ສູນກາງແນວລາວສ້າງຊາດ

Lao Front For National Development

ພິທີເຊັນບົດບັນທຶກຄວາມເຂົ້າໃຈການຮ່ວມມື ລະຫວ່າງ ສູນກາງແນວລາວສ້າງຊາດ ກັບບໍລິສັດ Garuda Media ຈຳກັດ

ເພື່ອເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ຂອງສອງຊາດລາວ-ຈີນ ແລະ ເພື່ອຈັດຕັ້ງຜັນຂະຫຍາຍ 5 ແຜນງານໃນການພັດທະນາວຽກງານແນວລາວສ້າງຊາດ ໂດຍສະເພາະແມ່ນແຜນງານວ່າດ້ວຍການຮ່ວມມືກັບອົງການພາຄີ ແລະ ການຮ່ວມມືສາກົນ.
ທີ່ຫ້ອງປະຊຸມໃຫຍ່ສຳນັກງານ ສູນກາງແນວລາວສ້າງຊາດ(ສນຊ) ໃນວັນທີ 1 ກໍລະກົດ 2024 ນີ້, ກົມໂຄສະນາ ສນຊ ຮ່ວມກັບ ກັບບໍລິສັດ Garuda Media ຈຳກັດ ( ສປ ຈີນ) ໄດ້ເຊັນບົດບັນທຶກຄວາມເຂົ້າໃຈການຮ່ວມມື ໃນການຍົກລະດັບວາລະສານ “ລາວສ້າງຊາດ”. ເປັນກຽດເຂົ້າຮ່ວມ ມີທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານ ສນຊ ແລະ ຕາງໜ້າ ສນຊ ເຊັນບົດບັນທຶກ ໂດຍທ່ານ ນາງ ແພງພັນ ບຸບຜາພອນ ຫົວໜ້າກົມໂຄສະນາ ສນຊ ແລະ ຕາງໜ້າບໍລິສັດເຊັນໂດຍ ທ່ານ ຢູຍ ຕິ້ງຄັ້ງ (XOU TINGKANG) ປະທານບໍລິສັດ Garuda Media ພ້ອມດ້ວຍພາກສ່ວນ¬ທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ.
ໃນພິທີເຊັນບົດບັນທຶກຄວາມເຂົ້າໃຈການຮ່ວມມືຄັ້ງນີ້, ທັງສອງຝ່າຍໄດ້ຕົກລົງເປັນເອກະພາບຮ່ວມມືກັນໃນການດຳເນີນການປັບປຸງວາລະສານ ຂອງແນວລາວສ້າງຊາດ ເປັນຕົ້ນແມ່ນທາງດ້ານເນື້ອໃນ, ຮູບແບບ, ສີສັນ, ພາສາ ແລະ ເປົ້າໝາຍໃນການແຈກຢາຍ ໄປສູ່ຄຸນນະພາບໃໝ່ ແລະ ກ້າວໄປສູ່ສາກົນ; ເຫັນດີຮ່ວມກັນຈັດພິມວາລະສານເປັນລາຍເດືອນ, ພິມຈຳນວນ 15,000 ຫົວ/ສະບັບ ແລະ ພິມເປັນ 3 ພາສາຄື: ພາສາລາວ, ພາສາຈີນ ແລະ ພາສາອັງກິດ ໂດຍແມ່ນບໍລິສັດເປັນຜູ້ສະໜອງງົບປະມານໃນການຈັດພິມທັງໝົດ ເພື່ອເຜີຍແຜ່ໂຄສະນາໃຫ້ທົ່ວສັງຄົມທັງພາຍໃນ ແລະ ຕ່າງປະເທດໄດ້ຮັບຮູ້ເຂົ້າໃຈ ກ່ຽວກັບຂໍ້ມູນຂ່າວສານຂອງປະເທດລາວ ໂດຍສະເພາະແມ່ນວັດທະນະທຳ-ສັງຄົມ ເວົ້າລວມ ເວົ້າສະເພາະແມ່ນພາລະບົດບາດ, ສິດ, ໜ້າທີ່ ແລະ ຜົນງານທີ່ພົ້ນເດັ່ນໃນການເຄື່ອນໄຫວວຽກງານຕ່າງໆ ຂອງອົງການແນວລາວສ້າງຊາດ ທຸກຂັ້ນທົ່ວປະເທດ ແນໃສ່ດຶງດູດນັກທ່ອງທ່ຽວ ແລະ ຜູ້ທີ່ສົນໃຈລົງທຶນ ຢູ່ ສປປ ລາວ ໃຫ້ມາທ່ອງທ່ຽວ ແລະ ລົງທຶນຫຼາຍຂຶ້ນ.
ຂ່າວ+ພາບ: ຢຢ
ບກ: ພ.ບຸບຜາ

info@lfnd.org.la | 021 213754 | (856-21) 453191