ວັນທີ 26 ມີນາ 2024 ນີ້ ສູນກາງແນວລາວສ້າງຊາດ (ສນຊ) ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ໃຫ້ແກ່ບັນດາໜ່ວຍພັກ ອ້ອມຂ້າງສູນກາງແນວລາວສ້າງຊາດໃຫ້ກຽດມອບໂດຍ ສະຫາຍ ດຣ. ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງເລຂາຄະນະພັກ, ຮອງປະທານ ສນຊ, ມີບັນດາສະຫາຍ ຄະນະພັກ, ຄະນະປະຈຳ ສນຊ, ເລຂາ-ຮອງເລຂາໜ່ວຍພັກ ແລະ ສະມາຊິກພັກ ພ້ອມດ້ວຍພະນັກງານ-ລັດຖະກອນ ຂອງສູນກາງແນວລາວສ້າງຊາດເຂົ້າຮ່ວມ.

ໂດຍອິງໃສ່ມະຕິຕົກລົງ ຂອງຄະນະປະຈໍາພັກສູນກາງແນວລາວສ້າງຊາດ ເລກທີ 47/ຄປພ, ລົງວັນທີ 8 ກຸມພາ 2024 ວ່າດ້ວຍ ການມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ໃຫ້ແກ່ບັນດາໜ່ວຍພັກ ທີ່ຂຶ້ນກັບອົງຄະນະພັກສູນກາງແນວລາວສ້າງຊາດ, ເຊິ່ງປະກອບມີ 8 ໜ່ວຍພັກຂຶ້ນກັບ, ມີສະມາຊິກພັກທັງໝົດ 146 ສະຫາຍ, ຜ່ານການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ຂອງບັນດາໜ່ວຍພັກ ຕາມ 5 ເນື້ອໃນຄື: ດ້ານການເມືອງ; ດ້ານແນວຄິດ; ດ້ານການຈັດຕັ້ງ; ດ້ານແບບແຜນນໍາພາ; ດ້ານການປະຕິບັດໜ້າທີ່ການເມືອງທີ່ໄດ້ຮັບມອບໝາຍ. ມີ 7 ໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄື: ໜ່ວຍພັກກົມຈັດຕັ້ງ ແລະ ພະນັກງານ, ໜ່ວຍພັກຫ້ອງການ, ໜ່ວຍພັກກົມໂຄສະນາ, ໜ່ວຍພັກກົມກວດກາ, ໜ່ວຍພັກກົມຊົນເຜົ່າ, ໜ່ວຍພັກກົມຊັ້ນຄົນ-ການຈັດຕັ້ງທາງສັງຄົມ ແລະ ໜ່ວຍພັກສູນຄົ້ນຄວ້າ ແລະ ຝຶກອົບຮົມ. ພ້ອມກັນນີ້, ສະຫາຍ ດຣ. ນາງ ອິນລາວັນ ແກ້ວບຸນພັນ ກໍໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2023 ໃຫ້ແກ່ 7 ໜ່ວຍພັກດັ່ງກ່າວ.

ສະຫາຍ ຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ທີ່ບັນດາໜ່ວຍພັກສາມາດຍາດໄດ້ຜົນງານອັນໃຫຍ່ຫຼວງໃນໄລຍະຜ່ານມາ, ເພື່ອສືບຕໍ່ຍົກສູງຄຸນນະພາບຂອງສະມາຊິກພັກ, ໜ່ວຍພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ເພື່ອກໍ່ສ້າງພັກ-ພະນັກງານໃຫ້ມີຄວາມຮູ້ຄວາມສາມາດ, ມີຄຸນທາດການເມືອງ, ເປັນເສນາທິການໃຫ້ຄະນະພັກ, ເພື່ອສ້າງຄວາມສາມັກຄີເປັນປຶກແຜ່ນ, ຄວາມເປັນເອກະພາບຢູ່ບັນດາໜ່ວຍພັກຢ່າງແໜ້ນແຟ້ນ, ຢຶດໝັ້ນຫຼັກການລວມສູນປະຊາທິປະໄຕ ແລະ ສືບຕໍ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນຕໍ່ໜ້າ.

ບກ: ສຊ ຈື້ໄຊ

ຂ່າວ: ສຸວັນລີ

ພາບ: ແສງຫຼ້າ