ວັນທີ 23 ກໍລະກົດ 2020 ນີ້, ກົມສາສະໜາ ສູນກາງແນວລາວສ້າງຊາດ ໄດ້ຈັດພິ¬ທີມອບເງິນສົດ 30 ລ້ານກີບ

ເພື່ອເປັນການປະກອບສ່ວນສ້າງນໍ້າບາດານ ໃຫ້ແກ່ ສາມບ້ານຄື: ບ້ານຫ້ວຍທໍາ, ບ້ານນາພຽງລ້ານ ແລະ ບ້ານຜາຂຽດ ເມືອງບົວລະພາ, ແຂວງຄໍາມ່ວນ. ໂດຍເປັນກຽດເຂົ້າຮ່ວມຂອງທ່ານ ຮສ. ດຣ ສົມອົກ ກິ່ງສະດາ ຮອງປະທານ ສນຊ, ມີ ທ່ານ ສິງຄໍາ ພູລິພັນ ຮັກສາການປະທານສູນລວມ ຄຣິດຕະຈັກຄະນະວັນເສົາ, ມີຜູ້ຕາງໜ້າກົມສາສະໜາ ສນຊ ເຂົ້າຮ່ວມ.
ອີງຕາມການສະເໜີຂໍການຊ່ວຍເຫຼືອສ້າງນໍ້າບາດານ ແລະ ສຸກຂະອານາໄມ ຂອງກົມສາສະໜາ ຄັ້ງວັນທີ 11 ກຸມພາ 2020 ທີ່ຜ່ານມາ; ສູນລວມຄຣິສຕະຈັກຄະນະວັນເສົາ ສປປ ລາວ ມີຄວາມຍິນດີປະກອບສ່ວນຊ່ວຍສ້າງລະບົບນໍ້າບາດານໃຫ້ແກ່ 3 ບ້ານດັ່ງກ່າວ ລວມເປັນມູນຄ່າ 30 ລ້ານກີບ ຕາງໜ້າມອບໂດຍທ່ານ ຮສ. ດຣ ສົມອົກ ກິ່ງສະດາ ຮອງປະທານ ສູນກາງແນວລາວສ້າງຊາດ (ຜູ້ຊີ້ນໍາວຽກງານສາສະໜາ) ແລະ ກ່າວຮັບໂດຍ ທ່ານ ວັນດີ ນາໂຄວົງ ຜູ້ຊົງຄຸນວຸດທິ ຊິ່ງທ່ານໄດ້ສະແດງຄວາມຂອບໃຈເປັນຢ່າງສູງຕໍ່ກັບສູນກາງແນວລາວສ້າງຊາດ ແລະ ສູນລວມຄຣິສຕະຈັກຄະນະວັນເສົາ ທີ່ມີນໍ້າໃຈເອື້ອເຟື້ອເພື່ອແຜ່ປະກອບສ່ວນເງິນຄັ້ງນີ້, ພວກເຮົາຈະນໍາໄປສ້າງນໍ້າບາດານໃຫ້ປະຊາຊົນໄດ້ຮັບໃຊ້ ແລະ ຫວັງວ່າໂອກາດໜ້າຈະໄດ້ຮັບການຊ່ວຍເຫຼືອຈາກບັນດາທ່ານຕື່ມອີກ.