ສູນກາງແນວລາວສ້າງຊາດ

Lao Front For National Development

ສນຊ ສະ​ເຫຼີ​ມສະຫຼອງ​ວັນ​ແມ່ຍິງ​ສາກົນ ວັນ​ທີ 8 ມີນາ ຄົບຮອບ 114 ປີ ພາຍ​ໃຕ້​ຫົວ​ຂໍ້ “ ລົງທຶນ​ເລັ່ງ​ໃສ່​ການ​ພັດທະນາ​ຄວາມ​ກ້າວໜ້າ​ຂອງ​ແມ່ຍິງ ”

     ສນຊ ສະ​ເຫຼີ​ມສະຫຼອງ​ວັນ​ແມ່ຍິງ​ສາກົນ ວັນ​ທີ 8 ມີນາ ຄົບຮອບ 114 ປີ ພາຍ​ໃຕ້​ຫົວ​ຂໍ້ “ ລົງທຶນ​ເລັ່ງ​ໃສ່​ການ​ພັດທະນາ​ຄວາມ​ກ້າວໜ້າ​ຂອງ​ແມ່ຍິງ ” ​ເປັນ​ກຽດ​ເຂົ້າ​ຮ່ວມ ຂອງ​ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ທ່ານ ນາງ ​ແພງ​ພັນ ບຸບຜາ​ພອນ ກໍາມະການ ຄະນະ​ພັກ, ປະທານ​ສະຫະພັນ​ແມ່ຍິງ ສູນ​ກາງ​ແນວ​ລາວ​ສ້າງ​ຊາດ, ທ່ານ ນາງ ວາດ​ສະໜາ ຄຸດ​ໄພທູນ ພັນ​ລະ​ຍາ ທ່ານ ສິນ​ລະ​ວົງ ຄຸດ​ໄພທູນ ປະທານ ສູນ​ກາງ​ແນວ​ລາວ​ສ້າງ​ຊາດ, ມີ​ກໍາມະການ​ສູນກາງແນວ​ລາວ​ສ້າງ​ຊາດ, ຮອງ​ປະທານ​ບໍ່​ປະ​ຈໍາ​ການ, ຫົວໜ້າ​ກົມ-​ຮອງ​ກົມ, ສາສະໜາຕ່າງໆ, ສະມາຄົມຜູ້ອາຍຸ​ສູງ​ ​ແລະ ອົງການ​ຈັດ​ຕັ້ງ​ມະຫາຊົນ​ເຂົ້າ​ຮ່ວມ.
​      ໃນພິທີ​ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ຜ່ານ​ຮ່າງ​ບົດ​ສະຫຼຸບ​ການ​ພັດທະນາ​ພະນັກງານ​ເພດ​ຍິງ ສູນ​ກາງ​ແນວ​ລາວ​ສ້າງ​ຊາດ ​ໄລຍະ​ຜ່ານມາ, ໃນໂອກາດນີ້ໄດ້ຫວນ​ຄຶນມູນ​ເຊື້ອ​ປະ​ຫັວດຄວາມ​ເປັນ​ມາ ວັນ​ທີ 8 ມີນາ ຈາກ​ທ່ານ ດຣ ນາງ ອິນລາວັນ ແກ້ວບຸນພັນ ​ເຊິ່ງທ່ານ​ໄດ້​ຍົກ​ໃຫ້ເຫັນວ່າ: ວັນທີ 8 ມີນາ ແມ່ນເຫດການ-ການເມືອງທີ່ສຳຄັນ, ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບເທົ່າທຽມກັບຜູ້ຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ພາຍໃຕ້ຄຳຂວັນ: ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ. ໃນວັນທີ 19/03/1911 ວັນແມ່ຍິງສາກົນໄດ້ຮັບການສະເຫຼີມສະຫຼອງ ໂດຍມີປະຊາຊົນເຂົ້າຮ່ວມເປັນລ້ານໆຄົນ ຢູ່ໃນບັນດາປະເທດເອີລົບເຊັ່ນ: ປະເທດ ໂອຕິດ, ແດນມາກ, ເຢຍລະມັນ, ສະວິດເຊີແລນ. ນັບແຕ່ນັ້ນມາວັນທີ 8 ມີນາ ຈຶ່ງເປັນວັນແມ່ຍິງສາກົນ.
    ໃນໂອກາດສະເຫຼີມສະຫຼອງວັນແມ່ຍິງສາກົນ ກໍໄດ້ມີພິທີມອບ​ໃບ​ຍ້ອງຍໍ​ໃຫ້ ບໍລິສັດ, ຫ້າງຮ້ານ, ບຸກຄົນ, ນິຕິບຸກຄົນ ແລະ ສັງຄົມ ທີ່ໄດ້​ປະກອບສ່ວນ​ອຸປະຖໍາ​ການສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ກອງທັບ​ປະຊາຊົນ​ລາວ ຄົບຮອບ 75 ປີ ​ແລະ ວັນ​ເກີດ ປະທານ ຄໍາໄຕ ສີພັນດອນ ຄົບຮອບ 100 ປີ, ໂອກາດນີ້ ເອື້ອຍນ້ອງແມ່ຍິງຍັງໄດ້ນໍາເອົາຜະລິດຕະພັນຂອງລາວ ອາຫານ, ເຄື່ອງດື່ມ ແລະ ເຄື່ອງໃຊ້ສອຍ ຕ່າງໆ ມາວາງສະແດງເປັນກິດຈະກໍາແລກປ່ຽນ ແລະ ໃນບັນຍາກາດຍັງໄດ້ຮັບຊົມຊຸດຊົນເຜົ່າຂອງລາວຕື່ມອີກ.
ພາບ-ຂ່າວ: ແສງຫຼ້າ
ບກ. ກົງແກ້ວ
 
info@lfnd.org.la | 021 213754 | (856-21) 453191