ສູນກາງແນວລາວສ້າງຊາດ

Lao Front For National Development

ສນຊ ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນ ສ ເກົາຫຼີ

ໃນວັນທີ 17 ມັງກອນ 2020 ຜ່ານມານີ້, ທ່ານ ຈັນທະວົງ ແສນອາມາດມົນຕີ ຮອງປະທານ ສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ກູຈຸງກອນ ເຈົ້າເມືອງຮວາຊັນກຸນ ສ ເກົາຫຼີ ພ້ອມດ້ວຍຄະນະ ມີບັນດາທ່ານຫົວໜ້າ-ຮອງຫົວໜ້າກົມ, ຫ້ອງການ ສນຊ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ກູຈຸງກອນ ໄດ້ສະແດງຄວາມຂອບໃຈຕໍ່ທາ່ນ ຮອງປະທານ ສນຊ ທີ່ໄດ້ສະຫຼະເວລາອັນມີຄ່າ, ຕ້ອນຮັບຄະນະ ພ້ອມກັນນີ້, ທັງສອງຝ່າຍໄດ້ປຶກສາຫາລືກ່ຽວກັບຄວາມເປັນໄປໄດ້ ໃນການສ້າງໂຄງການກະສິກໍາແບບທັນສະໄໝຢູ່ ສປປ ລາວ ແລະ ຄົ້ນຄວ້າສ້າງຄວາມສະດວກໃຫ້ແກ່ຄົນລາວທີ່ຈະໄປອອກແຮງງານ ຢູ່ ສ ເກົາຫຼີ ເພື່ອເປັນການຍົກລະດັບຄວາມຮູ້ຄວາມສາມາດ ແລະ ຖືເປັນອາຊີບເສີມສ້າງລາຍໄດ້ເຂົ້າໃນການພັດທະນາປະເທດຊາດໃຫ້ດີຂຶ້ນ.
ທ່ານ ຮອງປະທານ ສນຊ ໄດ້ສະແດງຄວາມຊົມເຊີຍ ຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນ ຄັ້ງນີ້ ຂອງຄະນະຜູ້ແທນເມືອງຮວາຊັນກຸນ ສ ເກົາຫຼີ, ເຊິ່ງເປັນການປະກອບສ່ວນສໍາຄັນໃນພາລະກິດສ້າງສາພັດທະນາປະເທດຊາດຂອງປະຊາຊົນລາວ ແລະ ຍັງໄດ້ສະແດງຄວາມຊົມເຊີຍຕໍ່ການພົວພັນຮ່ວມມືຂອງທັງສອງພັກ-ລັດ, ປະຊາຊົນສອງຊາດ ລາວ-ເກົາຫຼີ.

info@lfnd.org.la | 021 213754 | (856-21) 453191