ສູນກາງແນວລາວສ້າງຊາດ(ສນຊ) ໄດ້ຈັດພິທີມອບ-ຮັບໜ້າທີ່ປະທານສູນກາງແນວລາວສ້າງຊາດ ລະຫວ່າງ ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ຜູ້ເກົ່າ) ແລະ ທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ຜູ້ໃໝ່), ເປັນກຽດເຂົ້າຮ່ວມມີ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີການນຳພັກ, ລັດ ຈາກກະຊວງ-ອົງການ, ບັນດາທ່ານຮອງປະທານ, ຄະນະປະຈຳ, ກຳມະການ ສນຊ ອ້ອມຂ້າງສູນກາງ, ຫົວໜ້າ-ຮອງຫົວໜ້າກົມ, ຫ້ອງການ, ສູນຝຶກອົບຮົມ ພ້ອມດ້ວຍພະນັກງານ-ລັດຖະກອນ ສນຊ ເຂົ້າຮ້ວມ.

ໃນພິທີ ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານ ສນຊ, ຮອງປະທານສະພາແຫ່ງຊາດ ໄດ້ຜ່ານບົດສະຫຼຸບ-ສັງລວມການຊີ້ນຳ-ນຳພາ ເຄື່ອນໄຫວວຽກງານ ຂອງແນວລາວສ້າງຊາດ ໃນໄລຍະຜ່ານມາ ແຕ່ປີ 2016 – ປະຈຸບັນ ໂດຍຫຍໍ້ ເຊິ່ງໄດ້ຍົກໃຫ້ເຫັນດ້ານດີ ແລະ ຜົນສຳເລັດ, ດ້ານອ່ອນ ແລະ ຂໍ້ຄົງຄ້າງ ແລະ ບາງວຽກງານທີ່ຈະຕ້ອງໄດ້ສຶບຕໍ່ໃນຕໍ່ໜ້າ.

ໂອກາດນີ້, ທ່ານ ປອ ໄຊສົມພອນ ພົມວິຫານ ກໍໄດ້ເປັນກຽດກ່າວມອບໜ້າທີ່ ແລະ ທ່ານ ປອ ສິນລະວົງ ຄຸດໄພທູນ ໄດ້ຂຶ້ນກ່າວຮັບໜ້າທີ່ ເປັນປະທານສູນກາງແນວລາວສ້າງຊາດ ຜູ້ໃໝ່. ພ້ອມກັນນີ້ ທ່ານ ປະທານ ສນຊ ຜູ້ໃໝ່ ຍັງໄດ້ມີຄໍາເຫັນຕໍ່ບາງວຽກງານຈຸດສຸມໃນຕໍ່ໜ້າທີ່ຈະຕ້ອງໄດ້ເອົາໃຈໃສ່ ຄື: 1 ເພີ່ມທະວີຄວາມສາມັກຄີປອງດອງທົ່ວສັງຄົມ ເສີມຂະຫຍາຍບົດບາດຂອງແນວລາວສ້າງຊາດຂຶ້ນຕື່ມ, 2 ສຶບຕໍ່ປັບປຸງແບບແຜນວິທີເຮັດວຽກ, ເອົາໃຈໃສ່ຈັດຕັ້ງປະຕິບັດພາລະບົດບາດ, ສິດ ແລະ ໜ້າຂອງແນວລາວສ້າງຊາດ, ເອົາໃຈໃສ່ປະສານງານກັບພາກສ່ວນຕ່າງໆ ທັງສູນກາງ ແລະ ທ້ອງຖິ່ນ ເພື່ອຮ່ວມກັນແກ້ໄຂບັນຫາສັງຄົມ, 3 ເອົາໃຈໃສ່ສຶກສາອົບຮົມ ປຸກລະດົມຂົນຂວາຍກຳລັງແຮງທົ່ວສັງຄົມ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, 4 ປັບປຸງກົງຈັກການຈັດຕັ້ງ, ເອົາໃຈໃສ່ວຽກງານກໍ່ສ້າງພັກ-ພະນັກງານ ຕາມທິດຍົກສູງຄຸນນະພາບ, ກະທັດຮັດ ແລະ ສົມເຫດສົມຜົນ, 5 ເພີ່ມທະວີການທູດປະຊາຊົນຕາມແນວທາງການຕ່າງປະເທດ ຂອງພັກ ແລະ ປັບປຸງວິທີການເຄື່ອນໄຫວ ໃຫ້ມີຫຼາຍຮູບຫຼາຍສີ, 6 ເສີມຂະຫຍາຍທ່າແຮງ ແລະ ບົດບາດຂອງໂຄງປະກອບກຳມະການແນວລາວສ້າງຊາດ ເຂົ້າໃນການຊ່ວຍເຫຼືອປະຊາຊົນທີ່ຍັງຫຍຸ້ງຍາກ, ທຸກຍາກ ຕາມເປົ້າໝາຍຂອງລັດຖະບານ ແລະ ອົງການປົກຄອງທ້ອງຖິ່ນ ແລະ 7, ສືບຕໍ່ນໍາພາກະກຽມດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ.

ໃນໂອກາດດຽວກັນນີ້ ຍັງໄດ້ປະກາດການຍົກຍ້າຍ ທ່ານ ຄໍາໃບ ດຳລັດ ກຳມະການສູນກາງພັກ, ຮອງປະທານ ສນຊ ໄປປະຈໍາການຢູ່ສະພາແຫ່ງຊາດ ໂດຍເປັນຮອງປະທານສະພາແຫ່ງຊາດຕື່ມອີກ.