ສູນກາງແນວລາວສ້າງຊາດ

Lao Front For National Development

ມອບ-ຮັບ ອາຄານສູນເລືອດ ແຂວງ ອຸດົມໄຊ

ວັນທີ 22 ກຸມພາ 2018​ ທີ່ ແຂວງອຸດົມໄຊ ອົງການກາແດງລາວ ແລະ ອົງການກາແດງເຢຍລະມັນ ໄດ້ຈັດພິທີມອບ-ຮັບ ອາຄານສູນເລືອດ ໃຫ້ແກ່ ອົງການກາແດງລາວ ແຂວງ ອຸດົມໄຊ ໂດຍການເປັນກຽດເຂົ້າຮ່ວມຂອງທ່ານ ຮສ ດຣ ສົມອົກ ກິ່ງ ສະດາ ຮອງປະທານສູນກາງແນວລາວສ້າງຊາດ ມີທ່ານ ຮສ ດຣ ສິງ ເມໂນລາດ ຮອງປະທານອົງການກາແດງລາວ; ທ່ານ ແຮວ ມຸດ ກິເບວ, ຫົວໜ້າຊີ້ນໍາໂຄງການພາກພື້ນອາຊີໃຕ້, ອົງການກາແດງເຢຍລະມັນ, ທ່ານ ໂອວາດ ຈັນທະວົງ ກໍາມະການປະຈໍາ ພັກແຂວງ ປະທານແນວລາວສ້າງຊາດແຂວງ ອຸດົມໄຊ, ມີຜູ້ຕາງໜ້າລັດຖະບານເຢຍລະມັນ, ຫົວໜ້າພະແນກ ສາທາລະນະສຸກ ພ້ອມດ້ວຍພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ພິທີມອບ-ຮັບໃນຄັ້ງນີ້ ທ່ານ ຮສ ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດໄດ້ໃຫ້ຮູ້ວ່າ ການຊ່ວຍເຫຼືອ ເປັນອາຄານສູນເລືອດ ແລະ ອຸປະກອນພື້ນຖານຈໍານວນໜຶ່ງ ແມ່ນມີຄວາມສໍາຄັນ ເຊິ່ງເປັນທ່າແຮງໃຫ້ວຽກງານການບໍລິ ການເລືອດຢູ່ແຂວງ ແນ່ໃສ່ຮັບປະກັນມີເລືອດພຽງພໍ, ປອດໄພ ແລະ ທັນເວລາ. ສາມາດໃຫ້ການບໍລິການເລືອດໃຫ້ແກ່ປະ ຊາຊົນບັນ ດາເຜົ່າ ທົ່ວແຂວງອຸດົມໄຊ ເວົ້າລວມ, ເວົ້າສະເພາະ ຍ້ອນຄວາມເອົາໃຈໃສ່ ແລະ ໃຫ້ການສະໜັບສະໜູນຂອງ ລັດຖະບານເຢຍລະມັນ, ພ້ອມດຽວກັນນັ້ນ ທ່ານ ຮອງປະທານສູນກາງແນວລາວສ້າງຊາດ ຍັງຮຽກຮ້ອງໃຫ້ປະຊາຊົນທຸກຊັ້ນ ຄົນປະກອບສ່ວນໃນ ວຽກງານປຸກລະດົມບໍລິຈາກເລືອດ; ເພາະໃນປັດຈຸບັນຍັງມີຄວາມຮຽກຮ້ອງຕ້ອງການເລືອດນັບມື້ນັບ ເພີ່ມຂຶ້ນ ດັ່ງນັ້ນ, ໜຶ່ງຍົດເລືອດ ແມ່ນໜຶ່ງນໍ້າໃຈຂອງທ່ານ ເພື່ອເປັນການຊ່ວຍກອບກູ້ເອົາຊິວິດ ຜູ້ເຈັບເປັນທີ່ນອນຮັກສາ ຕົວຢູ່ໂຮງໝໍແຫ່ງຕ່າງໆໃນທົ່ວແຂວງ ແລະ ການບໍລິຈາກເລືອດຍັງເປັນການພັດທະນາຊາດ ກ້າວຂຶ້ນສູ່ຄວາມຮຸ່ງເຮືອງສີວິ ໄລ.

ການປຸກສ້າງ ອາຄານສູນເລືອດດັ່ງກ່າວ ໄດ້ເລີ່ມລົງມືກໍ່ສ້າງແຕ່ເດືອນມິຖຸນາ ປີ 2017 ແລະ ໄດ້ສໍາເລັດໃນຕົ້ນປີ 2018 ເປັນອາຄານຊັ້ນດຽວ ມີ 9 ຫ້ອງ ເຊິ່ງມີຫ້ອງເຮັດວຽກຂອງພະນັກງານ, ຫ້ອງປະຊຸມ ແລະ ຫ້ອງນໍ້າ; ໃນມູນຄ່າການກໍ່ສ້າງ 3 ຮ້ອຍ ລ້ານກ່ວາກີບ ໂດຍແມ່ນ ບໍລິສັດ ກະດິງໄຊ ວິສາວະກໍາກໍ່ສ້າງ ເປັນຜູ້ຮັບເໝົາກໍ່ສ້າງ.

info@lfnd.org.la | 021 213754 | (856-21) 453191