ສູນກາງແນວລາວສ້າງຊາດ

Lao Front For National Development

ພິທີ ມອບ​ຮັບໜ້າທີ່​ລະຫວ່າງ​ປະທານ​ແນວ​ລາວ​ສ້າງ​ຊາ​ດ​ແຂວງ​ວຽງຈັນ ຜູ້​ເກົ່າ ​ແລະ ຜູ້​​ໃໝ່.

​        ໃນ​ວັນ​ທີ 3 ກຸມພາ 2021 ນີ້, ແນວ​ລາວ​ສ້າງ​ຊາດ​ແຂວງ​ວຽງຈັນ ​ໄດ້ຈັດ​ພິທີ​ມອບ​ຮັບໜ້າທີ່​ ລະຫວ່າງ​ ປະທານ​ແນວ​ລາວ​ສ້າງ​ຊາດແຂວງ​ຜູ້​​ເກົ່າ ​ແລະ ຜູ້​​ໃໝ່ ຂື້ນ​ຢູ່​ທີ່​ຫ້ອງ​ປະຊຸມ​ແນວ​ລາວ​ສ້າງ​ຊາດແຂວງ ​ໂດຍ​ເປັນກຽດ​ເຂົ້າຮ່ວມຂອງ ທ່ານ ຄຳ​ພັນ ສິດທິ​ດຳ​ພາ ​ເລຂາ​ພັກ​ແຂວງ ​ເຈົ້າ​ແຂວງ​ວຽງຈັນ, ​​ມີຮອງ​ເລຂາ​ພັກ​ແຂວງ, ຄະນະ​ປະຈຳ​ພັກ​ແຂວງ,​ ກຳມະການພັກ​ແຂວງ, ປະທານ-ຮອງ​ປະທານແນວ​ລາວ​ສ້າງ​ຊາດເມືອງ ອ້ອມຂ້າງແຂວງ ພ້ອມ​ດ້ວຍພາກສ່ວນກ່ຽວຂ້ອງ ​ເຂົ້າ​ຮ່ວມ​.

ທ່ານ ທອງ​ສະຫວັນ ວົງ​ສຳພັນ ປະທານ​ແນວ​ລາວ​ສ້າງ​ຊາດ​ແຂວງ​ວຽງຈັນ(ຜູ້ເກົ່າ) ​ໄດ້​ຜ່ານ​ບົດ​ສະຫຼຸບການຈັດ​ຕັ້ງ​ປະຕິບັດ​ວຽກງານ​ ​ແນວ​ລາວ​ສ້າງ​ຊາດ ​ໃນ​ໄລຍະ 5 ປີຜ່ານມາ ​​ ເຊິ່ງສະ​ແດງ​ອອກ​​ເຖິງຜົນງານທີ່​ພົ້ນ​ເດັ່ນ​ໃນ​ຫຼາຍດ້ານ ​ເປັນ​ຕົ້ນ:  ວຽກງານ​ສຶກສາ​ອົບຮົມ​ການ​ເມືອງ-​ແນວ​ຄິດ ​ໄດ້​ເປັນ​ຄັນ​ທຸງ​ໃນ​ການ​ເຕົ້າ​ໂຮມ​ຄວາມ​ສາມັກຄີ​ປອງ​ດອງ​ ປະຊາຊົນ​ບັນດາ​ເຜົ່າ, ປຸກ​ລະ​ດົມ​ປະຊາຊົນ​ໃນ​ທົ່ວ​ແຂວງ​ວຽງຈັນ ​ເຂົ້າ​ຮ່ວມ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ, ​ເສີມ​ຂະຫຍາຍ​ສິດ​ເປັນ​ເຈົ້າ​ໃນ​ການ​ປົກ​ປັກ​ຮັກສາ​ຮີດຄອງ​ປະ​ເພນີ​ອັນ​ດີງາມ, ປົກ​ປ້ອງ​ສິດຜົນປະ​ໂຫຍ​ດອັນ​ຊອບ​ທຳ​ ຂອງ​ປະຊາຊົນ, ​ເກັບ​ກຳ​ຫາງ​ສຽງຄວາມ​ມຸ່ງ​ມາດ​ປາຖະໜາຂອງປະຊາຊົນ ພ້ອມ​ທັງ​ຮັບ​ຟັງ​ຄຳ​ຄິດ​ເຫັນ ​ເພື່ອ​ແກ້​ໄຂ​ຕາມ​ພາລະ​ບົດບາດ​, ສິດ ແລະ ໜ້າທີ່ ຂອງ​ຕົນ​ຮັບຜິດຊອບ​, ​ເປັນ​ໃຈກາງປະສານ​ສົມທົບ​ກັບ​ບັນດາ​ອົງການຈັດຕັ້ງ​ພາຄີ, ຈັດ​ຕັ້ງ​ເຊື່ອມ​ຊຶມ​ແນວທາງ​ນະ​ໂຍບາຍ​ຂອງ​ພັກ-ລະບຽບກົດໝາຍຂອງ​ລັດ, ສ້າງ​ໄດ້ຄອບຄົວ ​ແລະ ບ້ານ​ສາມັກຄີ​ປອງ​ດອງ ທົ່ວ​ແຂວງ ສາມາດ​ປະກາດ​ໄດ້ 252 ບ້ານ, ມີ 55.567 ຄອບຄົວ ​ແລະ ກຳລັງກະກຽມ​ເປີດ​ເມືອງ​ວຽງຄໍາ​ເປັນ​ເມືອງ​ສາມັກຄີ​ປອງ​ດອງໃນຕໍ່ໜ້າ.

​ໃນ​ໂອກາດ​ນີ້, ທ່ານ ທອງ​ສະຫວັນ ວົງ​ສຳພັນ ປະທານ​ແນວ​ລາວ​ສ້າງ​ຊາດ(ຜູ້​ເກົ່າ) ​ແລະ ທ່ານ ​ເທບພະ​ໄທ ​ແກ້ວ​ເຂັມ​ເພັດ ປະທານ​ແນວ​ລາວ​ສ້າງ​ຊາດ(ຜູ້​​ໃໝ່) ​ໄດ້​ເຊັນ​ບົດ​ບັນທຶກມອບ​ວຽກງານ​ ​ຢ່າງ​ເປັນ​ທາງ​ການ ​ເພື່ອ​ມອບ​ວຽກງານ​ແນວ​ລາວ​ສ້າງ​ຊາດ​ໃຫ້ ປະທານແນວລາວສາ້ງຊາດແຂວງ(​ຜູ້​ໃໝ່) ສືບຕໍ່ຊີ້​ນຳ​-ນຳພາຈັດ​ຕັ້ງ​ປະຕິບັດ​ວຽກງານແນວລາວສ້າງຊາດ ຢ່າງ​ຕັ້ງໜ້າ ​ແລ​ະ ປັບປຸງ​​ແກ້​ໄຂ​ວຽກງານຕ່າງໆທີ່ກ່ຽວຂ້ອງ ກໍ່ຄື​ແຜນການໃນ 5 ປີຕໍ່ໜ້າ.

​​ຕອນ​ທ້າຍພິທີ ທ່ານ ​ເຈົ້າ​ແຂວງໆວຽງຈັນ​ ໄດ້​ມີ​ຄໍາ​ເຫັນ​ໂອ້​ລົມ ​ເຊິ່ງ​ກ່ອນ​ອື່ນ​ ທ່ານໄດ້ສະແດງຄວາມ​ຍ້ອງຍໍ​ຊົມ​ເຊີຍ​ຕໍ່ຜົນ​ການ​​ເຄື່ອນ​ໄຫວ​ ຂອງຄະນະ​ກຳມະການ​ແນວ​ລາວ​ສ້າງ​ຊາດ​ແຂວງ​ຊຸດ​ເກົ່າ ແລະ ທ່ານໄດ້ເນັ້ນຕື່ມວ່າ: ໃຫ້​​ຄະນະ​ກຳມະການ​ແນວ​ລາວ​ສ້າງ​ຊາດ​ແຂວງ​ຊຸດ​ໃໝ່ ຈົ່ງສືບຕໍ່​​ເອົາ​​ໃຈ​ໃສ່​​ເຮັດ​ວຽກງານ​ສຶກສາ​ອົບຮົມການ​ເມືອງ​-ແນວ​ຄິດ, ຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ 7 ຜູ້​ແທນ​ແນວ​ລາວ​ສ້າງ​ຊາດ​ແຂວງ​ວຽງຈັນ ລົງ​ສູ່​ທ້ອງ​ຖິ່ນ​ໃຫ້​ເລິກ​ເຊິ່ງກວ້າງຂວາງ​, ຫັນ​ເອົາ​ວຽກງານ​ກໍ່ສ້າງ​ຮາກ​ຖານການ​ເມືອງ​ຕິດ​ພັນ​ກັບ​ວຽກງານ 3 ສ້າງ​ ຕາມ​ແນວທາງ​ນະ​ໂຍບາຍ​ຂອງ​ພັກ-ລະບຽບກົດໝາຍຂອງ​ລັດ, ສືບຕໍ່ປັບປຸງ​ກົງຈັກ​ການຈັດ​ຕັ້ງ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ຄະນະ​ກຳມະການ​ແນວ​ລາວ​ສ້າງ​ຊາດ​ຂັ້ນ​ເມືອງ,​ ຂັ້ນ​ບ້ານ, ສ້າງ​ກອງ​ທຶນ​ພັດທະນາ,​ ສ້າງ​ຄອບຄົວ, ບ້ານ ​ແລະ ​ເມືອງ​ສາມັກຄີ​ປອງ​ດອງ ພ້ອມ​ທັງ​ນຳ​ເອົາ​ເນື້ອ​ໃນ​ຈິດ​ໃຈ​ພິທີ​ໃນ​ຄັ້ງ​ນີ້​ໄປ​ຈັດ​ຕັ້ງ​ຜັນ​ຂະຫຍາຍ​ໃຫ້​ໄດ້​ຮັບຜົນສຳ​ເລັດ​ຕາມ​ລະດັບ​ຄາດໝາຍ.

info@lfnd.org.la | 021 213754 | (856-21) 453191