ສູນກາງແນວລາວສ້າງຊາດ

Lao Front For National Development

ພິທີ ມອບ-ຮັບ ປະທານແນວລາວສ້າງຊາດແຂວງສາລະວັນ

ແຂວງສາລະວັນ ຈັດພິທີມອບ-ຮັບ ໜ້າທີ່ ປະທານແນວລາວສ້າງຊາດແຂວງ ຢ່າງເປັນທາງການ, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ, ປະທານແນວລາວສ້າງຊາດ 8 ຕົວເມືອງ, ພະແນກການອ້ອມຂ້າງແຂວງ, ອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ພິທີໄດ້ຈັດຂຶ້ນໃນວັນທີ 23 ທັນວານີ້, ຢູ່ທີ່ຫ້ອງປະຊຸມຊາວໜຸ່ມແຂວງ.

ໂດຍປະຕິບັດຕາມຂໍ້ຕົກລົງ ຂອງຄະນະປະຈຳພັກແຂວງ ສະບັບເລກທີ 951/ຄຈພຂ.ສວ, ລົງວັນທີ 15 ທັນວາ 2020 ວ່າດ້ວຍການແບ່ງງານຂອງຄະນະບໍລິຫານງານພັກແຂວງສາລະວັນ ສະໄໝທີ IX ແລະ ການສັບປ່ຽນໜ້າທີ່ ປະທານແນວລາວສ້າງຊາດແຂວງສາລະວັນ, ລະຫວ່າງ ທ່ານ ສົມເລັດ ຈູລະມະນີ ປະທານແນວລາວສ້າງຊາດແຂວງ ຜູ້ເກົ່າ ກັບ ທ່ານ ຄຳຕາ ໂຮ່ຊົງເລືອງ ກຳມະການປະຈຳພັກແຂວງ ປະທານແນວລາວສ້າງຊາດແຂວງສາລະວັນ ຜູ້ໃໝ່. ໂດຍປະຕິບັດຕາມຂໍ້ຕົກລົງ ສະບັບເລກທີ 758, 759/ຈຂ.ສວ, ລົງວັນທີ 22 ທັນວາ 2020 ວ່າດ້ວຍການແຕ່ງຕັ້ງປະທານອົງການແນວລາວສ້າງຊາດແຂວງ ແລະ ການຍົກຍ້າຍປະທານອົງການແນວລາວສ້າງຊາດແຂວງ ຜູ້ເກົ່າ ໄປຮັບໜ້າທີ່ໃໝ່ ຢູ່ສະພາປະຊາຊົນແຂວງສາລະວັນ. ຈາກນັ້ນ, ທ່ານ ສົມເລັດ ຈູລະມະນີ ໄດ້ຜ່ານບົດສະຫຼຸບໂດຍຫຍໍ້ ກ່ຽວກັບການຊີ້ນຳໆພາວຽກງານດັ່ງ ກ່າວຕະຫຼອດໄລຍະ 5 ປີ ຜ່ານມາ, ເຊີ່ງໄດ້ຖືເອົາການສຶກສາອົບຮົມການເມືອງ-ແນວຄິດ ເປັນກົກໃຫ້ກັບຖັນແຖວສະມາ ຊິກພັກ-ພະນັກງານ ມີແນວຄິດອຸ່ນອ່ຽງທຸ່ນທ່ຽງ ແລະ ຜັນຂະຫຍາຍຈັດຕັ້ງປະຕິບັດຕາມແນວທາງນະໂຍບາຍຂອງພັກ ຢ່າງເປັນເຈົ້າການ, ພ້ອມທັງຕີລາຄາໃຫ້ເຫັນດ້ານຕັ້ງໜ້າ ໃນການຊີ້ນຳ ແລະ ນຳພາ ເຮັດໃຫ້ຂະບວນການວຽກງານ ພັດທະນາດີຂຶ້ນເປັນກ້າວໆ ແລະ ບັນດາຂໍ້ຄົງຄ້າງ, ທິດທາງແຜນການ ສືບຕໍ່ຈັດຕັ້ງປະຕິບັດໃນຕໍ່ໜ້າ, ວຽກງານການຄຸ້ມຄອງຊັບສົມບັດຂອງລັດ ແລະ ການຄຸ້ມຄອງ-ການນຳໃຊ້ຊັບສົມບັດຂອງລັດ.

ໃນຕອນທ້າຍຂອງພິທີໄດ້ຮັບຟັງຄຳໂອ້ລົມ ທ່ານ ດວງລາສີ ເຊິ່ງທ່ານຍັງໄດ້ເນັ້ນໜັກບາງບັນຫາ ເປັນຕົ້ນ: ເພື່ອເຮັດໃຫ້ການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ໃຫ້ປະກົດຜົນເປັນຈິງ ແລະ ບັນລຸຄາດໝາຍທີ່ໄດ້ວາງໄວ້. ຕ້ອງສືບຕໍ່ເອົາໃຈໃສ່ປະຕິບັດແນວທາງການປ່ຽນແປງໃໝ່ຢ່າງຮອບດ້ານ, ຖືເອົາການສຶກສາອົບຮົມທາງດ້ານການເມືອງ-ແນວຄິດ ເປັນສຳຄັນນັບແຕ່ຂັ້ນຮາກຖານ, ເອົາໃຈໃສ່ເຕົ້າໂຮມຄວາມສາມັກຄີ, ຄວາມເປັນປຶກແຜ່ນຂອງປວງຊົນທົ່ວສັງຄົມ ກໍ່ຄືພາຍໃນຢ່າງແໜ້ນແຟ້ນ, ເຊີດຊູຄວາມຮັບຜິດຊອບ, ຄວາມເປັນເຈົ້າການໃນການປະຕິບັດຕາມພາລະບົດບາດ, ສິດ ແລະ ໜ້າທີ່, ທັງຮຽກຮ້ອງອົງການຈັດຕັ້ງພາຄີ, ອົງການຈັດຕັ້ງມະຫາຊົນ ຊ່ວຍເຫຼືອເຊີ່ງກັນ ແລະ ກັນ, ເສີມຂະຫຍາຍມູນເຊື້ອ ທີ່ມີການພົວພັນກັນ ຢ່າງແໜ້ນແຟ້ນ ຜັກດັນເຮັດໃຫ້ວຽກງານແນວລາວສ້າງຊາດ ແຂວງສາລະວັນ ເຕີບໃຫຍ່, ເຂັ້ມແຂງ ແລະ ຂະຫຍາຍຕົວຂຶ້ນໄປເລື້ອຍໆ.

 

info@lfnd.org.la | 021 213754 | (856-21) 453191