ສູນກາງແນວລາວສ້າງຊາດ

Lao Front For National Development

ພິ​ທີ​ມອບ-ຮັບ​ໃບ​ຢັ້ງ​ຢືນ​ຄອບ​ຄົວ ແລະ ບ້ານ​ສາ​ມັກ​ຄີ​ປອງດອງ​ 12 ບ້ານຂອງເມືອງຮ້ຽມ

ພິທີມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ​ 12 ບ້ານຂອງເມືອງຮ້ຽມ

ວັນ​ທີ 22 ມີ​ຖຸ​ນາ 2021 ນີ້ ຢູ່​ທີ່​ສະ​ໂມ​ສອນ​ ເມືອງ​ຮ້ຽມ ແຂວງ​ຫົວ​ພັນ​ ໄດ້​ຈັດ​ພິ​ທີມອ​ບ-ຮັບ​ໃບ​ຢັ້ງ​ຢືນ​ຄອບ​ຄົວ ແລະ ບ້ານ​ສາ​ມັກ​ຄີ​ປອງດອງ​ ໃຫ້ 12 ບ້ານ ເຂດ​ເທດ​ສະ​ບານ​ເມືອງ ໂດຍ​ການ​ເຂົ້າ​ຮ່ວມ​​ຂອງ ​ທ່ານ ປອ ບຸນ​ວິ​ໄຊ ກົງ​ປະ​ລີ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງ ເມືອງ​ຮ້ຽມ, ມີ​ບັນ​ດາ​ທ່ານ​ຄະ​ນະ​ປະ​ຈຳ, ກຳ​ມະ​ການ​ພັກ​ເມືອງ, ຫົວ​ໜ້າ​ຮອງ​ຫົວ​ໜ້າ​ຫ້ອງ​ການ, ກອງ​ບັນ​ຊາ​ການ ປກ​ສ​, ປກ​ຊ ເມືອງ, ຄະ​ນະ​ພັກ, ອຳ​ນາດ​ການ​ປົກ​ຄອງ​ບ້ານ, ປະ​ທານ​ແນວ​ລາວ​ສ້າງ​ຊາ​ດ 12 ບ້ານ ເທດ​ສະ​ບານ​ເຂົ້າ​ຮ່ວມ.

ພິ​ທີ​ດັ່ງ​ກ່າວ ທ່ານ ສອນ​ເພັງ ຄຳ​ມະ​ວັນ ຄະ​ນະ​ປະ​ຈຳ​ພັກ​ເມືອງ ​ປະ​ທານ​ແນ​ວ​ລາວ​ສ້າງ​ຊາດ​ເມືອງ​ ໄດ້​ຜ່ານ​ບົດ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ຂະ​ບວນ​ການ​ສ້າງຄອບ​ຄົວ ແລະ ບ້ານ​ສາ​ມັກ​ຄີ​ປອງດອງ ​ໃນ 12 ບ້ານ​ມີ: ບ້ານ​ທາດ​ຮ້ຽມ, ເມືອງ​ຮ້ຽມ, ສຳ​ພັນ​ທອງ, ນາ​ທວນ, ນາ​ວຽງ, ແທນ​ຮີ້ງ, ຫ້ວຍ​ສາ, ນາ​ໂພນ, ພຽງ​ໂດນ, ນາ​ປວກ, ນ້ຳ​ສາດ ແລະ ບ້ານ​ພູ​ວຽງ, ​ເຊິ່ງ​ມີ​ 905 ​ຄອບ​ຄົວ, ປະ​ກອບ​ມີ ເຜົ່າ​ລາວ​, ເຜົ່າໄຕ​, ກຶມ​ມຸ, ມົ້ງ ແລະ ເຜົ່າອີວ​ມຽນ; ແຕ່​ລະ​ເຜົ່າ​ມີ​ມູນ​ເຊື້ອ​ດຸ​ໝັ່ນ​ຂະ​ຫ​ຍັນ​ພຽນ​ໃນ​ການ​ທຳ​ມາ​ຫາ​ກິນ,  ມີ​ຄວາມ​ສາ​ມັກ​ຄີ​​ຮັກ​ແພງ​ຊ່ວຍ​ເຫຼືອ​ເຊິ່ງ​ກັນ ແລະ ກັນ. ໂດຍ​ປະ​ຕິ​ບັດ​ໄປ​ຕາມ ມາດ​ຖານ​ຂອງ​ການ​ສ້າງ​ຄອບ​ຄົວ ແລະ  ​ສ້າງ​ບ້ານ​ສາ​ມັກ​ຄີ​ປອງດອງ​ ໃນໄລຍະຜ່ານມາ ສາມາດປະເມີນຜົນ​ລວມ​ທັງ​ໝົດ​ໄດ້ 92% ເຊິ່ງເຮັດໃຫ້  12 ບ້ານ ແລະ  905 ຄອບຄົວ ໄດ້ຮັບໃບຢັ້ງຢືນເປັນຄອບຄົວ ແລະ ບ້ານສາ​ມັກ​ຄີ​ປອງດອງ. ​

​          ພ້ອມກັນນັ້ນ, ທ່ານ ປອ ບຸນ​ວິ​ໄຊ ກົງ​ປະ​ລີ ​ໄດ້​ໃຫ້​ກຽດ​ມອບໃບ​ຢັ້ງຢື​ນຄອບຄົວ ແລະ ບ້ານສາ​ມັກ​ຄີ​ປອງດອງ​ໃຫ້​ 12 ບ້ານດັ່ງ​ກ່າວ ພ້ອມ​ທັງ​ມີ​ຄຳ​ເຫັນໂອ້​ລົມ​ບາງ​ບັນ​ຫາ​ເປັນ​ຕົ້ນ: ໃຫ້ແນວ​ລາວ​ສ້າງ​ຊາດ​ແຕ່​ລະ​ຂັ້ນຕ້ອງ​ປັບ​ປຸງ​ທຸກ​ດ້ານ​ໃຫ້​ມີ​ຄວ​າມ​ເຂັ້ມ​ແຂງ, ເປັນ​ເຈົ້າ​ການ​ຮ່ວມ​ມື​ໃນ​ການ​ຈັດ​ຕັ້ງ​ເຊື່ອມ​ຊຶມ​ແນ​​ວທາງນະໂຍບາຍ​ຂອງ​ພັກ​, ກົດ​ໝາຍ​ຂອງ​ລັດ, ສືບ​ຕໍ່​ເຕົ້າ​ໂຮມ​ຄວາມ​ສາ​ມັກ​ຄີ​ໃຫ້​ເປັນ​ປຶກ​ແຜ່ນ ເພື່ອ​ເຮັດ​ໃຫ້​ບ້ານ​, ເມືອງ​ມີ​ຄວາມ​ສະ​ຫງົບ​, ຮັກ​ສາ​ມູນ​ເຊື້ອ​ຮີດ​ຄອງ​ປະ​ເພ​ນີ​ອັນ​ດີ​ງາມ​ຂອງ​ຊາດ​ ຂອງ​ເຜົ່າ​ໄວ້​ໃຫ້​ໝັ້ນ​ຄົງ​ຕະ​ຫຼອດ​ໄປ ແລະ ຊຸກ​ຍູ້​ປະ​ຊາ​ຊົນ​ພັດ​ທະ​ນາ​ເສດ​ຖະ​ກິດ​ດ້​ວຍ​ການ​ປູກ​ຝັງ-ລ້ຽງ​ສັດເພື່ອໃຫ້ຊີວິດການ​ເປັນ​ຢູ່​ຂອງ​ປະ​ຊາ​ຊົນ​ໄດ້​ຮັບ​ການ​ພັດ​ທະ​ນາ​​ດີ​ຂື້ນເທື່ອລະກ້າວ.

 

info@lfnd.org.la | 021 213754 | (856-21) 453191