ເນື່ອງໃນໂອກາດສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ(18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022). ຄະນະກຳມະການ ສູນກາງແນວໂຮມປະເທດຊາດຫວຽດນາມ ໄດ້ມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການທ່າມກາງບັນຍາກາດທີ່ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມຈັດຕັ້ງກິດຈະກຳສຳຄັນຕ່າງໆ ໃນປີສາມັກຄີມິດຕະພາບ ລາວ-ຫວຽດນາມ 2022 ນີ້.

ພິທີພົບປະສອງຝ່າຍ ໄດ້ຈັດຂຶ້ນທີ່ສູນກາງແນວລາວສ້າງຊາດ, ນະຄອນຫຼວງວຽງຈັນ ໃນວັນທີ 26 ກໍລະກົດ 2022; ຕາງໜ້າສູນກາງແນວລາວສ້າງຊາດ ນຳໂດຍ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ; ຕາງໜ້າສູນກາງແນວໂຮມປະເທດຊາດ ນຳໂດຍທ່ານ ໂດ ວັນ ຈຽນ ເລຂາທິການສູນກາງພັກກອມມູນິດຫວຽດນາມ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ພ້ອມດ້ວຍຄະນະຜູ້ແທນຂອງທັງສອງຝ່າຍ ເຂົ້າຮ່ວມ.

ໂອກາດນີ້, ທ່ານ ສິນລະວົງ ຄຸດໄພທູນ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ ທ່ານ ໂດ ວັນ ຈຽນ ພ້ອມຄະນະ  ທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ທັງສອງຝ່າຍໄດ້ລາຍງານກ່ຽວກັບສະພາບລວມຂອງສອງປະເທດ, ການພັດທະນາເສດຖະກິດ-ສັງຄົມ; ພາລະບົດບາດ, ສິດ ແລະ ໜ້າທີ່ຂອງສອງອົງການ ໃຫ້ກັນ ແລະກັນໄດ້ຮັບຊາບ; ພ້ອມທັງໄດ້ແລກປ່ຽນກ່ຽວກັບການຈັດຕັ້ງຜັນຂະຫຍາຍເນື້ອໃນບົດບັນທຶກການຮ່ວມມື 2014-2020 ຂອງສອງຝ່າຍທີ່ໄດ້ລົງນາມ ຢູ່ນະຄອນຫລວງຮ່າໂນຍ ປີ 2016, ແລກປ່ຽນກ່ຽວກັບວຽກງານສະມາຄົມຊາວກະສິກອນ, ການຈັດກິດຈະກຳຕ່າງໆ ໃນປີສາມັກຄີມິດຕະພາບ ລາວ-ຫວຽດນາມ 2022 ແລະ ແລກປ່ຽນກ່ຽວກັບບັນດາເນື້ອໃນ ທີ່ຈະສືບຕໍ່ຮ່ວມມືໃນຕໍ່ໜ້າ ລະຫວ່າງ ຄະນະກຳມະການສູນກາງແນວລາວສ້າງຊາດ ກັບ ຄະນະກຳມະການສູນກາງແນວໂຮມປະເທດຊາດຫວຽດນາມ ໄລຍະປີ 2022-2027 ເປັນຕົ້ນ: ການປະກອບຄະນະຜູ້ແທນໄປຢ້ຽມຢາມພົບປະແລກປ່ຽນບົດຮຽນນຳກັນ, ການສົ່ງພະນັກງານໄປບຳລຸງຍົກລະດັບ ຄວາມຮູ້ຄວາມສາມາດ ກ່ຽວກັບວຽກງານແນວໂຮມ ໃນໄລຍະສັ້ນ ແລະ ໄລຍະຍາວ ແລະ ການຈັດກອງປະຊຸມສາກົນ ເສີມສ້າງເສັ້ນຊາຍແດນລາວ-ຫວຽດນາມ, ຫວຽດນາມ-ລາວ ສັນຕິພາບ, ມິດຕະພາບ, ຮ່ວມມືພ້ອມກັນພັດທະນາ ໃນທ້າຍ 2022 ທີ່ຝ່າຍລາວຈະເປັນເຈົ້າພາບ.

ບກ: ນາງ ແພງພັນ ບຸບຜາພອນ

ຂ່າວ: ເຢ້

ພາບ: ສຸວັນລີ