ທີ່ສູນກາງແນວລາວສ້າງຊາດ ໄດ້ຫວນຄືນ ວິລະກໍາ ກອງຮ້ອຍຫີນເພັດ ວິລະຊົນ ໃນວັນທີ 14 ຕຸລາ 2020 ນີ້, ເປັນກຽດເຂົ້າຮ່ວມມີທ່ານ ນ. ຄໍາຈັນ ພົມແສງສະຫວັນ, ທ່ານ ຈັນທະວົງ ແສນອາມາດມົນຕີ ຮອງປະທານ ສນຊ, ມີບັນດາພະນັກງານອາວຸໂສບໍານາມ, ແຂກທີ່ຖືກເຊີນ ແລະ ພະນັກງານ-ລັດຖະກອນ ສນຊ ເຂົ້າຮ່ວມ.

ໃຫ້ກຽດປາຖະກະຖາໂດຍທ່ານ ພົ/ວ ທອງເຄນ ອ່ອນດາວົງ ພະນັກງານປະຕິວັດ-ອາວຸໂສບຳນານ, ອາດີດຮອງປະທານສະຫະພັນນັກຮົມເກົ່າແຫ່ງຊາດລາວ ເຊິ່ງທ່ານໄດ້ໃຫ້ຮູ້ວ່າ: ຜ່ານຂະບວນວິວັດແຫ່ງການຕໍ່ສູ້ຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກໃນທຸກບາດກ້າວເດີນຂອງພາລະກິດຕໍ່ສູ້ປະຕິວັດບົນເສັ້ນທາງອັນລະອິດລະອ້ຽວ, ລໍາບາກ, ຍາວນານ ແລະ ເຕັມໄປດ້ວຍການເສຍສະຫຼະອັນໃຫຍ່ຫຼວງນັ້ນ ລ້ວນແຕ່ຕິດພັນກັບການເຄື່ອນໄຫວສູ້ຮົບທີ່ອົງອາດກ້າຫານຂອງກອງທັບ ແລະ ປະຊາຊົນລາວ; ໃນໄລຍະດັ່ງກ່າວມີຫຼາຍກົມກອງນັບທັງກໍາລັງຫຼວງ ແລະ ກຳລັງທ້ອງຖິ່ນ ສ້າງໄດ້ຜົນງານທີດີເດັ່ນປະກອບສ່ວນອັນໃຫຍ່ຫຼວງໃຫ້ແກ່ປະເທດຊາດຢ່າງສົມກຽດ. ໃນນັ້ນ, ກອງຮ້ອຍ 2 (ກອງຮ້ອຍຫີນເພັດ ວິລະຊົນ) ປ້ອງກັນສໍານັກງານແນວລາວຮັກຊາດ ທີ່ປະຈໍາຢູ່ນະຄອນຫຼວງວຽງຈັນ, ແມ່ນພາກສ່ວນໜຶ່ງຂອງກອງທັບປະຊາຊົນລາວ ທີ່ມີຜົນງານດີເດັ່ນໃນການເຮັດໜ້າປ້ອງກັນລັດຖະບານປະສົມ ຄັ້ງທີ 2, ປ້ອງກັນຜູ້ຕາງໜ້າແນວລາວຮັກຊາດ ແລະ ຄະນະຜູ້ແທນຂອງແນວລາວຮັກຊາດ ທີ່ເຂົ້າມາເຈລະຈາແຕ່ລະຄັ້ງໃຫ້ມີຄວາມປອດໄພ. ຕະຫຼອດໄລຍະ ປີ 1962-1974 ທີ່ກອງຮ້ອຍ 2 (ກອງຮ້ອບຫີນເພັດ) ປ້ອງກັນຜູ້ນໍາປະຈໍາສຳນັກງານຜູ້ຕາງໜ້າແນວລາວຮັກຊາດ ຢູ່ນະຄອນຫຼວງວຽງຈັນ ໄດ້ຮັກສາມູນເຊື້ອຂອງກອງທັບເຮົາເປັນຢ່າງດີມີຄວາມຈົງຮັກພັກດີຕໍ່ປະເທດຊາດ ຢ່າງສຸດຂີດ, ມີນໍ້າໃຈສູ້ຮົບພິລະອາດຫານບໍ່ຄອນແຄນຕໍ່ການປິດລ້ອມອ້ອມຕີ, ນາບຂູ່ຂອງສັດຕູຢ່າງເດັດຂາດ, ມີນໍ້າໃຈອົດທົນ, ເດັດດ່ຽວໜຽວແໜ້ນຜ່ານຜ່າຄວາມຫຍຸ້ງຍາກນາໆປະການ, ເຮັດສໍາເລັດທຸກໜ້າທີ່, ຕີຊະນະທຸກກົນອຸບາຍເລ່ລ່ຽມ, ທໍາລາຍມ້າງເພຂອງສັດຕູໃຫ້ປະລາໄຊ, ປ້ອງກັນຜູ້ນໍາເຮົາໃຫ້ມີຄວາມປອດໄພຮ້ອຍສ່ວນຮ້ອຍ ດັ່ງນັ້ນ, ກອງຮ້ອຍ 2 (ກອງຮ້ອບຫີນເພັດ) ປ້ອງກັນຜູ້ນໍາເຮົາປະຈໍາຢູ່ນະຄອນຫຼວງວຽງຈັນ ຈິ່ງໄດ້ຮັບນາມມະຍົດ ເປັນກອງຮ້ອຍຫີນເພັດ ວິລະຊົນ ຂອງຊາດລາວ.