ວັນທີ 17 ມີນາ 2022 ນີ້ ສູນກາງແນວລາວສ້າງຊາດ(ສນຊ) ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃຫ້ບັນດາໜ່ວຍພັກ ອ້ອມຂ້າງສູນກາງແນວລາວສ້າງຊາດ, ໂດຍການເປັນປະທານຂອງ ສະຫາຍ ເຍ່ຍເກີຢ່າ ໜໍຈໍຈົງຕົວ ຄະນະປະຈຳພັກ, ຮອງປະທານສູນກາງແນວລາວສ້າງຊາດ, ມີຄະນະພັກ, ຄະນະປະຈຳ, ເລຂາ-ຮອງເລຂາໜ່ວຍພັກ ແລະ ສະມາຊິກພັກ ພ້ອມດ້ວຍພະນັກງານ-ລັດຖະກອນ ຂອງສູນກາງແນວລາວສ້າງຊາດເຂົ້າຮ່ວມ.
ໃນພິທີ, ສະຫາຍ ຄຳຢາດ ຣາຊດາວົງ ເລຂາໜ່ວຍພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດສະຫຼຸບຜົນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2021 ທີ່ຜ່ານມາ ແລະ ທິດທາງແຜນການປີ 2022 ໃນຕໍ່ໜ້າ ເຊິ່ງສະຫາຍໄດ້ຍົກໃຫ້ເຫັນວ່າ ອົງຄະນະພັກຂອງສູນກາງແນວລາວສ້າງຊາດ ປະກອບມີ 8 ໜ່ວຍພັກ, ມີສະມາຊິກພັກທັງໝົດ 131 ສະຫາຍ, ໂດຍອີງໃສ່ການຕີລາຄາຈັດປະເພດ ຂອງໜ່ວຍພັກຕາມ 5 ເນື້ອໃນ ມີ 6 ໜ່ວຍພັກທີ່ສາມາດຮັບຮອງເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຄື: ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກຫ້ອງການ, ໜ່ວຍພັກກົມໂຄສະນາ, ໜ່ວຍພັກກົມຊົນເຜົ່າ, ໜ່ວຍພັກກົມກວດກາ ແລະ ໜ່ວຍພັກກົມສາສະໜາ. ພ້ອມກັນນີ້, ສະຫາຍ ເຍ່ຍເກີຢ່າ ໜໍຈໍຈົງຕົວ ກໍໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2021 ໃຫ້ 6 ໜ່ວຍພັກດັ່ງກ່າວ.
ສະຫາຍ ຮອງປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ທີ່ບັນດາໜ່ວຍພັກສາມາດຍາດມາໄດ້ໃນໄລຍະຜ່ານມາ ແລະ ສະຫາຍໄດ້ເນັ້ນຕື່ມວ່າ: ໃຫ້ສືບຕໍ່ເອົາໃຈໃສ່ນຳພາຍົກສູງຄຸນທາດການເມືອງ, ຄຸນສົມບັດສິນທຳປະຕິວັດ ຂອງສະມາຊິກພັກ-ພະນັກງານ, ໃຫ້ແຕ່ລະໜ່ວຍພັກເອົາໃຈໃສ່ເຜີຍແຜ່ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ສະມາຊິກພັກ-ພະນັກງານ ໄດ້ກຳແໜ້ນ; ຕັ້ງໜ້າຝຶກຝົນຫຼໍ່ຫຼອມພັດທະນາຕົນເອງ, ພັດທະນາການຈັດຕັ້ງ ແລະ ເປັນເສນາທິການໃຫ້ຄະນະພັກ ໃນການຜັນຂະຫຍາຍມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ແລະ ມະຕິ V ຂອງອົງຄະນະພັກ ສູນກາງແນວລາວສ້າງຊາດ; ສຶກສາອົບຮົມໃຫ້ສະມາຊິກພັກມີຄວາມສາມັກຄີພາຍໃນ-ພາຍນອກຢ່າງແໜ້ນແຟ້ນ ແລະ ຕັ້ງໜ້າປະຕິບັດໜ້າທີ່ການເມືອງດ້ວຍຄວາມຮັບຜິດຊອບສູງ; ຮ່ວມຊີວິດການເມືອງພາຍໃນໜ່ວຍພັກໃຫ້ເປັນປົກກະຕິ, ຖືເອົາການຕໍານິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະ ກັນ, ສືບຕໍ່ກໍ່ສ້າງພະນັກງານສືບທອດປ່ຽນແທນຂັ້ນຕ່າງໆ; ສືບຕໍ່ປັບປຸງແບບແຜນນຳພາ-ແບບແຜນວິທີການເຮັດວຽກຂອງແຕ່ລະໜ່ວຍພັກ, ສືບຕໍ່ກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແລະ ສ້າງເງື່ອນໄຂໃຫ້ສະມາຊິກພັກ-ພະນັກງານໄດ້ມີໂອກາດໄປຍົກລະດັບຄວາມຮູ້ຄວາມສາມາດທາງທິດສະດີ ແລະ ວິຊາສະເພາະ.
