ສູນກາງແນວລາວສ້າງຊາດ

Lao Front For National Development

ມອບອຸປະກອນການຮຽນ-ການສອນ ໃຫ້ໂຮງຮຽນອະນຸບານ-ປະຖົມບ້ານກົກງີ້ວ ນະຄອນຫຼວງພະບາງ ແຂວງຫຼວງພະບາງ

ວັນທີ 17 ກຸມພາ 2021 ນີ້, ແນວລາວສ້າງຊາດແຂວງ ຫຼວງພະບາງ ສົມທົບກັບສາທຸ ຕ່າ ຕິດສະວັງໂສ ເຈົ້າອາທິການວັດພູຊ້າງໂພ ໄຊຊະນະໄດ້ມອບເຄື່ອງອຸປະກອນການຮຽນ-ການສອນ ລວມມູນຄ່າ 7.000.000 ກີບ ໃຫ້ໂຮງຮຽນອະນຸບານ-ປະຖົມກົກງີ້ວ ນະຄອນຫລວງພະບາງ ໂດຍມີທ່ານ ເອິງ ລໍສະຫວັນ ປະທານແນວລາວສ້າງຊາດແຂວງ, ສາທຸ ຕ່າ ຕິດສະວັງໂສ ເຈົ້າອາທິການວັດພູຊ້າງຄໍາໂພໄຊຊະນະ, ທ່ານ ແກ່ນສີ ວິໄລພອນ ຮອງຫົວຫນ້າຫ້ອງການສຶກສາທິການ ແລະ ກິລາ ນະຄອນຫລວງພະບາງ ແລະ ຄູອາຈານພ້ອມດ້ວຍນ້ອງນັກຮຽນເຂົ້າຮ່ວມ.

ໃນພິທີ ທ່ານ ນາງ ຈັນທີ ສິດທິໂສມ ຜູ້ອໍານວຍການໂຮງຮຽນອານຸບານ-ປະຖົມກົກງີ້ວ ຂື້ນລາຍງານປະຫວັດຫໍ້ຍ ແລະ ສະພາບລວມຂອງໂຮງຮຽນວ່າ ໂຮງຮຽນປະຖົມກົກງີ້ວສ້າງຂື້ນປີ 1973 ມີ 3 ຫ້ອງຮຽນ, 3 ຊັ້ນຮຽນ ຄື: ປ1,ປ2 ແລະ ປ3 ມາຮອດປີ 1975 ຊຸມຊົນໄດ້ມີການຂະຫຍາຍຕື່ມແບບຊົ່ວຄາວ 2 ຫ້ອງຮຽນ ຄື ປ4, ປ5 ໃນປີ 2005-2006 ໄດ້ສ້າງຫ້ອງອະນຸບານ 1 ຫ້ອງ; ມາຮອດປີ 2006-2007 ໄດ້ຮັບທຶນປຸກສ້າງຈາກໂຄງການສົງເສີມເດັກນ້ອຍ 1 ຫຼັງ ມີ 2 ຫ້ອງຮຽນ, 2 ຫ້ອງນໍ້າຂື້ນກັບໂຮງຮຽນປະຖົມ; ມາຮອດປີ 2013 ແມ່ນໄດ້ແຍກອອກເປັນໂຮງຮຽນອະນຸບານເອກະລາດ, ປີ 2014 ໄດ້ຂໍທຶນນໍາໂຄງການປ້າແສງດາວ ຈາກປະເທດອົດສະຕາລີມາສ້ອມແປງ ແລະສ້າງໂຮງຮຽນປະຖົມ ຕື່ມ 3 ຫ້ອງ ລວມທັງຫມົດເປັນ 6 ຫ້ອງ ໃນນັ້ນມີ 5 ຫ້ອງຮຽນ 1ຫ້ອງການ; ປີ 2015-2016 ໂຮງຮຽນແຫ່ງນີ້ເປັນເປົ້າໝາຍສ້າງ ໂຮງຮຽນໃຫ້ກາຍເປັນໂຮງຮຽນຕົວແບບ ຂອງຫ້ອງການສຶກສາທິການ ແລະ ກິລາ ນະຄອນຫຼວງພະບາງ ມາຮອດ ປີ2018-2019 ແມ່ນໄດ້ຮັບຮອງເອົາໂຮງຮຽນອະນຸບານແຫ່ງນີ້ ເປັນໂຮງຮຽນຕົວແບບ ແຫ່ງທໍາອິດຂອງແຂວງຫຼວງພະບາງ.

ໃນຕອນທ້າຍພິທີ ທ່ານປະທານແນວລາວສ້າງຊາດແຂວງ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານ ທີ່ຄູອາຈານ ຂອງໂຮງຮຽນດັ່ງກ່າວ ຍາດມາໄດ້ໃນໄລຍະຜ່ານມາ ແລະ ທ່ານໄດ້ເນັ້ນຫນັກ ໃຫ້ຄູອາຈານສືບຕໍ່ແຜນການແຜນງານຫນ້າ ວຽກໃຫ້ສໍາເລັດຕາມ 5 ຫຼັກມູນ, 3 ລັກສະນະ ຂອງການສຶກສາໃຫ້ໄດ້ຕາມຄາດຫມາຍ ສິ່ງສໍາຄັນຈັນຍາບັນຂອງຄູ ຕ້ອງຮັກສາໃຫ້ໄດ້.

info@lfnd.org.la | 021 213754 | (856-21) 453191