ສູນກາງແນວລາວສ້າງຊາດ

Lao Front For National Development

ສນຊ ປາຖະກະຖາມູນເຊື້ອກອງທັບປະຊາຊົນລາວ ແລະ ວິລະກໍາຂອງກອງຮ້ອບຫີນເພັດວິລະຊົນແຫ່ງຊາດ

ສູນກາງແນວລາວສ້າງຊາດ ໄດ້ຈັດພິທີປາຖະກະຖາມູນເຊື້ອກອງທັບປະຊາຊົນລາວ ຄົບຮອບ 68 ປີ ແລະ ວິລະກໍາຂອງກອງຮ້ອຍຫີນເພັດວິລະຊົນແຫ່ງຊາດຂຶ້ນ ໃນວັນທີ 14 ກຸມພາ 2017 ນີ້, ທີຫ້ອງປະຊຸມສູນກາງແນວລາວສ້າງຊາດ.

ເປັນກຽດເຂົ້າຮ່ວມມີບັນດາທ່ານຮອງປະທານ ສນຊ, ຄະນະປະຈໍາ ສນຊ, ຄະນະກໍາມະການສູນກາງແນວລາວສ້າງຊາດອ້ອມຂ້າງສູນກາງ ແລະ ມີບັນດາທ່ານຕາງໜ້າອົງການຈັດຕັ້ງພາຄີ, ຫົວໜ້າກົມ, ຮອງຫົວໜ້າກົມຕະຫຼອດຮອດພະນັກງານ-ລັດຖະກອນ ເຂົ້າຮ່ວມຮັບຟັງ.

ໃຫ້ກຽດປາຖະກະຖາໂດຍທ່ານ ພົ/ວ ທອງເຄນ ອ່ອນດາວົງ ພະນັກງານປະຕິວັດ-ອາວຸໂສບຳນານ, ອາດີດຮອງປະທານສະຫະພັນນັກຮົມເກົ່າແຫ່ງຊາດ ເຊິ່ງທ່ານໄດ້ໃຫ້ຮູ້ວ່າ: ຜ່ານຂະບວນວິວັດແຫ່ງການຕໍ່ສູ້ຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກໃນທຸກບາດກ້າວເດີນຂອງພາລະກິດຕໍ່ສູ້ປະຕິວັດບົນເສັ້ນທາງອັນລະອິດລະອ້ຽວ, ລໍາບາກ, ຍາວນານ ແລະ ເຕັມໄປດ້ວຍການເສຍສະຫຼະອັນໃຫຍ່ຫຼວງນັ້ນ ລ້ວນແຕ່ຕິດພັນກັບການເຄື່ອນໄຫວສູ້ຮົບທີ່ອົງອາດກ້າຫານຂອງກອງທັບປະຊາຊົນລາວ; ໃນໄລຍະດັ່ງກ່າວມີຫຼາຍກົມກອງນັບທັງກໍາລັງຫຼວງ ແລະ ທ້ອງຖິ່ນ ສ້າງໄດ້ຜົນງານທີດີເດັ່ນປະກອບສ່ວນອັນໃຫຍ່ຫຼວງໃຫ້ແກ່ປະເທດຊາດຢ່າງສົມກຽດ. ໃນນັ້ນ, ກອງຮ້ອຍ 2 ( ກອງຮ້ອຍຫີນເພັດ) ປ້ອງກັນສໍານັກງານແນວລາວສ້າງຊາດ ທີ່ປະຈໍາຢູ່ນະຄອນຫຼວງວຽງຈັນ, ແມ່ນພາກສ່ວນໜຶ່ງຂອງກອງ ທັບປະຊາຊົນລາວ ທີ່ມີຜົນງານດີເດັ່ນໃນການເຮັດໜ້າປ້ອງກັນລັດຖະບານປະສົມ ຄັ້ງທີ 2, ປ້ອງກັນຜູ້ຕ່າງໜ້າແນວລາວຮັກຊາດ ແລະ ຄະນະຜູ້ແທນຂອງແນວລາວຮັກຊາດ ທີ່ເຂົ້າມາເຈລະຈາແຕ່ລະຄັ້ງໄຫ້ມີຄວາມປອດໄພ.

ຕະຫຼອດໄລຍະ 12 ປີ (1962-1974) ທີ່ກອງຮ້ອຍ 2 ( ກອງຮ້ອບຫີນເພັດ) ປ້ອງກັນຜູ້ນໍາປະຈຳສຳນັກງານຜູ້ຕາງໜ້າແນວລາວຮັກຊາດ ປະຈໍາຢູ່ນະຄອນຫຼວງວຽງຈັນ ໄດ້ຮັກສາມູນເຊື້ອມຂອງກອງທັບເຮົາເປັນຢ່າງດີ, ມີຄວາມຈົງຮັກພັກດີຕໍ່ພັກ-ປະເທດຊາດ ຢ່າງສຸດຂີດ, ມີນໍ້າໃຈສູ້ຮົບພິລະອາດຫານບໍ່ຄອນແຄນຕໍ່ການປິດລ້ອມອ້ອມຕີ, ນາບຂູ່ຂອງສັດຕູ້ຢ່າງເດັດຂາດ, ມີນໍ້າໃຈອົດທົນ, ເດັດດ່ຽວໜຽວແໜ້ນຜ່ານຜ່າຄວາມຫຍຸ້ງຍາກນາໆປະການ, ເຮັດສໍາເລັດທຸກໜ້າທີ່, ຕີຊະນະທຸກກົນອຸບາຍເລລຽມ, ທໍາລາຍມ້າງເພຂອງສັດຕູໃຫ້ປະລາໄຊ, ປ້ອງກັນຜູ້ນໍາເຮົາໃຫ້ມີຄວາມປອດໄພຮ້ອຍສ່ວນຮ້ອຍ. ດັ່ງນັ້ນ, ກອງຮ້ອຍ 2 ( ກອງຮ້ອບຫີນເພັດ) ປ້ອງກັນຜູ້ນໍາເຮົາປະຈໍາຢູ່ນະຄອນຫຼວງວຽງຈັນ ສົມແລ້ວທີ່ພັກ ແລະ ລັດເຮົາໃຫ້ນາມມະຍົດ ເປັນກອງຮ້ອຍຫີນເພັດວິລະຊົນຂອງຊາດລາວວິລະຊົນ.

info@lfnd.org.la | 021 213754 | (856-21) 453191