ສູນກາງແນວລາວສ້າງຊາດ

Lao Front For National Development

ສນຊ ອ່ວຍພອນການນຳພັກ-ລັດ ໃນໂອກາດປີໃໝ່ລາວ

ເພື່ອ​ສະ​ແດງ​ເຖິງ​ຄວາມ​ຮູ້​ບຸນຄຸນ​ຕໍ່​ການ​ນຳ​ພັກ-ລັດ ​​ເນື່ອງ​ໃນ​ໂອກາດ​ປີ​ໃໝ່​ລາວ​ທີ່​ຈະ​ໝູນ​ມາ​ບັນຈົບ​ຄົບຮອບ​ອີກ​ວາລະ​ໜຶ່ງ.

ທ່ານ ຄຳ​ໃບ ດຳລັດ ກຳມະການ​ສູນ​ກາງ​ພັກ, ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ (ສນຊ), ທ່ານ ​ເຢຍ​ເກີ​ຢາ ໜໍ​ຈໍ່​ຈົງ​ຕົວ ຄະນະ​ພັກ, ຮອງ​ປະທານ ສນຊ ພ້ອມ​ດ້ວຍ​ຄະນະ​ ​ໄດ້​ເຂົ້າ​ອວຍພອນ​ທ່ານ ບຸນ​ຍັງ ວໍລະ​ຈິດ ກຳມະການ​ກົມ​ການ​ເມືອງ​ສູນ​ກາງ​ພັກ, ປະທານ​ປະ​ເທດ​ແຫ່ງ ສປປ ລາວ ​ໃນ​ວັນ​ທີ 11 ​ເມສາ 2018, ທີ່​ເຮືອນ​ຂອງ​ເພິ່ນ​, ໃນ​ໂອກາດ​ນີ້​ທ່ານຮອງ​ປະທານ ສນຊ ​ໄດ້​ກ່າວ​ວ່າ: ຕາງໜ້າ​ໃຫ້ຄະນະ​ພັກ-ຄະນະ​ປະຈຳ ສນຊ ກໍ່​ຄື​ສະມາຊິກ​ພັກ, ພະນັກງານ ​ແລະ ລັດຖະກອນ​ທັງ​ໝົດ​ຂອງ ສນຊ ຂໍ​ສະ​ແດງ​ຄວາມ​ຮູ້​ບຸນຄຸນ​ຕໍ່​ການ​ນຳ​ພັກ-ລັດ ​ໃນ​ການ​ຊີ້​ນຳ​ນຳພາຕະຫລອດ​ໄລຍະ​ຜ່ານ​ມາ​ຕໍ່​ວຽກ​ງານ​ແນວ​ລາວ​ສ້າງ​ຊາດ ​ເຊິ່ງປະຈຸ​ບັນ​ອົງການ​ແນວ​ລາວ​ສ້າງ​ຊາດ​ພວມ​ປະ​ເມີນ​ຜົນ​ການຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງຄະນະກໍາມະການ ສນຊ ແລະ ​ໂອກາດ​ປີ​ໃໝ່​ນີ້ຂໍ​ໃຫ້​ທ່ານ​ປະທານ​ປະ​ເທດ​ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ຈົ່ງ​ມີ​ສຸຂະພາບ​ແຂງ​ແຮງ, ມີ​ຄວາມ​ຜາ​ສຸກ, ມີ​ພາລະ​ນາ​ໄມ​ສົມບູນ ສືບ​ຕໍ່ຊີ້​ນຳ​ນຳພາ​ການ​ສ້າງສາ​ພັດທະນາປະ​ເທດ​ຊາດ ກໍ່​ຄື​ປະຊາຊົນ​ລາວ​ບັນດາ​ເຜົ່າ ​ໃຫ້ຫລຸດ​ພົ້ນ​ອອກ​ຈາກ​ຄວາມ​ດ້ອຍ​ພັດທະນາ​ ຕາມ​ຄາດໝາຍ​ຂອງ​ລັດຖະບານ​ວາງ​ໄວ້.

​ໂອກາດ​ດັ່ງກ່າວ ທ່ນປະທານ​ປະ​ເທດ​ແຫ່ງ ສປປລາວ ກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ຄະນະ​ພັກ-ຄະນະ​ປະຈຳ ສນຊ ພ້ອມດ້ວຍຄະນະ ພ້ອມທັງມີຄຳເຫັນທີ່ສຳຄັນກ່າວວ່າ: ໄລຍະການປະຕິວັດຊາດປະຊາທິປະໄຕ ພັກໄດ້ເອົາແນວໂຮມອອກໜ້າເພື່ອປະຕິບັດພາລະບົດບາດແທນພັກ ໃນການປຸກລະດົມຂົນຂວາຍ ແລະ ເຕົ້າໂຮມຄວາມສາມັກຄີປວງຊົນທັງຊາດເຂົ້າຮ່ວມພາລະກິດປົດປ່ອຍຊາດ ແລະ ມາຮອດໄລຍະໃໝ່ແນວລາວສ້າງຊາດຍັງຮັກສາໄດ້ມູນເຊື້ອ ແລະ ສືບຕໍ່ເສີມຂະຫຍາຍພ້ອມທັງປະຕິບັດຕາມພາລະບົດບາດໃນການເຕົ້າໂຮມຄວາມສາມັກຄີທຸດຊົນເຜົ່າ, ສາສະໜາ, ຊັ້ນຄົນ, ເພດ-ໄວ ໃຫ້ເປັນປຶກແຜ່ນແຫນ້ນໜາ, ພ້ອມກັນມີສະຕິຕໍ່ກົນອຸບາຍຫັນປ່ຽນຂອງພວກຄົນບໍ່ຫວັງດີ ແລະ ເປັນກະບອກສຽງຊ່ວຍພັກ-ລັດໃນການຕີຖ້ອຍທຳນອງບິດເບືອນຄວາມຈິງທີ່ໃສ່ຮ້າຍປ້າຍສີລະບອບໃໝ່ພວກເຮົາ.

info@lfnd.org.la | 021 213754 | (856-21) 453191