ສູນກາງແນວລາວສ້າງຊາດ

Lao Front For National Development

ວິທະຍາໄລຄູຄັງໄຂຈັດພິທີເປີດຊຸດຮຽນ ແລະ ປະຖົມນິເທດ ນັກສຶກສາປະລິນຍາໂທວິທະຍາສາດ ສາຂາຄະນິດສາດ ຮຸ່ນທີ່ 12

ໃນຕອນເຊົ້າ ວັນທີ 17 ສິງຫາ 2021 ນີ້ຢູ່ສະໂມສອນ ວິທະຍາໄລຄູຄັງໄຂ ແຂວງຊຽງຂວາງ ໄດ້ມີພິທີເປີດ ເປີດຊຸດຮຽນ ແລະ ປະຖົມນິເທດສຶກສາ  ນັກສຶກສາປະລິນຍາໂທວິທະຍາສາດ ສາຂາຄະນິດສາດ ຮຸ່ນທີ່ 12 ຂອງຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ຂື້ນຢ່າງເປັນທາງການ, ໂດຍການເປັນປະທານ ແລະ ກ້າວເປີດພິທີຂອງ ທ່ານ ວັນນີ ຢ່າງເຈຍມົວ ຜູ້ອຳນວຍການວິທະຍາໄລຄູຄັງໄຂ, ເປັນກຽດເຂົ້າຮ່ວມມີ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ທ່ານ ບຸນເລື່ອນ ວັນນາຮັກ ກຳມະການພັກແຂວງ ຫົວໜ້າພະແນກສຶກສາ ແລະ ກິລາແຂວງ, ທ່ານ ຮສ ປອ ບຸນຜັນ ຕົ້ນແພງ ຄະນະບໍດີ ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ, ຄູອາຈານທີ່ມາຈາກມະຫາວິທະຍາໄລແຫ່ງຊາດ ຕະຫຼອດຮອດນັກສຶກສາປະລິນຍາໂທ ວິທະຍາສາດ ສາຂາຄະນິດສາດ ເຂົ້າຮ່ວມ.

ໃນພິທີ, ໄດ້ຜ່ານຂໍ້ຕົກລົງ ສະບັບເລກທີ 205Iສສກ ວ່າດ້ວຍການຮັບຮອງ ແລະ ອະນຸມັດ ຮັບຮອງຫຼັກສູດ ລະດັບປະລິນຍາໂທວິທະຍາສາດ ສາຂາຄະນິດສາດນຳໃຊ້ຢູ່ຄະນະວິທະຍາສາດທຳມະຊາດ, ມະຫາວິທະຍາໄລແຫ່ງຊາດ. ຈາກນັ້ນ, ໄດ້ສະເໜີສະພາບລວມໂດຍຫຍໍ້ຂອງຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ໂດຍໃຫ້ຮູ້ວ່າ:  ສໍໍາລັບນັກສຶກສາທີ່ສຶກສາປະລິນຍາໂທ ສາຂາຄະນິດສາດ ຢູ່ທີ່ວິທະຍາໄລຄູຄັງໄຂ ແຂວງຊຽງຂວາງ ລວມມີ 19 ທ່ານ, ຍິງ 9 ທ່ານ. ຄະນະວິທະຍາສາດທຳມະຊາດ ປະລິນຍາໂທ ສາຂາຄະນິດສາດ ປະກອບມີ 6 ຫຼັກສູດຄື: 1) ຫຼັກສູດປະລິນຍາໂທ ສາຂາຄະນິດສາດ,​ 2) ຫຼັກສູດປະລິນຍາໂທ ສາຂາຟີຊິກສາດ, 3) ຫຼັກສູດປະລິນຍາໂທ ສາຂາພະລັງງານທົດແທນ, 4) ຫຼັກສູດປະລິນຍາໂທ ສາຂາຊີວະສາດ, 5) ຫຼັກສູດປະລິນຍາໂທ ສາຂາເຄມີສາດ ແລະ 6) ຫຼັກສູດປະລິນຍາໂທ ສາຂາວິທະຍາສາດຄອມພິວເຕີ. ຄຽງຄູ່ກັນນັ້ນ, ກໍ່ໄດ້ສະເໜີຫຼັກສູດຫຼັງປະລິນຍາຕີ ຂອງຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ກ່ຽວກັບຫຼັກສູດຕ່າງໆທີ່ກ່ຽວຂ້ອງ. ທັ້ງນີ້ ເພື່ອໃຫ້ເຂົ້າໃຈຢ່າງເລິກເຊີ່ງກ່ຽວກັບການເປີດການຮຽນການສອນ ຫຼັກສູດປະລິນຍາໂທ ວິທະຍາສາດສາຂາຄະນິດສາດ ທີ່ວິທະຍາໄລຄູຄັງໄຂ.

ທ່ານ ນາງ ບົວສີ ນາຖາວົງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ແລະ ຄະນະວິທະຍາໄລຄູຄັງໄຂ ທີ່ໄດ້ມີການປະສານສົມທົບຮ່ວມມືເຊີ່ງກັນ ແລະກັນ ທາງດ້ານວິຊາການ ແລະ ປະສານສົມທົບກັບພາກສ່ວນຕ່າງໆທີ່ກ່ຽວຂ້ອງ ຈົນສາມາດເປີດຊຸດຮຽນລະດັບປະລິນຍາໂທ ຮຸ່ນທີ່ 12 ຂອງຄະນະວິທະຍາສາດທຳມະຊາດ ຂື້ນທີ່ວິທະຍາໄລຄູຄັງຄັງໄຂ, ພ້ອມກັນພັດທະນາຄຸນນະພາບການສຶກສາຂອງລາວເຮົາ ໃຫ້ກ້າວຂື້ນສູ້ຄຸນນະພາບໃໝ່ ແລະ ທ່ານໄດ້ເນັ້ນໜັກບາງບັນຫາສຳຄັນຄື: ໃຫ້ທາງຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ແລະ ວິທະຍາໄລຄູຄັງໄຂ ສືບຕໍ່ຮ່ວມມືກັນໃນດ້ານຕ່າງໆເປັນຕົ້ນແມ່ນ ຍົກລະດັບປະລິນຍາໂທກ້າວຂຶ້ນສູ່ປະລິນຍາເອກ ຕາມສາຂາວິຊາຕ່າງໆ ທີ່ມີຄວາມພ້ອມ, ສືບຕໍ່ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດໃຫ້ແກ່ຄູອາຈານ ແລະ ນັກສຶກສາ ທີ່ເປັນຄົນຮຸ່ນໜຸ່ມທີ່ຈະເປັນຜູ້ສຶບທອດໃນພາລະກິດປົປັກຮັກສາ ແລະສ້າງສາພັດທະນາປະເທດຊາດ,  ໃຫ້ເຂົາເຈົ້າມີນ້ຳໃຈຮັກຊາດ, ມີຄວາມເສຍສະຫຼະ, ມີຄວາມດຸໝັ້ນຂະຫຍັນພຽນຕໍ່ການສຶກສາຄົ້ນຄ້ວາຮ່ຳຮຽນ.  ເພີ່ມທະວີຄວາມສາມັກຄີຮັກແພງຊ່ວຍເຫຼືອເຊີ່ງກັນ ແລະກັນ ພາຍຫຼັງສຳເລັດການສຶກສາແລ້ວຂໍໃຫ້ທຸກຄົນຈົ່ງ ນຳເອົາຄວາມຮູ້ ແລະປະສົບການທີ່ໄດ້ຮຽນມາ ໄປຈັດຕັ້ງຜັນຂະຫຍາຍເຂົ້າໃນໜ້າວຽກຂອງຕົວຈີງ ທີ່ຕົນເອງຮັບຜິດຊອບ ໃຫ້ໄດ້ຮັບຜົນດີ ແລະ ໄດ້ຕາມລະດັບຄາດໝາຍທີ່ຕັ້ງໄວ້.

info@lfnd.org.la | 021 213754 | (856-21) 453191