ພິທີພົບປະສອງຝ່າຍ ລະຫວ່າງ ສູນກາງແນວລາວສ້າງຊາດ ກັບຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຈັດຂຶ້ນທີ່ສູນກາງແນວລາວສ້າງຊາດ ໃນວັນທີ 26 ເມສາ 2022 ນີ້ ໂດຍຜ່ານວີດີໂອທາງໄກ; ເປັນກຽດເຂົ້າຮ່ວມມີ ທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ ແລະ ທ່ານ ຟຸ່ງ ແຂັງ ຕ່າຍ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ ພ້ອມດ້ວຍຜູ້ແທນ ຂອງທັງສອງຝ່າຍ ເຂົ້າຮ່ວມ.

ພິທີພົບປະຄັ້ງນີ້, ໄດ້ຍົກໃຫ້ເຫັນສະພາບລວມຂອງສອງປະເທດ, ໄດ້ຍົກໃຫ້ເຫັນສະພາບລວມ ແລະ ຜົນງານການເຄື່ອນໄຫວໂດຍຫຍໍ້ ຂອງສອງອົງການ ໃນໄລຍະຜ່ານມາ. ພ້ອມກັນນັ້ນ, ໄດ້ຕີລາຄາການພົວພັນຮ່ວມມື ລະຫວ່າງ ສູນກາງແນວລາວສ້າງຊາດ ກັບຄະນະກຳມະການສູນກາງແນວໂຮມປະເທດຊາດຫວຽດນາມ ໃນໄລຍະຜ່ານມາ ໂດຍຫຍໍ້ ພ້ອມທັງໄດ້ປຶກສາຫາລືກ່ຽວກັບບັນດາກິດກະກຳ ທີ່ທັງສອງອົງການຈະສຶບຕໍ່ຮ່ວມມືໃນຕໍ່ໜ້າ ເປັນຕົ້ນແມ່ນການສ້າງບົດບັນທຶກການຮ່ວມມື ໄລຍະແຕ່ປີ 2021-2025, ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ການປະສານສົມທົບກັນ ເພື່ອຈັດກອງປະຊຸມເສີມສ້າງຊາຍແດນລາວ-ຫວຽດນາມ ສັນຕິພາບ, ມິດຕະພາບ ພ້ອມກັນພັດທະນາ ຊິ່ງປີນີ້ແມ່ນຝ່າຍລາວ ເປັນເຈົ້າພາບ; ການສົ່ງຄະນະຜູ້ແທນຂັ້ນສູງໄປພົບປະ, ຢ້ຽມຢາມ ເຊິ່ງກັນແລະກັນ ແລະ ການແລກປ່ຽນຄະນະຜູ້ແທນ ເປັນຕົ້ນແມ່ນວຽກງານການຝຶກອົບຮົມໄລຍະສັ້ນ ແລະ ວຽກງານສູນຝຶກອົບຮົມ ຂອງທັງສອງອົງການ.

ພິທີພົບປະ ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຫວຽດນາມ ກໍຄືສູນກາງແນວລາວສ້າງຊາດ ກັບຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.