ວັນທີ 12 ກັນຍາ 2024 ແນວລາວສ້າງຊາດແຂວງຫຼວງນໍ້າທາ ໄດ້ຮັບເຄື່ອງຊ່ວຍເຫຼືອຈາກສູນກາງແນວລາວສ້າງຊາດ ທີ່ແຂວງດັ່ງກ່າວ(ຝາກ) ເປັນມູນຄ່າທັງໝົດ 100 ລ້ານກີບ ໃນນັ້ນ, ເງິນສົດ 20 ລ້ານກີບ ແລະ ເຂົ້າສານ ແລະ ນໍ້າດື່ມ ມູນຄ່າ 80 ລ້ານກີບ. ຈາກນັ້ນ ທ່ານ ບຸນປີ ໄລປະເສີດ ກໍາມະການພັກແຂວງ, ປະທານແນວລາວສ້າງຊາດແຂວງຫຼວງນໍ້າທາ ພ້ອມດ້ວຍຄະນະ ໄດ້ພ້ອມກັນຈັດແຈງ ແລ້ວນໍາໄປມອບໃຫ້ປະຊາຊົນທີ່ຖືກຜົນກະທົບຈາກໄພນໍ້າຖ້ວມ  ຢູ່ 5 ສູນໃຫຍ່.

ເຄື່ອງບໍລິໂພກ ແລະ ເງິນສົດຈໍານວນດັ່ງກ່າວ ແມ່ນໄດ້ມາຈາກກໍາມະການ ສູນກາງແນວລາວສາ້ງຊາດ ແລະ ອົງການພຸດທະສາສະໜາສໍາພັນລາວ ທີ່ມີຈິດໃຈຊ່ວຍເຫຼືອເມດຕາ ແລະ ແບ່ງເບົາຄວາມຫຍຸ້ງຍາກຂອງປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມຄັ້ງຮ້າຍແຮງຢູ່ແຂວງດັ່ງກ່າວ ເພື່ອສ້າງຂັວນກໍາລັງໃຈໃຫ້ປະຊາຊົນໄດ້ອົດທົນຜ່ານຜ່າຕໍ່ອຸປະສັກເຫດການດັ່ງກ່າວ.

ໃນໂອກາດດັ່ງກ່າວ ທ່ານປະທານແນວລາວສ້າງຊາດແຂວງ ພ້ອມດ້ວຍຄະນະ ໄດ້ໃຫ້ສໍາພາດຕໍ່ທິມງານຂ່າວ ສນຊ ທາງອອນລາຍວ່າ: ຕາງໜ້າຄະນະນໍາຂອງແຂວງ ກໍ່ຄືກໍາມະການແນວລາວສ້າງຊາດແຂວງ ສະແດງຄວາມຂອບໃຈ ແລະ ຮູ້ບຸນຄຸນມາຍັງ ສູນກາງແນວລາວສ້າງຊາດ ແລະ ອົງການພຸດທະສາສະໜາສໍາພັນລາວ ທີ່ໄດ້ມີຄວາມເປັນຫ່ວງເປັນໃຍ ຝາກກໍາລັງໃຈ ແລະ ວັດຖຸປັດໄຈ ມາຊ່ວຍບັນເທົາທຸກໃຫ້ພໍ່ແມ່ພີ່ນ້ອງປະຊາຊົນ 30 ກ່ວາບ້ານ ທີ່ໄດ້ຮັບຜົນກະທົບຢ່າງໜັກໜ່ວງຈາກອຸທົກກະໄພຄັ້ງນີ້ ແລະ ຄະນະຮັບຜິດຊອບໄດ້ນໍາໄປມອບໝາຍໃຫ້ປະຊາຊົນສໍາເລັດແລ້ວ.

ຂ່າວ ສນຊ