ສູນກາງແນວລາວສ້າງຊາດ

Lao Front For National Development

ພິທີ ມອບ-ຮັບ ລົດກູ້ໄພ

ໃນວັນທີ 8 ທັນວາ 2017, ສະຖານທູດເຢຍລະມັນ ປະຈຳ ລາວ ໄດ້ຈັດພິທີ ມອບ-ຮັບ ລົດກູ້ໄພ ເຊິ່ງກ່າວມອບໂດຍທ່ານ ເຢັນສ ລຸດເກນແຮມ (Jens Lutkenherm)  ເອກອັກຄະລັດຖະທູດເຢຍລະມັນ ປະຈໍາ ສປປ ລາວ ແລະ ກ່າວຮັບໂດຍທ່ານ ຮສ. ດຣ ສົມອົກ ກິ່ງສະດາ ຮອງປະທ່ານ ສນຊ ໄດ້ຕາງໜ້າຄະນະກຳມະການສູນກາງແນວລາວສ້າງຊາດ ກໍຄືມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ.
ເປັນກຽດເຂົ້າຮ່ວມພິທີດັ່ງກ່າວມີທ່ານ ນາງ ພູທອນ ພູມສະຫວັນ ທີ່ປຶກສາມູນນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ ພ້ອມດ້ວຍຄະນະ ແລະ ມີພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ. ໂອກາດນີ້, ທ່ານ ຮສ. ດຣ ສົມອົກ ກິ່ງສະດາ ໄດ້ກ່າວສະແດງຄວາມຂອບໃຈເປັນຢ່າງສູງ ຕໍ່ກັບ ສະຖານທູດເຢຍລະມັນ ປະຈຳລາວ ທີ່ມີຄວາມເປັນຫວ່ງເປັນໃຍຕໍ່ປະຊາຊົນລາວ ກໍຄືຕໍ່ກັບບັນຫາອຸປະຕິເຫດຕ່າງໆທີ່ເກີດຂຶ້ນ ແລະ ໄດ້ມອບໃບຍ້ອງຍໍໃຫ້ແກ່ທ່ານເອກອັກຄະລັດຖະທູດ ເຢຍລະມັນ ປະຈໍາລາວ ທີ່ມີຜົນງານອັນພົ້ນເດັ່ນໃນການປະກອບສ່ວນຊ່ວຍເຫຼືອສັງຄົມ ໃນຄັ້ງນີ້ ແລະ  ຫວັງວ່າໂອກາດໜ້າຈະໄດ້ຮັບຊ່ວຍເຫຼືອຈາກສະຖານທູດເຢຍລະມັນ ຕື່ມອີກ.


ລົດກູ້ໄພ ຈໍານວນ 2 ຄັນ ດັ່ງກ່າວ ໂດຍໄດ້ຮັບການຊ່ວຍເຫຼືອຈາກສະຖານທູດເຢຍລະມັນ ປະ ຈຳ ສປປ ລາວ ໂດຍໄດ້ມອບໃຫ້ມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ (1623) ເພື່ອນໍາໃຊ້ເຂົ້າໃນອຸປະຕິເຫດຕາມທ້ອງຖະໜົນ, ອຸປະຕິເຫດທັງນໍ້າ, ອັກຄີໄພ ແລະ ອຸປະຕິເຫດຕ່າງໆທີ່ເກີດຂຶ້ນ. ໃນນີ້, ມີໜຶ່ງຄັນທີ່ມີລະບົບສື່ສານທາງດາວທຽມສາມາດຮັບຂ່າວໄດ້ໃນທົ່ວປະເທດລາວ ເຊິ່ງເປັນລະບົບທີ່ທັນສະ ໄໝທີ່ສຸດ ໂດຍແມ່ນມູນນິທິຍີ່ປຸ່ນ ເປັນຜູ້ຊ່ວຍເຫຼືອດ້ານລະບົບການສື່ສານ.

 

 

info@lfnd.org.la | 021 213754 | (856-21) 453191