ສູນກາງແນວລາວສ້າງຊາດ

Lao Front For National Development

ລົງຊຸກຍູ້ວຽກງານກ່ຽວກັບເດັກ, ການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ຢູ່ ແຂວງໄຊສົມບູນ

ກອງປະຊຸມການມີສ່ວນຮ່ວມ ຂອງແນວລາວສ້າງຊາດ ໃນການຕິດຕາມ, ຊຸກຍູ້ວຽກງານກ່ຽວກັບເດັກ, ການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ການກັບເຂົ້າສູ່ໂຮງຮຽນຢ່າງປອດໄພ ໄດ້ໄຂຂຶ້ນ ໃນວັນທີ 28-30 ກັນຍາ 2020 ຢູ່ແຂວງໄຊສົມບູນ, ເມືອງລ້ອງແຈ້ງ ແລະ ເມືອງຮົ່ມ ຂອງແຂວງດັ່ງກ່າວ. ໂດຍການເປັນປະທານຂອງທ່ານ ວັນດີ ຈັນສົມບັດ ຮອງຫົວໜ້າກົມຊົນເຜົ່າ ສູນກາງແນວລາວສ້າງຊາດ, ມີທ່ານ ທຸນ ເພັດສະໝອນ ຮອງປະທານແນວລາວສ້າງຊາດແຂວງ, ປະທານ-ຮອງປະທານ  ພ້ອມດ້ວຍພະນັກງານວິຊາການແນວລາວສ້າງຊາດ 2 ເມືອງດັ່ງກ່າວ  ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການລາຍງານການມີສ່ວນຮ່ວມ ຂອງແນວລາວສ້າງຊາດ ແລະ ພະແນກສາທາລະນະສຸກແຂວງ, ແນວລາວສ້າງຊາດ ແລະ ຫ້ອງການສາທາລະນະສຸກເມືອງ ກ່ຽວກັບວຽກງານການສັກຢາ, ວຽກງານຮັກສາສຸຂະພາບ, ໂພສະນາການ, ການຕ້ານການໃຊ້ຄວາມຮຸ່ນແຮງຕໍ່ເດັກ, ການຄ້າມະນຸດ ແລະ ການສຶກສາຂອງເດັກກ່ອນໄວຮຽນ. ກອງປະຊຸມຄັ້ງນີ້, ເພື່ອໃຫ້ບັນດາຂະແໜງການ, ຫ້ອງການທີ່ກ່ຽວຂ້ອງໄດ້ປຶກສາຫາລື ແລະ ແລກປ່ຽນບົດຮຽນ ໃນການມີສ່ວນຮ່ວມຕໍ່ວຽກງານກ່ຽວກັບເດັກ, ການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ເພື່ອວາງທິດທາງໃນການຄວບຄຸມໃນຕໍ່ໜ້າ.

 

info@lfnd.org.la | 021 213754 | (856-21) 453191