່ຍິງລາວ ເສີມຂະຫຍາຍຜົນງານ, ຄວາມສາມັກຄີປອງດອງທັງພາຍໃນ ແລະ ພາຍນອກໃຫ້ກວ້າງຂວາງ.

info@lfnd.org.la | 021 213754 | (856-21) 453191