ສູນກາງແນວລາວສ້າງຊາດ

Lao Front For National Development

ມອບ-ຮັບ​ ໜ້າ​ທີ່​ລະ​ຫວ່າງ ປະ​ທານ​ແນວ​ລາວ​ສ້າງ​ຊາດ​ແຂວງ ​ ຜູ້​ເກົ່າ-ຜູ້​ໃໝ່.

       ໃນ​ວັນ​ທີ 27 ຕຸ​ລາ 2020 ຢູ່​ທີ່​ຫ້ອງ​ປະ​ຊຸມ​ອົງ​ການ​ແນວ​ລາ​ວ​ສ້າງ​ຊາດ​ ແຂວງໄຊຍະບູລີ ໄດ້​ມີ​ພິ​ທີ​ມອບ-ຮັບ ໜ້າ​ທີ່​ລະ​ຫວ່າງ ປະ​ທາ​ນ​ແນວ​ລາວ​ສ້າງ​ຊາດ​ແຂວງ​ຜູ້​ເກົ່າ-ຜູ້​ໃໝ່ ແລະ ປະ​ກາດ​ແຕ່ງ​ຕັ້ງ​​, ຍົກ​ຍ້າຍ-ຊັບ​ຊ້ອນພະ​ນັກ​ງານ. ໂດຍ​​ໃຫ້ກຽດ​ເຂົ້າ​ຮ່ວມ​​ ຂອງ​ທ່ານ ດວງ​ຕາ ໄຊວຸດ ຮອງ​ເລ​ຂາ​ພັກ​ແຂວງ ຫົວ​ໜ້າ​ຄະ​ນະ​ຈັດ​ຕັ້ງ​ແຂວງ, ມີ​​ບັນ​ດາ​ຄະ​ນະ​ປະ​ຈຳ​ພັກ, ກຳ​ມະ​ການ​ພັກ​ແຂວງ, ​ອົງ​ການ​ພາ​ຄີ, ຕາງ​ໜ້າ​ພະ​ແນກ​ການ​, ຄະ​ນະ​ປະ​ຈຳ​ພັກ​ເມືອງ​ໄຊ​ຍະ​ບູ​ລີ, ​ພະ​ນັກ​ງານ​ ​ແນວ​ລາວ​ສ້າງ​ຊາດ​ແຂວງ ແລະ ​ພະ​ແນກ​ພາຍ​ໃນ​ແຂວງ ເຂົ້າ​ຮ່ວມ​.

ໃນ​ພິ​ທີ​ດັ່ງ​ກ່າວ ທ່ານ ຈັນ​ເພັງ ແສນ​ຄຳ ຮອງ​​ຫົວ​ໜ້າຄະ​ນະ​ຈັດ​ຕັ້ງ​ແຂວງ ໄດ້​ຂຶ້ນ​ຜ່ານ​ມະ​ຕິຂອງ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ ວ່າ​ດ້ວຍ​ການ​ອະ​ນຸ​ມັດ​ໃຫ້​ ສະ​ຫາຍ ຄຳ​ສິງ ສໍ​ລະ​ສຸກ ​ຄະ​ນະ​ປະ​ຈຳ​ພັກ​ແຂວງ, ປະ​ທານ​ແນວ​ລາວ​ສ້າງ​ຊາດ​ແຂວງ ​ຮັບນະໂຍບາຍອຸດ​ໜູນ​ບຳ​ນານ, ມະ​ຕິ​ຕົກ​ລົງ​ຂອງ​ຄະ​ນະ​ປະ​ຈຳ​ພັກ​ແຂວງ ວ່າ​ດ້ວຍ​ການ​ແຕ່ງ​ຕັ້ງ​ ສະ​ຫາຍ ຄຳ​ສີ ແພງສະ​ຫວັນ ຄະ​ນະ​ປະ​ຈຳ​ພັກ​ແຂວງ, ຫົວ​ໜ້າ​ພະ​ແນກ​ພາຍ​ໃນ​ແຂວງ ​ເປັນປະ​ທານ​ແນວ​ລາວ​ສ້າງ​ຊາດ​ແຂວງ ຜູ້ໃໝ່.

ໃນ​ພິ​ທີ ທ່ານ ດວງ​ຕາ ໄຊ​ວຸດ ຮອງ​ເລ​ຂາ​ພັກ​ແຂວງ ຫົວ​ໜ້າ​ຄະ​ນະ​ຈັດ​ຕັ້ງ​ແຂວງ ໄດ້​ມີ​ຄຳ​ເຫັນ​ໂອ້​ລົມ​ຕໍ່​ພິ​ທີ​ດັ່ງ​ກ່າວ ກ່ອນ​ອື່ນ​ທ່ານ​ໄດ້​ກ່າວ​ຍ້ອງ​ຍໍ​ຊົມ​ເຊີຍ​ຄຸນ​ງາມ​ຄວາມ​ດີ​ຂອງ​ບັນ​ດາ​ທ່ານ​ທີ່​ປະ​ກາດ​ພັກ​ຜ່ອນ-ຮັບ​ເບ້ຍ​ບຳ​ນານ, ​ຖືກ​ແຕ່ງ​ຕັ້ງ ລ້ວນ​ແຕ່​ໄດ້​ຮັບ​ຄວາມ​ໄວ້​ເນື້ອ​ເຊື່ອ​​ໃຈ ເຊື່ອໝັ້ນ​ຈາກ​ພັກ-ລັດ ລ້ວນ​ແຕ່​ເປັນ​ຜູ້​ທີ່​ບົດ​ບາດຄວາມ​ສຳ​ຄັນ​ ມີ​ຜົນ​ງານ​ອັນ​ຍິ່ງ​ໃຫ​ຍ່​ຕໍ່​ປະ​ເທດ​ຊາດ ກໍ່​ຄື​ແຂວງ​ໄຊ​ຍະ​ບູ​ລີ​ຂອງ​ພວກ​ເຮົາ ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່​ບັນ​ດາ​ທ່ານ​ທີ່​ເອົາ​ໃຈ​ໃສ່​ສຸມ​ທຸກ​ສະ​ຕິ​ປັນ​ຍາ​ເຫື່ອ​ແຮງ​ເຂົ້າ​ໃນ​ການ​ປະ​ຕິ​ບັດ​ໜ້າ​ທີ່​ການ​ເມືອງ​ຂອງ​ຕົນ ໂດຍ​ໄດ້​ຮັບ​ຜົນ​ສຳ​ເລັດ​ຢ່າງ​ສູງ​ຕະຫຼອດໄລ​ຍະ​ຜ່ານ​ມາ.

ທ່ານ​ຍັງ​ໄດ້​ເນັ້ນ​ໜັກ​ໃຫ້​ຄະ​ນະ​ພັກ, ສະ​ມາ​ຊິກ​ພັກ, ພະ​ນັກ​ງານ​ມີ​ສະ​ຕິ​ລະ​ວັງ​ຕົວ​ຕອບ​​ຕ້ານ ແລະ ຮັບ​ມື​ກັບ​ບັນ​ດາ​ສິ່ງ​ທ້າ​ທາຍ​ຕ່າງໆ​ຈາກ​ສະ​ພາບ​ແວດ​ລ້ອມ, ​ເອົາ​ໃຈ​ໃສ່​ຍົກ​ສູງຄວາມ​ຮັບ​ຜິດ​ຊອບ​ໃຫ້​ດີ​ຂຶ້ນ​ຕື່ມ ສືບ​ຕໍ່​ປະ​ຕິ​ບັດ​ວຽກ​ງານ​ການ​ເມືອງ-ແນວ​ຄິດ​ໃຫ້​ເລິກ​ເຊິ່ງ ເຮັດ​ເປັນ​ປົກ​ກະ​ຕິ ສືບ​ຕໍ່​ເອົາ​ໃຈ​ໃສ່​ປັບ​ປຸງ​ປົງ​ຈັກ​ການ​ຈັດຕັ້ງໃຫ້​ກະ​ທັດ​ຮັດ, ສ​ອດ​ຄ່ອງ​ກັບ​ໜ້າ​ວຽກ​ຕົວ​ຈິງ, ສືບ​ຕໍ່​ເອົາ​ໃຈ​ໃສ່​ຈັດ​ຕັ້ງ​ປະ​ຕິ​ບັດ​ວຽກ​ງານ​ຮ່ວມ​ກັບ​ອົງ​ການ​ພາ​ຄີ, ພາກ​ສ່ວນ​ອື່ນໆ​ໃຫ້​ກົມ​ກຽວ, ເພີ້ມ​ທະ​ວີ​ເຕົ້າ​ໂຮມ​ຄວາມ​ສາ​ມັກ​ຄີ​ໃຫ້​ເປັນ​ປຶກ​ແຜ່ນ​ແໜ້ນ​ໜາ, ປັບ​ປຸງ​ແບບ​ແຜນ​ວິ​ທີ​ເຮັດ​ວຽກ​ໃຫ້​ມີ​ລັກ​ສະ​ນະ​ຫັນ​ປ່ຽນ​ກ້າວ​ໜ້າ​ດີ​ຂຶ້ນ​ເລື້ອຍໆ ເພື​່ອ​ໃຫ້​ໄດ້​ຮັບ​ຜົນ​ຕາມ​ຈຸດ​ປະ​ສົງລະ​ດັບ​ຄາດ​ໝາຍ.

 

info@lfnd.org.la | 021 213754 | (856-21) 453191