ສູນກາງແນວລາວສ້າງຊາດ

Lao Front For National Development

ພິທີ ມອບ-ຮັບໜ້າທີ່ ລະຫວ່າງປະທານແນວລາວສ້າງຊາດແຂວງຊຽງຂວາງ(ຜູ້ເກົ່າ) ແລະ (ຜູ້ໃໝ່)

ໃນຕອນແລງຂອງວັນທີ 12 ກຸມພາ 2021 ນີ້ ໄດ້ມີພິທີມອບ-ຮັບໜ້າທີ່ ລະຫວ່າງປະທານແນວລາວສ້າງຊາດແຂວງຊຽງຂວາງ(ຜູ້ເກົ່າ)ທ່ານ ດຳດີ ນັນທະວົງ ແລະ (ຜູ້ໃໝ່) ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ຂື້ນຢ່າງເປັນທາງການ. ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການແຂວງຊຽງຂວາງ. ໂດຍເປັນກຽດເຂົ້າຮ່ວມຂອງ ທ່ານ  ໜໍບີຫາ ຕົ່ງປາວ ຮອງເລຂາພັກແແຂວງຊຽງຂວາງ, ມີທ່ານ ນາງ ພວງພະຈັນ ມູນທະວົງ ກຳມະການພັກແຂວງ, ຮອງຫົວໜ້າຄະນະຈັດຕັ້ງແຂວງ, ມີບັນດາຫົວໜ້າ-ຮອງຫົວໜ້າພະແນກການອ້ອມຂ້າງ, ມີປະທານ-ຮອງປະທານແນວລາວສ້າງຊາດ 7 ເມືອງຕະຫຼອດຮອດພະນັກງານວິຊາການແນວລາວສ້າງຊາດ ແຂວງຊຽງຂວາງ ເຂົ້າຮ່ວມ.

ໃນພິທີທ່ານ ນາງ ພວງພະຈັນ ມູນທະວົງ ກຳມະການພັກແຂວງ ຮອງຫົວໜ້າຄະນະຈັດຕັ້ງແຂວງ, ໄດ້ຂື້ນຜ່ານມະຕິຂໍ້ຕົກລົງເລກທີ 291/ຄລສພ ລົງວັນທີ 18 ທັນວາ 2020 , ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອູດໜູນບຳນານ. ຫຼັງຈາກນັ້ນ, ໃນພິທີຍັງໄດ້ຮັບຟັງການສະຫຼຸບລາຍງານ ການຈັດຕັ້ງປະຕິບັດວຽກງານໃນຂົງເຂດແນວລາວສ້າງຊາດແຂວງໃນໄລຍະຜ່ານມາໂດຍຫຍໍ້ ຈາກທ່ານ ດຳດີ ນັນທະວົງ, ອະດີດກຳມະການພັກແຂວງ ປະທານແນວລາວສ້າງຊາດແຂວງ (ຜູ້ເກົ່າ) ໃຫ້ທີ່ປະຊຸມໄດ້ຮັບຊາບ ແລະ ໄດ້ມີພິທີເຊັນມອບ-ຮັບໜ້າຢ່າງເປັນທາງການ.

ພ້ອມກັນນີ້, ໄດ້ຮັບຟັງການໂອ້ລົມຂອງທ່ານ ຮອງເລຂາພັກແຂວງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຊີ້ນຳ-ນຳພາ ຂອງປະທານແນວລາວສ້າງຊາດຜູ້ເກົ່າ ຕະຫຼອດໄລຍະທີ່ຜ່ານມາທີ່ໄດ້ປະຕິບັດສຳເລັດໃນຫຼາຍດ້ານ ແລະ ທ່ານຍັງໄດ້້ຮຽກຮ້ອງໃຫ້ປະທານແນວລາວສ້າງຊາດຜູ້ໃໝ່ຈົ່ງສືບຕໍ່ຊີ້ນຳ-ນຳພາ ແລະ ເປັນຄັນທຸງໃນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ, ສືບຕໍ່ຊຸກຍູ້ປະຊາຊົນບັນດາເຜົ່າ ເຂົ້າຮ່ວມຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ.

 

info@lfnd.org.la | 021 213754 | (856-21) 453191