ສູນກາງແນວລາວສ້າງຊາດ

Lao Front For National Development

ພິທີເປີດກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 3 ສະໄໝທີ XI

     ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດຄັ້ງທີ 3 ສະໄໝທີ XI ໄດ້ໄຂຂຶ້ນຢ່າງເປັນທາງການ ທີ່ຫ້ອງປະຊຸມໃຫຍ່ສູນກາງແນວລາວສ້າງຊາດ ໃນວັນທີ 10 ມັງກອນ 2024 ນີ້ ໂດຍໃຫ້ກຽດກ່າວເປີດ ແລະ ເປັນປະທານຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະ ທານສູນກາງແນວລາວສ້າງຊາດ, ມີພະເຖລານຸເຖລະ, ບັນດາທ່ານຮອງປະທານສູນກາງແນວລາວສ້າງຊາດ, ປະ ທານແນວລາວສ້າງຊາດແຂວງ-ນະຄອນຫຼວງ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ກໍາມະການສູນກາງແນວລາວສ້າງຊາດຢູ່ຕ່າງປະເທດ, ຄະນະທີ່ປຶກສາ ແລະ ຄູ່ຮ່ວມງານ ພ້ອມດ້ວຍແຂກຖືກເຊີນເຂົ້າຮ່ວມ; ເຊິ່ງກອງ ປະຊຸມຄັ້ງນີ້ ໄດ້ຈັດເປັນສອງຮູບແບບຄື: ຮູບແບບປົກກະຕິຢູ່ນະຄອນຫຼວງວຽງຈັນ ແລະ ຮູບແບບວີດີໂອທາງໄກຢູ່ບັນດາແຂວງທົ່ວປະເທດ.
     ທ່ານປະທານ ສູນກາງແນວລາວສ້າງຊາດຊາດ ໄດ້ກ່າວວ່າ: ກອງປະຊຸມຄົບຄະນະກໍາມະການ ໃນຄັ້ງນີ້ ເປັນກອງປະຊຸມທີ່ມີຄວາມໝາຍສໍາຄັນ ແລະ ຢູູ່ໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ປວງຊົນລາວ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ IX ຕິດພັນກັບການສືບຕໍ່ປະຕິບັດ 2 ວາລະແຫ່ງຊາດເຄິ່ງສະໄໝ, ລວມທັງຂໍ່ານັບຮັບຕ້ອນ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ເຊິ່ງໃນວາລະກອງປະຊຸມ ຈະໄດ້ຮັບຟັງລາຍງານກ່ຽວກັບຜົນການ ຈັດຕັ້ງປະຕິບັດມະຕິກອງປະຊຸມສາມັນຄົບຄະນະກໍາມະການ ສນຊ ຄັ້ງທີ 2; ແຜນພັດທະນາອົງການແນວລາວສ້າງຊາດ ປະຈໍາປີ 2023 ແລະ ແຜນວຽກຈຸດສຸມປີ 2024 ເຊິ່ງຈະໄດ້ລົງເລິກຕີລາຄາສະພາບ ແລະ ໝາກຜົນຂອງການເສີມສ້າງຄວາມສາມັກຄີເປັນປຶກແຜ່ນ ລວມທັງຂະບວນການແຂ່ງຂັນຮັກຊາດ ແລະ ພັດ ທະນາ ຂອງປວງຊົນລາວ ແລະ ວຽກງານຕ່າງໆທີ່ກອງປະຊຸມໄດ້ກໍານົດໄວ້ ເພື່ອເປັນການຢັ້ງຢືນຕໍ່ຜົນສໍາເລັດດ້ານດີ-ດ້ານອ່ອນ, ບົດຮຽນທີ່ຖອດຖອນໄດ້ ໃນການເຄື່ອນໄຫວວຽກງານທີ່ຜ່ານມາ; ພ້ອມກັນນັ້ນ, ຈະຄົ້ນຄວ້າ ເຊື່ອມຊຶມ ແລະ ຜັນຂະຫຍາຍມະຕິຂອງສູນກາງພັກ ແລະ ແຜນພັດທະນາຂອງລັດຖະບານ ເຂົ້າໃນວຽກງານແນວໂຮມ ປີ 2024; ຮັບຟັງລາຍງານການປະເມີນກ່ຽວກັບບັນດາມະຕິຕົກລົງຂອງຄະນະປະຈໍາ ສູນກາງແນວລາວສ້າງຊາດ; ໃນນີ້, ຍັງຈະໄດ້ຮັບຟັງການປະກອບຄໍາເຫັນຈາກ ບັນດາທ່ານກໍາມະການສູນກາງແນວ ລາວສ້າງຊາດ. ນອກຈາກນີ້, ຍັງຈະໄດ້ຮັບຟັງການເຜີຍແຜ່, ເຊື່ອມຊຶມ ແລະ ຜັນຂະຫຍາຍມະຕິຂອງສູນກາງພັກ ສະໄໝທີ XI ແລະ ແຜນວຽກລັດຖະບານ; ພ້ອມນີ້ ຈະໄດ້ມີການພິຈາລະນາຮັບຮອງເອົາການແຕ່ງຕັ້ງ ກໍາມະການ ສນຊ ເພີ່ມເຕີມ ແລະ ປ່ຽນແທນຈໍານວນໜຶ່ງ. ກອງປະຊຸມໃນຄັ້ງນີ້ຈະດໍາເນີນເປັນເວລາ 2 ວັນ ແຕ່ວັນທີ 10-11 ມັງກອນ ຈຶ່ງສໍາເລັດ. ຫຼັງຈາກນັ້ນ, ຜູ້ແທນກອງປະຊຸມຈະໄດ້ຮັບຟັງປາຖະກະຖາ ວັນສ້າງ ຕັ້ງກອງທັບປະຊາຊົນລາວ ຄົບຮອບ 75 ປີ ໃນວັນທີ 12 ມັງກອນ 2023 ນີ້ ແລະ ຍັງຈະໄດ້ໄປທັດສະນະຢ້ຽມຢາມສະຖານທີ່ທ່ອງທ່ຽວຢູ່ນະຄອນຫຼວງວຽງຈັນຈໍານວນໜຶ່ງຕື່ມອີກ.
ບກ: ພ.ບຸບຜາ
ຂ່າວ: ອິນທະຫວາ
ພາບ: ລີ+ແສງຫຼ້າ
 
info@lfnd.org.la | 021 213754 | (856-21) 453191