ສູນກາງແນວລາວສ້າງຊາດ

Lao Front For National Development

ພິທີ ມອບ-ຮັບ ໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຄັ້ງທີ I ປະຈໍາປີ 2017

ໃນວັນທີ 20 ມີນາ 2018, ສູນກາງແນວລາວສ້າງຊາດ (ສນຊ) ໄດ້ຈັດພິທີມອບ-ຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານຄັ້ງທີ I ປະຈໍາປີ 2017 ໂດຍການເປັນປະທານຂອງສະຫາຍ ນາງ ຄໍາຈັນ ພົມແສງສະຫວັນ ປະທານກວດກາພັກ-ລັດ ສູນກາງແນວລາວສ້າງຊາດ ຮອງປະທານ ສນຊ, ມີບັນດາສະຫາຍຄະນະພັກ-ຄະນະປະຈໍາ ສນຊ ຕະຫຼອດຮອດສະມາຊິກພັກ, ພະນັກງານ-ລັດຖະກອນ ເຂົ້າຮ່ວມ.

ເພື່ອປະຕິບັດຕາມແຜນການສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ທີ່ກອງປະຊຸມໃຫຍ່ຄັ້ງທີ່ IV ຂອງອົງຄະນະພັກ ສູນກາງແນວລາວລ້າງຊາດ ໄດ້ກຳນົດໄວ້ໃນປີ 2017 ຜ່ານມາ. ຜ່ານການຈັດຕັ້ງປະຕິບັດແຜນດັ່ງກ່າວໃນໜຶ່ງປີຜ່ານມາໄດ້ມີການປະເມີນ, ຕິດຕາມ-ກວດກາ ຕາມຂັ້ນຕອນ ແລະ ມາດ ຖານເງື່ອນໄຂການສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ທີ່ໄດ້ກໍານົດໄວ້ນັ້ນ ໃນນີ້, ມີ 3 ໜ່ວຍພັກທີ່ໄດ້ຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຄື: ໜ່ວຍພັກຫ້ອງການ, ໜ່ວຍພັກກົມໂຄສະນາ-ອົບຮົມ ແລະ ໜ່ວຍພັກກົມຈັດຕັ້ງ-ພະນັກງານ ໃນນີ້, ແຕ່ລະໜ່ວຍພັກກໍໄດ້ຈັບມືສາມັກຄີຮັບຮອງແຜນການແຂ່ງຂັນການສ້າງໜ່ວຍພັກປອດໄສ, ເຂັ້ມແຂງ ແລະ ໜັກແໜ້ນ ປະຈຳປີ 2018.


ໂອກາດນີ້, ສະຫາຍ ນາງ ຄຳຈັນ ພົມແສງສະຫວັນ ເປັນກຽດໂອ້ລົມຕໍ່ພິທີດັ່ງກ່າວ ເຊິ່ງກ່ອນອື່ນສະຫາຍໄດ້ຍ້ອງຍໍຊົມເຊີຍຕໍ່ບັນດາຜົນງານທີ່ແຕ່ລະໜ່ວຍພັກຍາດມາໄດ້ເວົ້າລວມ, ເວົ້າສະເພາະແມ່ນສາມໜ່ວຍພັກ ທີ່ໄດ້ຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ສະຫາຍ ນາງ ຄຳຈັນ ພົມແສງສະຫວັນ ໄດ້ເນັ້ນໃຫ້ແຕ່ລະໜ່ວຍພັກຈົ່ງເອົາ ໃຈໃສ່ຈັດຕັ້ງປະຕິບັດໜ້າທີການເມືອງຂອງຕົນໃຫ້ນັບມື້ດີຂຶ້ນເປັນກ້າວໆ ແລະ ສະມາຊິກພັກແຕ່ລະສະຫາຍ ຕ້ອງເປັນແບບຢ່າງໃນການປະຕິບັດໜ້າທີວຽກງານທີ່ຂັ້ນເທີງມອບໝາຍໃຫ້, ຕ້ອງຢຶດໝັ້ນຫຼັກການການນຳພາຂອງພັກຢ່າງໜັກແໜ້ນ, ແຕ່ລະໜ່ວຍພັກຕ້ອງມີການຕິດ-ຕາມກວດກາ ເປັນປະຈຳ ເພື່ອຕີຖອຍຈຸດອ່ອນ ແລະ ສົ່ງເສີມຈຸດດີ ທັງເປັນການກໍ່ສ້າງພະນັກ ງານນຳພາຕາມ 4 ຄາດໝາຍທີ່ພັກ-ລັດ ວາງອອກ ຕົ້ນຕໍແມ່ນຈັດຕັ້ງປະຕິບັດແຜນການສ້າງໜ່ວຍພັກປອດໄສ, ເຂັ້ມແຂງ ແລະ ໜັກແໜ້ນ ປະຈຳປີ 2018 ໃຫ້ປະກົດຜົນເປັນຈິງ.

ໃນວັນດຽວກັນ, ກໍ່ໄດ້ຜ່ານຂໍ້ຕົກລົງວ່າດ້ວຍການພັກຜ່ອນບຳນານ ຂອງພະນັກງານສູນກາງແນວລາວສ້າງຊາດ ຕາມລະບຽບລັດຖະກອນ ຕື່ມອີກ.

info@lfnd.org.la | 021 213754 | (856-21) 453191