ກອງປະຊຸມພົບປະລະຫວ່າງ ຄະນະປະຈໍາ ສູນກາງແນວລາວສ້າງຊາດ (ສນຊ) ກັບ ພະນັກງານປະຕິວັດອາວຸໂສບຳນານ ແລະ ສະມາຄົມຜູ້ອາຍຸສູງ, ໄດ້ຈັດຂຶ້ນ ໂດຍການເປັນປະທານຂອງ ທ່ານ ປອ. ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນການແນວລາວສ້າງຊາດ, ມີທ່ານລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ທ່ານຮອງປະທານ ສູນກາງແນວລາວສ້າງຊາດ, ຫົວໜ້າກົມ, ຮອງຫົວໜ້າກົມ, ຫົວໜ້າຫ້ອງ ການ, ພະນັກງານປະຕິວັດອາວຸໂສບຳນານ, ສະມາຄົມຜູ້ອາຍຸສູງ ແລະ ແຂກຖຶກເຊີນ ທີ່ກ່ຽວຂ້ອງເຂົ້າຮ່ວມ ທັງໜົດ 173 ທ່ານ, ຍິງ 59 ທ່ານ ຢູ່ທີ່ສຳນັກງານສູນກາງແນວລາວສ້າງຊາດ, ໃນວັນທີ 12 ຕຸລາ 2023.
ທ່ານປະທານສູນກາງແນວລາວສ້າງຊາດ ໄດ້ກ່າວວ່າ: ການພົບປະເທື່ອນີ້ ແມ່ນຢູ່ໃນບັນຍາກາດ ສະເຫຼີມສະ ຫຼອງວັນປະກາດເອກະລາດ 12 ຕຸລາ ຄົບຮອບ 78 ປີ (1945-2023) ຊຶ່ງເປັນວັນທີ່ມີຄວາມໝາຍສໍາຄັນຍິ່ງ ເພາະແມ່ນວັນປະກາດເອກະລາດຂອງປະເທດລາວ ຕໍ່ຊາວໂລກຢ່າງເປັນທາງການ, ເປັນໄຊຊະນະທີ່ມີຄວາມໝາຍປະຫວັດ ສາດອັນສຳຄັນທີ່ສຸດ; ເປັນໄຊຊະນະແຫ່ງການນຳພາ ອັນຖືກຕ້ອງສະຫຼາດສ່ອງໃສ ຂອງພັກກອມມູນິດອິນດູຈີນ, ທັງແມ່ນໝາກຜົນແຫ່ງການເສີມຂະຫຍາຍມູນເຊື້ອຮັກຊາດ, ເດັດດ່ຽວບໍ່ຍອມຈຳນົນ, ນໍ້າໃຈສາມັກຄີແໜ້ນແກ່ນ ຂອງປະ ຊາຊົນລາວທັງຊາດ ເຂົ້າໃນການກອບກູ້ເອກະລາດແຫ່ງຊາດ, ແມ່ນໄຊຊະນະແຫ່ງຄວາມສາມັກຄີຕໍ່ສູ້ອັນແໜ້ນແກ່ນ ຂອງປະຊາຊົນ 3 ຊາດ ອິນດູຈີນ; ການປະກາດເອກະລາດ ວັນທີ 12 ຕຸລາ 1945 ໄດ້ເຮັດໃຫ້ຊາວໂລກຮັບຮູ້ດິນແດນ ອັນຄົບຖ້ວນ, ເປັນໄຊຊະນະ ທີ່ມີຄວາມໝາຍປະຫວັດສາດ ອັນສຳຄັນທີ່ສຸດ; ຈາກໄຊຊະນະດັ່ງກ່າວ, ໄດ້ສົ່ງຜົນເຮັດໃຫ້ພັກ ແລະ ປະຊາຊົນລາວ ມີປະສົບການຫຼາຍຢ່າງ, ສ້າງໃຫ້ພັກ ມີກຳລັງປະຕິວັດໃໝ່, ມີທ່ວງທ່າໃໝ່ ແລະ ເພີ່ມຄວາມເຊື່ອໝັ້ນ ຕໍ່ໄຊຊະນະໃນການຕໍ່ຕ້ານ ພວກຈັກກະພັດລ່າເມືອງຂຶ້ນແບບເກົ່າ ທີ່ກັບຄືນມາຮຸກຮານລາວເທື່ອໃໝ່ ແລະ ຕ້ານການແຊກແຊງ ຂອງຈັກກະພັດລ່າເມືອງຂຶ້ນແບບໃໝ່ ຈົນນໍາມາສູ່ການປົດປ່ອຍປະເທດຊາດຢ່າງສົມບູນ ແລະ ສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ໃນໂອກາດນີ້, ໄດ້ແລກປ່ຽນຄິດຄຳເຫັນ ໃນ 4 ບັນຫາ ຄື: ທົບທວນຄືນ ຕະຫຼອດໄລຍະ 78 ປີຜ່ານມານີ້ ພວກເຮົາ ມີຜົນສຳເລັດສຳຄັນຫຍັງແດ່, ປັດຈຸບັນພວກເຮົາພວມປະເຊີນໜ້າກັບຄວາມເຄັ່ງຮ້ອນຫຍັງແດ່, ພວກເຮົາຈະພ້ອມກັນຜ່ານຜ່າແນວໃດ ແລະ ໃນສະພາບການປັດຈຸບັນ ຮຽກຮ້ອງໃຫ້ຜູ້ອາວຸໂສ ແລະ ອົງການຈັດຕັ້ງມະຫາຊົນ ພວກເຮົາມີສ່ວນຮ່ວມນຳກັນແນວໃດ;
ນອກຈາກນີ້, ຍັງໄດ້ຮັບຟັງການລາຍງານກ່ຽວກັບວຽກງານສະມາຄົມຜູ້ອາຍຸສູງ, ມາດຕະການແກ້ໄຂບັນຫາເງິນເຟີ້, ຄ່າຄອງຊີບສູງ ແລະ ລາຄາສິນຄ້າ, ສະພາບ ແລະ ການແກ້ໄຂບັນຫາຂໍ້ຫຍຸ້ງຍາກ ຢູ່ນະຄອນຫຼວງວຽງຈັນ ແລະ ໄດ້ມອບຫຼຽນການລະນຶກ 60 ປີ ຂອງແນວລາວສ້າງຊາດ ໃຫ້ແກ່ນັກຮົບປະຕິວັດ ແລະ ສະມາຊິກສະມາຄົມຜູ້ອາຍຸສູງ ຜູ້ທີ່ມີອາຍຸສູງ ແລະ ແຂງແຮງຈຳນວນ 10 ທ່ານ; ຫຼັງຈາກນັ້ນ, ບັນດາທ່ານຜູ້ແທນເຂົ້າຮ່ວມກອງປະຊຸມ ໄດ້ໄປຢ້ຽມຊົມພິທິທະພັນສິລະປະລາວ ແລະ ຢ້ຽມຊົມ ແລະ ຊື້ສິນຄ້າລາວ ໃນງານວາງສະແດງສິນຄ້າລາວ ຢູ່ທີ່ສູນການຄ້າໂພນຕ້ອງຈອມມະນີ ຕື່ມອີກ.
ຂ່າວ-ພາບ: ແສງຫຼ້າ
ບກ: ຈິດຕະພົງ
