ສູນກາງແນວລາວສ້າງຊາດ

Lao Front For National Development

ສນຊ ມອບເຄື່ອງຊ່ວຍເຫຼືອຜູ້ປະສົບນ້ຳຖ້ວມ ໃຫ້ແຂວງວຽງຈັນ.

ໃນວັນທີ 10 ກັນຍາ 2018 ນີ້, ທ່ານ ຮສ.ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ໄດ້ລົງເຄື່ອນໄຫວຢ້ຽມ ຢາມ ແລະ ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ໄດ້ຮັບຜົນກະທົບຈາກນ້ຳຖ້ວມ ແຂວງວຽງຈັນ, ເປັນກຽດກ່າວຮັບໂດຍທ່ານ ພອນແກ້ວ ຄຸນພົນ ເລຂາພັກເມືອງ, ເຈົ້າເມືອງ ເມືອງວຽງຄຳ ແລະ ມີບັນດາພາກສ່ວນກ່ຽວຂ້ອງເຂົ້າຮ່ວມ.

ເນື່ອງຈາກຝົນຕົກໜັກມາເປັນເວລາຫຼາຍວັນຕິດຕໍ່ກັນ ເຮັດໃຫ້ບໍລິມາດນ້ຳງື່ມເພີ່ມຂຶ້ນ ແລະ ລົ້ນຝັ່ງໄຫຼເຂົ້າສູ່ທີ່ຢູ່ອາໄສຂອງປະ ຊາຊົນ ເມືອງວຽງຄຳ ແຂວງວຽງຈັນ ໄດ້ຮັບຜົນກະທົບນ້ຳຖ້ວມ ເປັນຕົ້ນແມ່ນບ້ານວຽງຄຳ, ຖິ່ນຍຸງ, ດອນກວດ, ໂພນຮັງ, ບ້ານໃໝ່ໜອງຄວາຍ ແລະ ບ້ານທົ່ງຮາບ ເຊິ່ງໄດ້ເຮັດໃຫ້ນ້ຳຖ້ວມເຮືອນປະຊາຊົນຈຳນວນໜຶ່ງແຕ່ບໍ່ເຖິງຂັ້ນເສຍຫາຍໜັກ ແລະ ເນື້ອທີ່ນາ, ໄຮ່ສາລີ, ມັນຕົ້ນ ໜອງປາ, ສວນຜັກອື່ນໆ ໄດ້ເສຍຫາຍຈຳນວນໜຶ່ງ. ພ້ອມກັນນີ້, ທ່ານ ຮອງປະທານ ສນຊ ກໍໄດ້ມອບວັດຖຸປັດໃຈຈຳນວນໜຶ່ງໃຫ້ເມືອງວຽງຄຳ ເພື່ອນຳໄປມອບຕໍ່ໃຫ້ປະຊາຊົນ ທີ່ໄດ້ຮັບຜົນກະທົບໃນຄັ້ງນີ້ ໂດຍສະເພາະແມ່ນເຂົ້າສານ, ນ້ຳດື່ມ, ເຄື່ອງນຸ່ງຫົ່ມ ລວມມູນຄ່າທັງໝົດ 29 ລ້ານກວ່າກີບ.

ໂອກາດນີ້ທ່ານ ເຈົ້າເມືອງ ກໍໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ທ່ານຮອງປະທານ ສນຊ ກໍ່ຄືສູນກາງແນວລາວສ້າງຊາດ ທີ່ໄດ້ປະກອບສ່ວນວັດຖຸປັດໄຈຈຳນວນດັ່ງກ່າວໄປມອບໃຫ້ເມືອງວຽງຄຳ ແລະ ເຄື່ອງທີ່ໄດ້ຮັບດັ່ງກ່າວ ເມືອງຈະນຳໄປມອບຕໍ່ໃຫ້ປະ ຊາຊົນ ຜູ້ທີ່ຖືກຜົນສະທົບຈາກນ້ຳຖ້ວມໃນຄັ້ງນີ້.

info@lfnd.org.la | 021 213754 | (856-21) 453191