ເພື່ອເປັນການເສີມຂະຫຍາຍສາຍພົວພັນມິດຕະພາບ ລາວ-ຈີນ ໃຫ້ກ້າວສູ່ລວງເລິກຮອບດ້ານທີ່ມີຫຼາຍສີສັນ ນັບທັງການແລກປ່ຽນວັດທະນະທຳ ແລະ ຈັດກິດຈະກຳຮວ່ມກັນ ເນື່ອງໃນໂອກາດລະນຶກ ຄົບຮອບ 62 ປີ ແຫ່ງການສ້າງຕັ້ງສາຍພົວພັນການທູດ ລາວ-ຈີນ, ສູນກາງແນວລາວສ້າງຊາດຮວ່ມກັບວິທະຍຸໂທລະພາບສູນກາງຈີນ (CMG) ປະຈໍາລາວ ໄດ້ຈັດກິດຈະກໍາສາຍຮູບເງົາຈີນພາກພາສາລາວ ແລະ ຮູບເງົາສາລະຄະດີມິດຕະພາບ ລາວ-ຈີນ ຂື້ນໃນວັນທີ 17 ພຶດສະພາ 2023 ຢູ່ສູນກາງແນວລາວສ້າງຊາດ. ໂດຍເປັນກຽດເຂົ້າຮ່ວມ ຂອງທ່ານ ຄໍາໄຫລ ສີປະເສີດ ກໍາມະການສູນກາງພັກ, ຮອງປະທານຜູ້ປະຈໍາການ ສູນກາງແນວລາວສ້າງຊາດ, ມີທ່ານຮອງປະທານ, ກໍາມະການສູນກາງແນວລາວສ້າງຊາດ, ຄະນະປະຈໍາ, ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນ (CMG) ປະຈໍາລາວ, ຄະນະກົມ, ຕາງໜ້າສະມາຄົມຜູ້ສູງອາຍຸ, ອົງການພາຄີອ້ອມຂ້າງສູນກາງ, ສາສະໜາຕ່າງໆ, ແນວລາວສ້າງຊາດນະຄອນຫຼວງ ແລະ ພະນັກງານລັດຖະກອນ ສນຊ ເຂົ້າຮ່ວມ.
ໃນໂອກາດນີ້, ທ່ານ ເຍ່ຍເກີຢາ ໜໍຈໍຈົງຕົວ ຮອງປະທານສູນກາງແນວລາວສ້າງຊາດໄດ້ຕາງໜ້າໃຫ້ ສນຊ ສະແດງຄວາມຊົມເຊີຍ ແລະ ຂອບໃຈມາຍັງ CMG ປະຈໍາລາວທີ່ໄດ້ເປີດໂອກາດ ແລະ ອຳນວຍຄວາມສະດວກໃຫ້ການນຳ ແລະ ພະນັກງານສນຊໄດ້ຊົມຮູບເງົາຈີນແລະສາລະຄະດີມິດຕະພາບລາວ-ຈີນພາກພາສາລາວໃນທ່າມກາງສາຍພົວພັນມິດຕະພາບ ແລະ ການຮວ່ມມືລາວ-ຈີນ ພວມກ້າວສູ່ລວງເລິກຮອບດ້ານໃນທຸກຂົງເຂດວຽກງານ,ນັບທັງການແລກປ່ຽນວັດທະນະທຳຮວ່ມກັນ.
ທ່ານ ເຍ່ຍເກີຢາ ໜໍຈໍຈົງ ຕົວກ່າວຕື່ມວ່າ: ພາຍຫຼັງໄດ້ຊົມຮູບເງົາແລ້ວ, ຫວັງຢ່າງຍິ່ງວ່າຈະເຮັດໃຫ້ພວກເຮົາກຳບົດຮຽນ ແລະ ປະສົບການຂອງພັກ, ລັດ ແລະ ປະຊາຊົນຈີນໃນການພັດທະນາສ້າງສາປະເທດຊາດໄດ້ຢ່າງມີຜົນສຳເລັດແລະຜ່ານການຊົມຮູບເງົາຈີນພາກພາສາລາວຄັ້ງນີ້ຈະເຮັດໃຫ້ຄວາມສາມັກຄີຮັກແພງແບບເພື່ອນມິດສະຫາຍຍິ່ງໄດ້ຮັບການເພີ່ມທະວີຜູກພັນໃຫ້ແໜ້ນແຟ້ນໝັ້ນຄົງຍາວນານ ບົນພື້ນຖານການເປັນຄູ່ຮ່ວມມືຍຸດທະສາດຮອບດ້ານ, ການພົວພັນຮ່ວມມືຕາມທິດ 4 ດີ ແລະ ການສ້າງເປັນຄູ່ຮ່ວມຊະຕາກໍາດຽວກັນຕະຫຼອດໄປ. ພິເສດ, ຜ່ານການຊົມຮູບເງົນຈີນແລ້ວ, ພວກເຮົາຈະໄດ້ເຂົ້າໃຈປະເທດຈີນ, ປະຊາຊົນຈີນ ແລະ ມັກຮັກປະເທດຈີນຫຼາຍຂື້ນ. ອວຍພອນໃຫ້ມິດຕະ ພາບລາວ-ຈີນຈົ່ງໝັ້ນຄົງທະນົງແກ່ນຕະຫຼອດໄປ.
ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນປະຈໍາລາວກໍໄດ້ກ່າວວ່າ: ຮູບເງົາທີ່ນໍາມາສາຍໃນມື້ນີ້ມີສອງເລື່ອງຄືຮຸບເງົາສາລະຄະດີມິດຕະພາບລາວ-ຈີນເລື່ອງ ”ຄວາມຮັກອັນຍິ່ງໃຫຍ່ໄຮ້ພົມແດນ” ແລະ ຮູບເງົາຈີນເລື່ອງ ”ຂ້າມແມ່ນໍ້າຢ່າລູ້ໄປ” ເຊິ່ງຜະລິດໂດຍວິທະຍຸໂທລະພາບສູນກາງຈີນ ຫຼື CMGແລະພາກເປັນພາສາລາວ,ໂດຍຮູບເງົາທັງ 2 ເລື່ອງ ໄດ້ເຕົ້າໂຮມເອົາທິມງານຖ່າຍທຳ ນາຍແປພາສາ ແລະ ນັກພາກສຽງທີ່ດີເດັ່ນຂອງສອງປະເທດຈີນ-ລາວເຂົ້າມາມີສວ່ນຮວ່ມໃນຮູບເງົາດັ່ງກ່າວ,ທັງເປັນການສ່ອງແສງໃຫ້ເຫັນເຖິງຮູບປະທຳອັນປະທັບໃຈຂອງມິດຕະພາບລາວ-ຈີນ-ລາວ.
ທ່ານນາງ ແສງແກ້ວ ກ່າວຕື່ມວ່າ: ຕາງໜ້າໃຫ້ ວິທະຍຸໂທລະພາບສູນກາງຈີນ CMG, ຮູ້ສຶກດີໃຈຫຼາຍ ແລະ ເປັນກຽດຢ່າງສູງ ທີ່ໄດ້ມາສາຍຮູບເງົາຢູ່ສຳນັກງານສູນກາງແນວລາວສ້າງຊາດ, ເຊິ່ງເປັນອົງການຈັດຕັ້ງສຳພັນທາງການເມືອງຂອງທົ່ວສັງຄົມຢ່າງກວ້າງຂວາງ,ນັບທັງເປັນອົງການຈັດຕັ້ງສັງຄົມ ແລະ ບຸກຄົນທີ່ເປັນຕົວແທນໃຫ້ແກ່ຊັ້ນຄົນ, ຊົນເຜົ່າສາສະໜາ, ເພດ, ໄວລວມທັງຕົວແທນຄົນເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ບົນພື້ນຖານຄວາມຕື່ນຕົວແລະສະໝັກໃຈ ແລະ ມາຮອດປັດຈຸບັນ,ປະຊາຊົນ2ຊາດລາວ-ຈີນ ພວມສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດ ແລະ ການຮວ່ມມືຮອບດ້ານ, ໝັ້ນຄົງຍາວນານ ລາວ-ຈີນ ຕິດພັນກັບການປະຕິບັດແຜນແມ່ບົດຄູ່ຮວ່ມຊະຕາກຳ ລາວ-ຈີນ ໃຫ້ເກີດດອກອອກຜົນຕະຫຼອດໄປ.
ພາບ-ຂ່າວ ແສງຫລ້າ
ບກ. ໄພຈິດ
