ສູນກາງແນວລາວສ້າງຊາດ

Lao Front For National Development

ສນຊ ສ້າງຄວາມຮູ້ ແລະ ຄວາມເຂົ້າໃຈ ວຽກງານການສ້າງຄອບຄົວ ແລະ ບ້ານສາມັກຄີປອງດອງທົ່ວປວງຊົນ

ຊຸດຝຶກອົບຮົມວຽກງານການສ້າງຄອບຄົວ ແລະ ບ້ານສາມັກຄີປອງດອງທົ່ວປວງຊົນ ຕິດພັນກັບວຽກງານ 3 ສ້າງ ໄດ້ຈັດ ຂຶ້ນ ພາຍໃຕ້ການເປັນປະທານຂອງທ່ານ ຄໍາຫຼ້າ ລິ້ງນະສອນ ຮອງປະທານສູນກາງແນວລາວສ້າງຊາດ ແລະ ເປັນປະທານຮ່ວມ ຂອງທ່ານ ຄໍາໄມ ດວງກັນຍາ ປະທານແນວລາວສ້າງຊາດ ແຂວງເຊກອງ ມີບັນດາຄະນະຮັບຜິດຊອບ ຈາກສູນກາງແນວລາວ ສ້າງຊາດ ບັນດາອົງການຈັດຕັ້ງພາຄີອ້ອມຂ້າງແຂວງ, ພະນັກງານແນວລາວສ້າງຊາດແຂວງ ແລະ ແນວລາວສ້າງຊາດ 4 ເມືອງ ເຂົ້າຮ່ວມ.

ໃນພິທີເປີດທ່ານປະທານແນວລາວສ້າງຊາດ ແຂວງເຊກອງ ໄດ້ກ່າວລາຍງານສະພາບລວມຂອງແຂວງ ແລະ ການເຄື່ອນ ໄຫວວຽກງານແນວລາວສ້າງຊາດ ໄລຍະຜ່ານໂດຍຫຍໍ້. ເນື້ອໃນທີ່ນໍາມາສະເໜີໃນກອງປະຊຸມຝຶກອົບຮົມຄັ້ງນີ້, ປະກອບມີບັນ ດານິຕິກໍາຕ່າງໆທີ່ກ່ຽວຂ້ອງເປັນຕົ້ນ ມາດຕະຖານຂອງການສ້າງຄອບຄົວ ແລະ ບ້ານສາມັກຄີປອງດອງສະບັບເລກທີ 024/ສນຊ, ຄໍາແນະນໍາໃນການຈັດຕັ້ງປະຕິບັດ ສະບັບເລກທີ່ 033/ຄປຈ. ສນຊ, ບົດບາດ, ສິດໜ້າທີ່ ຂອງແນວລາວສ້າງຊາດ ຂັ້ນທ້ອງຖິ່ນ ພາຍຫຼັງຮັບຟັງການສະເໜີນິິຕິກໍາແລ້ວ ຜູ້ເຂົ້າຮ່ວມກອງປະຊຸມໄດ້ມີການແລກປ່ຽນຄໍາຄິດຄໍາເຫັນ ຢ່າງກົງໄປ ກົງມາ ລະຫວ່າງ ວິທະຍາກອນ ແລະ ສໍາມະນາກອນ ໂດຍສະເພາະແມ່ນຄໍາຖາມເຈາະຈີ້ມໃນຂັ້ນຕອນການຈັດຕັ້ງປະຕິບັດ, ບົດເແນະນໍາໃນການສ້າງຄອບຄົວ ແລະ ບ້ານສາມັກຄີ ບັນຫາງົບປະມານ, ບຸກຄະລາກອນ ແລະ ອື່ນໆ.

ໃນໂອກາດນີ້ ທ່ານ ຄໍາຫຼ້າ ລິ້ງນະສອນ ຮອງປະທານສູນກາງແນວລາວສ້າງຊາດ ໄດ້ມີຄໍາເຫັນໂອ້ລົມຕໍ່ທີ່ປະຊຸມເຊິ່ງ ທ່ານ ໄດ້ຍ້ອງຍໍຊົມເຊີຍຕໍ່ຜົນງານຂອງແນວລາວສ້າງຊາດແຂວງ ທີ່ຍາດມາໄດ້ໃນໄລຍະຜ່ານມາ ແລະ ໃນຕໍ່ໜ້ານີ້ການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບວຽກງານສາມສ້າງ ເປັນວຽກງານໜຶ່ງທີ່ສໍາຄັນ ແມ່ນວຽກງານຈຸດສຸມຂອງອົງການ ແນວລາວສ້າງຊາດ, ແນວລາວສ້າງຊາດແຕ່ລະຂັ້ນ ຈົ່ງເອົາໃຈໃສ່ ແລະ ຖືເປັນບູລິມະສິດໃນການຈັດຕັ້ງປະຕິບັດໜ້າທີ່ການ ເມືອງຂອງຕົນ, ໃນນີ້ ແນວລາວສ້າງແຕ່ລະຂັ້ນຕ້ອງຜັນຂະຫຍາຍ 6 ແຜນງານ ຂອງແນວລາວສ້າງຊາດ ມາເປັນໂຄງການ, ແຜນການ ແລະ ກິດຈະກໍາອັນລະອຽດຂອງຕົນ ເພື່ອສະ ເໜີຕໍ່ຄະນະປະຈໍາພັກແຂວງ, ຄະນະປະຈໍາພັກເມືອງ ໃນການຕອບ ສະໜອງດ້ານທຶນຮອນ ງົບປະມານໃນການເຄື່ອນໄຫວວຽກງານແນວລາວສ້າງຊາດ ເພື່ອເຮັດໃຫ້ຂະບວນການສ້າງຄອບຄົວ ແລະ ບ້ານສາມັກຄີ ຕິດພັນກັບວຽກງານ 3 ສ້າງ ໃຫ້ເປັນຂະບວນການຟົດຟື້ນ, ບັນລຸຕາມເປົ້າໝາຍ ແລະ ແຜນການທີ່ລັດ ຖະບານ ກໍຄືສູນກາງແນວລາວສ້າງຊາດ ວາງໄວ້.

ຊຸດຝຶກອົບຮົມດັ່ງກ່າວ, ໂດຍແມ່ນສູນກາງແນວລາວສ້າງຊາດ ຮ່ວມກັບ ແນວລາວສ້າງຊາດ ແຂວງເຊກອງ ຈັດຂຶ້ນ ໃນ ລະຫວ່າງວັນທີ 18-19 ຕຸລາ 2017. ເພື່ອສ້າງຄວາມຮັບຮູ້, ຄວາມເຂົ້າໃຈ ແລະ ຍົກລະດັບຄວາມສາມາດ ໃນການຈັດຕັ້ງປະ ຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງທົ່ວປວງຊົນ ໃຫ້ແກ່ພະນັກງານແນວລາວສ້າງຊາດ ໃນຂັ້ນທ້ອງ ຖິ່ນ ໄດ້ນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ.

info@lfnd.org.la | 021 213754 | (856-21) 453191