ສູນກາງແນວລາວສ້າງຊາດ

Lao Front For National Development

ພິທີຮັບຮອງຄອບຄົວ ແລະ ບ້ານສາມັກຄີປອງດອງ ຈຳນວນ 5 ບ້ານ ຂອງແນວລາວສ້າງຊາດເມີໍອງບຸນໃຕ້ ແຂວງຜົ້ງສາລີ.

ໃນຕອນເຊົ້າວັນທີ  15 ມັງກອນ  2021 ທີ່ຜ່ານມາ ທີ່ສະໂມສອນ ບ້ານຈາຄຳແດງ ເມືອງບຸນໃຕ້ ແຂວງຜົ້ງສາລີ ແນວລາວສ້າງຊາດເມືອງບຸນໃຕ້ ໄດ້ຈັດພິທີປະກາດຮັບຮອງເອົາ ບ້ານຈາຄຳແດງ, ບ້ານຈາຫຼວງລີ, ບ້ານນາແຕນ, ບ້ານທ້າວດວງ ແລະ ບ້ານສະປາ ເປັນຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດເມືອງຂື້ນ; ພາຍໃຕ້ການເປັນປະທານຂອງທ່ານ ສານ ສີວົງສາ ກຳມະການປະຈຳພັກເມີໍອງ, ປະທານແນວລາວສ້າງຊາດເມີໍອງບຸນໃຕ້, ເປັນກຽດເຂົ້າຮ່ວມຂອງທ່ານ ຈັນທະວົງ ສາວັນໄຊ ກຳມະການສູນກາງແນວລາວສ້າງຊາດ, ຮອງປະທານແນວລາວສ້າງຊາດແຂວງ, ມີທ່ານ ບຸນເພັງ ດວງພະຈັນ ເລຂາຄະນະພັກຮາກຖານກຸ່ມບ້ານນາແຕ່ນ, ເລຂານາຍບ້ານ 7 ບ້ານທີ່ຂຶ້ນກັບກຸ່ມ ບ້ານນາແຕ່ນ ພ້ອມດ້ວຍອົງການຈັດຕັ້ງຂັ້ນບ້ານ ແລະ ມີປະທານ, ຮອງປະທານ, ເຖົ້າແກ່ແນວໂຮມຕະຫຼອດຮອດພໍ່ແມ່ປະຊາຊົນພາຍໃນ 5 ບ້ານເຂົ້າຮ່ວມ.

ໃນພິທີ ທ່ານ ບຸນສະຫວັນ ແສງຄຳດີ ຮອງປະທານແນວລາວສ້າງຊາດເມືອງບຸນໃຕ້ ໄດ້ຂຶ້ນຜ່ານບົດລາຍງານກ່ຽວກັນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງກຸ່ມບ້ານນາແຕ່ນ ໃນໄລຍະທີ່ຜ່ານມາ, ທົ່ວກຸ່ມມີ 3 ຊົນເຜົ່າຄີໍ: ເຜົ່າອາຄາ, ເຜົ່າຢັ້ງ ແລະ ເຜົ່າບິດ ລວມມີຈຳນວນ 7 ໝູ່ບ້ານ, 426 ຫຼັງຄາເຮືອນ, 575 ຄອບຄົວ. ໃນນັ້ນ ຜ່ານການຈັດຕັ້ງປະຕິບັດການປະເມີນຕາມ 4 ມາດຖານຂອງຄອບຄົວ ແລະ 5 ມາດຖານຂອງບ້ານສາມັກຄິປອງດອງ​ ສາມາດປະເມີນໄດ້ 5 ໝູ່ບ້ານຄື: ບ້ານນາແຕນ, ບ້ານຈາຄຳແດງ, ບ້ານທ້າວດວງ, ບ້ານສະປາ ແລະ ບ້ານຈາຫຼວງລີ ລວມທັງໝົດ: 519 ຄອບຄົວ.

ໃນພິທີທີ່ມີຄວາມໝາຍຄວາມສຳຄັນນັ້ນ ທາງຄະນະນຳຂັ້ນເມືອງ ແລະ ຂັ້ນແຂວງກໍ່ໄດ້ຂື້ນມອບໃບຢັ້ງຢືນຄອບຄົວສາມັກຄີປອງດອງຈຳນວນ 519 ຄອບຄົວ ແລະ ໃບຢັ້ງຢືນບ້ານສາມັກຄີປອງດອງໃຫ້ 5 ບ້ານ; ມອບໃບຍ້ອງຍໍ ແລະ ມອບຫຼຽນກາລະນຶກ 70 ປີ ວັນສ້າງງຕັ້ງແນວລາວສ້າງຊາດໃຫ້ແກ່ບຸກຄົນທີ່ມີຜົນງານດີເດັ່ນໃນການປະກອບສ່ວນເຄື່ອນໄຫວວຽກງານແນວລາວສ້າງຊາດ ຕະຫຼອດໄລຍະ 5 ປີຜ່ານມາ.

ຕອນທ້າຍໄດ້ຮັບຟັງການໂອ້ລົມ ຂອງທ່ານປະທານແນວລາວສ້າງຊາດເມືອງ ເຊິ່ງທ່ານໄດ້ຮຽກຮ້ອງໃຫ້ອົງການປົກຄອງບ້ານ ເພີ່ມທະວີປັບປຸງຮາກຖານການເມືອງ ໃຫ້ໜັກແໜ້ນກວ່າເກົ່າ ໂດຍສະເພາະແມ່ນອົງການຈັດຕັ້ງບ້ານ ໃຫ້ເຄື່ອນໄຫວຕາມພາລະບົດບາດຢ່າງເຂັ້ມງວດ, ເອົາໃຈໃສ່ສ້າງເສດຖະກິດຄອບຄົວໃຫ້ເຂັ້ມແຂງ, ນຳໃຊ້ຢ່າງປະຍັດມັດທະຍັດ, ຕີຖອຍແນວຄິດຫຼິນກິນຟຸມເຟືອຍ, ປະຊາຊົນບັນດາເຜົ່າທຸກຄົນໃນແຕ່ລະບ້ານຍົກສູງຄວາມເປັນເຈົ້າການ ວຽກງານປ້ອງກັນຊາດ-ປ້ອງການຄວາມສະຫງົບ ແນໃສ່ເຮັດໃຫ້ສັງຄົມມີຄວາມສະຫງົບສຸກ.

info@lfnd.org.la | 021 213754 | (856-21) 453191