ໃນລະຫວ່າງວັນທີ 13-16 ກັນຍາ 2023 ຜ່ານມານີ້ ທ່ານ ດຣ. ຈັນເພັງ ສຸດທິວົງ, ຮອງປະທານ ສູນກາງແນວລາວສ້າງຊາດ ພ້ອມດ້ວຍ ທ່ານ ສະເໜີ ຈຸນລະມະນີ ກໍາມະການ ສນຊ, ມີທ່ານຫົວໜ້າຫ້ອງການ ສນຊ ໃນນາມຫົວໜ້າໂຄງການ, ຜູ້ຕາງໜ້າຈາກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຜູ້ຕາງໜ້າກະຊວງກະສິກຳ ແລະ ປ່າໄມ້ ໄດ້ລົງເຄື່ອນໄຫວຢ້ຽມຢາມ ແລະ ເຜີຍແຜ່ກ່ຽວກັບໂຄງການສິນເຊື່ອກາກບອນຢູ່ ເມືອງ ໜອງບົກ, ແຂວງ ຄໍາມ່ວນ ແລະ ເມືອງ ໄຊບູລີ, ແຂວງ ສະຫວັນນະເຂດ ໂດຍໄດ້ຮັບການຕ້ອນຮັບຈາກ ທ່ານ ຮອງປະທານແນວລາວສ້າງຊາດແຂວງ ຄໍາມ່ວນ ແລະ ແຂວງສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງຂອງທັງ 2 ແຂວງ ແລະ ເມືອງເຂົ້າຮ່ວມ.

     ການລົງເຜີຍແຜ່ໃນຄັ້ງນີ້ ແມ່ນເພື່ອທາມທາບ ແລະ ສ້າງຄວາມເຂົ້າໃຈໃຫ້ແກ່ທ້ອງຖິ່ນ ກ່ຽວກັບໂຄງການທົດລອງສິນເຊື່ອກາກບອນ ກໍຄື “ໂຄງການເຮັດນາແຊງ ແບບປຽກສະຫຼັບແຫ້ງ”; ພ້ອມນັ້ນ, ໄດ້ຮັບຟັງການນໍາສະເໜີກ່ຽວກັບໂຄງການ; ຮ່າງສັນຍາກ່ຽວກັບການສ້າງຕັ້ງຄະນະທິມງານຮັບຜິດຊອບຂັ້ນເມືອງ ແລະ ບ້ານ; ເຕັກນິກການເຮັດນາ ແຊງ ແບບປຽກສະຫຼັບແຫ້ງ ຈາກສູນຄົ້ນຄວ້າເຂົ້າ ແລະ ພຶດເສດຖະກິດ ສະຖາບັນຄົ້ນຄວ້າກະສິກໍາ; ການຄຸ້ມຄອງ ແລະ ການນໍາໃຊ້ນໍ້າຊົນລະປະທານສໍາລັບໂຄງການ ຈາກກົມຊົນລະປະທານ; ການຄຸ້ມຄອງ ແລະ ການແກ້ໄຂບັນຫາການປ່ຽນແປ່ງດິນຟ້າອາກາດ ຈາກກົມຄຸ້ມຄອງການປ່ຽນແປງດິນຟ້າອາກາດ ແລະ ວິໄສທັດ ແລະ ຍຸດທະສາດ ວ່າດ້ວຍຊັບພະຍາກອນທໍາມະຊາດ ແລະ ສິ່ງແວດລ້ອມ ຈາກກົມສິ່ງແວດລ້ອມກະຊວງຊັບພະຍາກອນທໍາມະຊາດ ແລະ ສິ່ງ ແວດລ້ອມ. ຮັບຟັງຂໍ້ມູນດ້ານກະສິກໍາຈໍານວນໜຶ່ງ ຈາກຫ້ອງການກະສິກໍາ ແລະ ປ່າໄມ້ ເມືອງໜອງບົກ ແຂວງຄໍາມ່ວນ ແລະ ເມືອງ ໄຊບູລີ ແຂວງສະຫວັນນະເຂດ. ພ້ອມດຽວກັນນັ້ນ, ໄດ້ແລກປ່ຽນບົດຮຽນ ແລະ ປະກອບຄໍາເຫັນຕ່າງໆຮ່ວມກັນ ເປັນຕົ້ນການແຕ່ງຕັ້ງຄະນະຮັບຜິດຊອບໂຄງການ, ຊຶ່ງປະກອບດ້ວຍ ຂັ້ນເມືອງ; ຫ້ອງການກະສິກໍາ ແລະ ປ່າໄມ້ເມືອງ, ນາຍບ້ານ ແລະ ປະທານແນວລາວສ້າງຊາດບ້ານ ເປົ້າໝາຍໂຄງການ; ສ້າງແຜນ ແລະ ຝຶກອົບຮົມ ວຽກງານໂຄງການໃຫ້ແກ່ ຄະນະຮັບຜິດຊອບດັ່ງກ່າວ ແລະ ສົມທົບກັບຄະນະຮັບຜິດຊອບຂັ້ນທ້ອງຖິ່ນ ເພື່ອຈັດຕັ້ງປະຕິບັດ ໂຄງການສິນເຊື່ອກາກບອນ ກໍຄື “ໂຄງການເຮັດນາແຊງ ແບບປຽກສະຫຼັບແຫ້ງ”ໄດ້ຮັບຜົນສໍາເລັດຕາມເປົ້າໝາຍທີ່ວາງໄວ້.